هجدد بس رخصة العربية ولا هدخل فحص بعد التسجيل

[نبيل عبدالرحمن]

حضرتك لازم تكونى أولاً بعتى العربيه لنفسك عن طريق الشهر العقارى ، ولما تروحى المرور العربيه لازم تدخل فحص مع أخد رقم الشاسيه والموتور ( البصمه ) وبتقدمى الأوراق دى للشباك وإعملى التجديد للعربيه والرخصة خلاص ها تطلع بإسمك ، وعلى فكرة فى ناس فى كل إدارات المرور بيخلصوا الحاجات دى وإنت قاعدة وتقدرى تسألى واحد بتاع شاى أو واحد بتاع موقف العربيات وهمه بيعرفوا الناس دى بس لازم هاتدفعى !!!!!

[AbOnOrA]

لو حضرتك منقلتيش العربيه باسمك وسجلتيها كان ممكن تجددى الرخصة من غير فحص بالتوكيل فقط لكن كدة اعتقد لازم العربيه تخش فحص والرخصة هتطلع باسمك

[mr_astra]

مع ان المعلومات قليلة اوى لكن ما فيش مشكلة
كنت عاوز اعرف المرور التابع لة العربية والمرور اللى حضرتك تبعة لية ....كمان كنت عاوز اعرف عملتى توكيل ولا عقد بيع مسجل فى الشهر العقارى عشان الكلام يبقى مظبوط
اولا موضوع شهادة المخالفات اللى اقترحتة على حضرتك مش هاينفع لان النهردة 24 ورخصتك هاتنتهى اخر الشهر يعنى 6 ايام على الاكثر فامش هاينفع شهادة المخالفات تيجى عن طريق النت
بس خدى بالك لازم سرعة الاجراءات عشان انا مش عارف حضرتك عملتى توكيل ولا عقد بيع مسجل فى الشهر العقارى
هانفترض اسوا الاحوال وهو انك عاملة توكيل مش عقد بيع مسجل
1- تروحى اى شهر عقارى تعملى عقد بيع مسجل فى الشهر العقارى بموجب التوكيل اللى مع حضرتك
1" - لو معاكى عقد بيع مسجل يبقى الخطوة رقم 1 ملهاش معنى وهاتفرقى بين التوكيل وبين العقد بالرسوم اللى دفعتيها
التوكيل بـ 12 جنية انما عقد البيع المسجل بـ حوالى 800 جنية لعربيتك
2- اطلعى المرور اللى حضرتك تابعة لة ..... لو حضرتك مثلا بطاقتك الشخصية عنوانها مصر الجديدة يبقى تروحى مرور مصر الجديدة - لو عنوانك مدينة نصر يبقى تروحى مرور رابعة العدوية وهكذا
3- اول ما تروحى المرور بتاعك اشترى من الخزنة نموذج فحص وتجديد - ملف كرتون- طلب صرف لوحات
4- اقفى فى صف العربيات بتاع الفحص هايجيلك فنى يرفع بصمة شاسية وموتور ويكتبهم فى نموذج الفحص
5- اختمى ورقة مرفقة مع نموزج الفحص اسمها شهادة صلاحية الطفاية
6- مهندس الفحص هايجى يكتبلك على نموذج الفحص خطاب موجهه لمرور العربية بمطابقة البصمة والاستعلام الامنى
6- ادفعى التامين الاجبارى من اى شركة تامين سواء سنة او 3 سنوات

المرحلة الثانية
1- روحى للمرور التابع لة العربية
2- اسالى على نيابة المرور
3- احصلى على شهادة براءة الزمة ( شهادة المخالفات ) + الاستعلام الامنى اللى على ضهر نموذج الفصح
4- اقفى على الشباك اسمة " مطابقة البصمة " وادى الموظف نموذج الفحص يطابق البصمة وبكدة خلصنا شغل فى المرور التابع لة العربية

المرحلة الثالثة
1- روحى المرور بتاع حضرتك واتجهى لمهندس الفحص الفنى اللى كتبلك خطاب مطابقة البصمة عشان يختم النموذج
2- بكدة يبقى خلاص تتجهى لشباك التجديد ونقل الملكية هايعملك رسوم السداد بناء على التامين الاجبارى سواء سنة او 3 سنوات
3- هاتستلمى الرخصة باسمك وحاجة من اتنين
اما تعلقى نمر جديدة يبقى تتجهى لشباك صرف اللوحات برخصة العربية والبطاقة الشخصية وتستلمى اللوحات
او
هاتستمرى باللوحات القديمة وتتوكلى على الله وبكدة الموضوع انتهى

بالتوفيق ان شاء الله

[mr_astra]

up up up
==============

[ام روجي]

المشاركة الأصلية كتبت بواسطة mr_astra up up up ==============

أنا فعلا سجلت العربية باسمي بالف جنيه
وبعدين رحت المرور اللي تبع العربية لانه فيصل وطلعت شهادة مخالفات وطلعت تمام وبعدين رحت بين السرايات لان بطاقتي عليها عملت فحص من هناك وتامين اجباري وخلصت ورق الفحس
دلوقتي فاضل بس اجدد هقف ع الشباك بالورق اللي معايا واطلع الرخصة باسمي وخلاص
انا جددت 3 سنين علشان اريح نفسي
بالمناسبة هو عمل حاجة اسمها بصمة للعربية بس مطلبش مني بتاع الفحص اني اطابقها ولا تفتكر بتوع الشباك بتاع التجديد اللي هيطلبوها