طلب نصيحة فى شراء عربية

[شرف الدباح]

قدامى عربية لكن صاحبها قال لى انه اشتراها من 6 شهور وبعد ما سقط لها مكنة عرضها للبيع وبصراحة ناس خوفتنى منها وقالوا لى ايه اللى يخليه يبيع بعد فترة قصيرة من شراءه للعربية الا اذا اكتشف فيها حاجة وعايز يخلص منها رغم ان وفقا لكلامه واضح انها كويسة....فانتوا رأيكم ايه هل اروح اشوفها ولا ادور على غيرها خصوصا وان المعاينة فى مكان بعيد عنى وهيبقى مشوار ومصاريف لانى هاخد معايا ميكانيكى وسمكرى

[AbOnOrA]

مش هيغير المكنة الا لما يكون فى القديمة مشكلة كبيرة والمكنة الجديدة اللى ركبت ليها ورق ولا لاء واتثبتت فى المرور ولا لاء بصراحة عربية تقلق جدا ونسبة المخاطرة فيها كبيرة

[شرف الدباح]

المشاركة الأصلية كتبت بواسطة AbOnOrA مش هيغير المكنة الا لما يكون فى القديمة مشكلة كبيرة والمكنة الجديدة اللى ركبت ليها ورق ولا لاء واتثبتت فى المرور ولا لاء بصراحة عربية تقلق جدا ونسبة المخاطرة فيها كبيرة

لما كلمته مكانش لسه ثبتها على الرخصة لكن قال انه هيثبتها لكن المشكلة بالنسبة لى مش فى الاجراءات القانونية على قد ما هى فى كفاءة العربية نفسها....لكن بعيد عن العربية دى لان شكلى كدة هصرف نظر عنها هل الافضل اشترى عربية صاحبها لسه عامل لها عمرة او مسقط لها مكنة ولا اشوف عربية بمكنتها الاصلية حتى لو كانت مش بنفس كفاءة مكنة لسه متسقطة علما بانى بادور على عربية موديل التسعينات

[AbOnOrA]

بصراحة يا استاذ شرف منصحكش خالص نسبة كبيرة من الناس ممكن يبقى بيبيع من كتر مشاكل العربية ويادوب يصلحها (تجارى) يلصمها كدة ويبيع
انا اجيب عربية حالتها مستقرة يا مكنة اصلية يا متغيرة بس اتثبتت والمكنة تمام وقصتها خلصت
لكن لو تشوف كمية المشاكل اللى بتظهر بعد العمرة او بعد تسقيط مواتير وحتى اللى باع الموتور مش هيرضى يرجعة تانى او يبقى سقط المكنة بس الورق بتاع المكنة الجديدة مش موجود وقرف ولف على صنايعية ملوش اى لازمة والواحد لسه مشترى العربية

فالخلاصة لو انت بتشترى علشان تركب سيبك من الحالات ديه
لكن لو الموضوع تجارة وتحت ايدك المكانيكية والصنايعية اللى يشدو العربية وطبعا هتشترى العربية بسعر حلو علشان فيها شغل ده ماشى غير كدة اشترى علشان تركب وبلاش الحاجات اللى فيها قلق مش من قله العربيات

[شرف الدباح]

تسلم يا غالى لكن انا عايز اشترى حاجة متقرفنيش عند الصنايعية...طيب لو واحد مسقط مكنة اقدر بعد فترة قد ايه اقول انها اتجربت وثبت انها كويسة