ضرورى يا بشمهندس سمير الأوبترا هتخرب بيتى

[drali]

اولا السلام عليكم
هدخل ف الموضوع علطول

من حوالى شهر كده وانا ماشى عادى جدا ومفيش اى مشاكل لمبة التشيك نورت وفضلت منورة لحد ما وصلت المشوار بتاعى بطلت العربية وبعد كذا ساعة لما دورت لقيتها طفت.
تكررت هذه الواقعة من وقت لأخر على فترات متباعدة يعنى كل اربع خمس ايام .
الغريب ان مكانش فى اى شكوى من العربية فكنت مكبر دماغى.
لحد من اسبوع بدأت تحصل حاجات غريبة وهى كالأتى:
1- لما ادور العربية الصبح بدل ما الأر بي ام يبقى فوق الواحد بشوية زى العادى وينزل وحدة وحدة لأ ده بيجى علطول على الواحد وبعدين أول ما يبدأ ينزل تبدأ العربية تتفتف والموتور يترعش جامد والأر بى ام ينزل جامد يمكن لحد 400 لفة او اقل وبعدين فجأة يطلع لواحد ونص.
2- لما تسخن العربية الحكاية دى بتختفى لكن بيفضل الأر بى ام يتأرجح بين 700 و800 وده اقل من الطبيعى بتاعها اللى كان 900 والطبيعى انه كان ثابت على 900 مكانش فيه الأرجحة دى.
3- اديها الغيار واجى امشى اول ما ادوس بنزين تتخنق وتبطل كأن دوسة البنزين بتعمل مفعول عكسي او بتقلل الأر بى ام .

طبعا كل ده بيحصل واللمبة منورة فروحت لحد بتاع كشف اعطال فى الحرفيين اسمه محمد عسكر مشهور قوى هناك كشف وقاللى حساس شكمان نزلت جبته من التوفيقية ب450 جنيه وغيرناه وحط العربية على الاسكانر وقاللى تمام حاسبته ومشيت.
تانى يوم ادور العربية لقيت الأر بى ام على واحد برضه واول ما بدأ ينزل بدأت تبرجل وحصلت نفس القصة واللمبة نورت.
رحتله قالى الحساس مش أصلى هات واحد استيراد احسن من الحرفيين ورجع التانى جبت واحد استيراد ب 250 جنيه وركبه وحط العربية على الاسكانر وقاللى تمام.
تانى يوم الصبح نفس القصة حصلت وكده من الملاحظ ان القصة دى مبتظهرش الا والعربية باردة.
من نفسى خدت العربية وطلعت على توكيل ابو رواش هى موديل 2008 يعنى برة الضمان وحكيت لمهندس الاستقبال القصة قالى مبدأيا كده ده فعلا حساس شكمان من غير ما يكشف لكن علشان اشتغل فى العربية لازم اغير كاتينة واشيك على البوابة واشوف كبس الموتور قلتله العربية عامله 35000 لسه 10000 عل الكاتينة قاللى 45000 او 3 سنوات ايهما اقرب قلت مفيش مشكلة كام يا عم قاللى 3000 جنيه غير المصنعية قابلين للزيادة طبعا كنت هعمله مصيبة وقلتله غير الحساس بس على مسؤليتى قاللى مينفعش قمت رايح منفذ قطع الغيار وجبته ب 630 جنيه وروحت ركبته فى الحرفيين عند محمد عسكر وهناك قاللى الحساس ده أصلى أصلى يعنى قولتله يا مسهل انا قربت اولع فى العربية المهم ركبه وظبط تمام .
تانى يوووووووووم نفس القصة لأ وكمان ايه بتاكل بنزين نار يعنى 120 كيلو فى الصفيحة بعد ما كانت بتعمل 260 كيلو فى الصفيحة.
روحت تانى لمحمد عسكر قالى بس يا معلم كده المشكلة فى الكنترول مش متعرف على الحساس لازم تغير الكنترول .
دلوقتى انا فاصل فيشة الحساس والعربية هى هى بيه زى من غيره واللمبة مش قايدة كمان.
بس طبعا العربية لسه مبرجلة وبتاكل بنزين بطريقة بشعة الحقنى يا بشمهندس هل ده الكنترول فعلا.

[drali]

على فكرة قاللى ممكن اعمل للكنترول سوفت وير قولتله اعمل اول لما فتحه لقاه مش من النوع اللى ممكن يتعمله سوفت لازم يتغير على كلامه.

[drali]

حاجة كمان لاحظتها لما يكون التكييف شغال وانا بجرى اول لما اشيل رجلى من على البنزين والعربية واخدة غيار احس ان فى حاجة بتكلبش العربية والسرعة بتنزل علطول يعنى كأنى بدوس فرامل والكلام ده مبيحصلش لو انا مش مشغل التكييف

[sayed2077]

ينهار ابيض كل ده بيحصل معاك بجد الله يعينك
الله يعينك بجد

[elmo7areb]

الله يرحم ايامك يا باشمهندس سمير مكنتش بتتأخر على حد وكنت بترد على الموضوعات اول واحد

ربنا يرجعك ليا بالسلامه ان شاء الله