|
#1
08-06-2014, 01:19 AM
|
|||
|
|||
مركز خدمة الصفوة سرقنى .. اعمل ايه ؟؟
السلام عليكم
اخش فى الموضوع على طول عشان هو موضوع طويل اصلا انا روحت من حوالى شهر لمركز خدمة الصفوة (اسكندرية). عشان كانت العربية رخمة اوى وبتسحب ساعات وساعات لا وتقطع ساعات وتنتش ساعات والميكانيكيه بتفتى طبعا فقلت اروح الصفوة اعمل مقايسة كاملة للعربية خصوصا انها معايا من زمان (مو2007) وبالمرة نلم كل حاجة فيها ميكانيكه وعفشة واعملها كلها فى مكان المفروض انه كويس وبيفهم . المهم روحت وصلت على الساعه 12 الظهر كده استلموا منى العربية وحكيت لهم على الاعطال اللى بتقابلنى وطلبت منهم انهم يشوفوا اسبابها واى حاجة تانية فى العربية برضه يقلوهالى بعد ميكشفوا عليها . فضلت قاعد ومستنى ومستنى ومستنى لحد مبقت الساعه 4 ونص ..(يعنى 4 ساعات ونص عشان عمل مقايسة وكشف على العربية بس ) . وبعدها جالى المهندس جايبلى ورقة (سورى فى اللفظ) معفنة . اللى هى ورقة مكتب صغيرة . كاتبلى فيها تقريبا كل حاجة فى العربية وكلها ليها علاقة بالعفشة . قلتله طيب والسحب قالى علبة البيئة بايظة وعاوزة تتغير هى دى اللى مخلية سحب العربية وحش قلتله تمام الاسعار بقى كام قالى بالنسبة لكل الحاجات دى لو هنركب الاصلى هتدخل فى من 15 ل 18 الف جنية اما بقى لو هركبلك قطع الغيار الهاى كوبى هتعمل فى حدود من 9 ل 11 الف . قلتله طيب تمام هظبط امورى وابقى اجى نعمل كل فترة حاجة بالتدريج وبالاولويه . ومشيت .. بعدها لاحظت ان العربية بتسخن ساعات خصوصا وانا فى اشارات او وانا على سرعه الصلانصية يعنى تسخن دقيقة او اتنين وترجع تانى ومرة تحصل ومرة لا . المهم قلت اشوف الميكانيكى بتاعى هيقول ايه فا من قبل ميشتغل انا وهو رجحنا ان السبب هو الثرموستات فالراجل قالى ممكن يكون اسباب تانية وقالى احنا هنشيل الثرموثتات خالص لو سخنت يبقى مش عيب الثرموثتات لو مسخنتش يبقى نركب ثرموثتات جديد . المهم العربية سخنت روحتله واتكلمنا وجبت فى الكلام موضوع الصفوة لما قالى علبة البيئة . قالى يبقى كده مشكلتك هى فعلا علبة البيئة روح غيرها فى اسرع وقت .. فروحت الصفوة يوم الاربع اللى فات عشان اركب علبة البيئة وفضلت منتظر دورى وفى الاخر قالولى اللبة مش متوفرة حاليا .. قالولى ابقى اتصل وتابع معانا لحد منوفرها .. ومشيت وبرضه انا زهقان من موضوع السخونه الللى بتيجى ساعات فالميكنيكى قالى روح فضى علبة البيئة مؤقتا لحد متركب العلبة الجديده فاقتنعت بكلامة اخيرا وروحت لواحد بتاع شكمانات كويس وموثوق فيه عشان يفضيها .. ونزل الراجل وفك وبيبص لقاها فاضية والفحم اللى جواها متشال ومتركب مكانه جوه فى قلب العلبة ماسورة ومقفوله من قدام وفيها فتحت بسيطه تخرج العادم .. الراجل قالى العلبة فاضية انا جالى زهوووووووول قلتله ازاى يا عم (مع العلم انى كنت معاه تحت العربية وهو بيفك ) قالى بص بنفسك بصيت فعلا ملقتش غير الماسورة المتركبة دى . قالى انت بتدي ربيتك لحد؟ قلتله لا مفيش غير اللى بيركبها قالى لا فى غيرك ركب العربية وخدها وفضاها لان اللى جوه العلبة دى بيتباع الكيلو ب 300 جنية قالى ركز بس انت اديتها لحد .. طبعا انا جه فى بالى الصفوة لانها الوحيده اللى اخدت عربيتى لمدة 4 ساعات ونص ومعرفش هما بيعملوا فيها ايه ومفيش غيرهم اللى سرق الفحم من جوه علبة البيئة طبعا الشرح كتييييييير وممل جدا بس كان لازم اقوله كله عشان تبقوا معايا فى الموقف دلوقتى انا اتسرقت رسمى اعمل ايه .؟؟؟ ايه الحل ؟؟؟؟ هى دى مراكز خدمة سيارات مصر بقى (حرامية اصلى ). ارجو منكم تفيدونى ايه الحل بقى ؟؟؟ نسيت اقولكم ان ماسورة الشكمان من جوة وعلبة البيئة من جوه كلهم اسود وباين عليهم الزمن لكن الماسورة اللى محطوطة فى العلبة شكلها لسه جديد وبتلمع كمان يعنى وضوح الشمس فى السرقة 
|
 |
|
|
