نقل الملكية عشان تنجز فى يومين بس (مرور السلام)

[Vanditta]

السلام عليكم ورحمة الله وبركاتة

الموضوع دة نقل لتجربتى فى نقل الملكية (من مرور لمرور ) بتاريخ 23/10 فى مرور السلام

والموضوع فية بعض النصائح عشان تنجز موضوعك فى يوم واحد لو ماعندكش مطابقة بصمة وفى يومين لو عندك مطابقة
و الخطوات مختلفة شوية عن موضوع الاستاذ الفاضل POP EL GAMED بخصوص نقل الملكية يمكن عشان مرور السلام لية طبيعة خاصة غير اى مرور تانى
وعشان فى بعض النقاط الناس مابتاخدش بالها منها ودة اللى بيأخر مصالحهم

اناخلصت فى يومين عشان كان عندى مطابقة (يعنى كان فية يوم رايح اونطة)
تانى يوم وصلت المرور 8 ونص وخلصت ورقى كلة الساعة 10 ونص
يعنى فى ساعتين وبدون واسطة فى مرور السلام (يعنى معجزة)
وخدت الرخصة الساعة 3 الا ربع

مبدئيا الورق المطلوب :-

1- عقد البيع المسجل
2-التوكيلات كلها (ان وجد)
3-الرخصة او شهادة بيانات لو الرخصة منتهية (شهادة البيانات تكون سارية)
4-شهادة مخالفات (سارية)
5-ورق الفحص + وصل الطفاية
6-ورق التأمين الاجبارى
7- عدد 2 صورة بطاقة + 2 صورة رخصة
8- صورة بطاقة عليها استعلام امنى


دة اللى مكتوب فوق الشباك ... الورق اللى الموظف هايبعتك تجيبة بعد ماتقف طابور
1- ورقتين طلب استعجال ملف (من الكشك)
2- نموزج 251 ( او253 لو العربية اكتر من 4 سلندر )

بعض النصائح عشان تنجز مصلحتك من غير ماتتسوح :-

(هتقابل ناس كتيير بيعرضوا عليك انهم يخلصولك مصالحك مقابل فلوس ...الناس دى معظمها نصابيين خلى بالك )
لو تعرف تاخد واحد صاحبك معاك هاتنجز الكلام دة كلة فى نص الوقت

1- هاتكون فى المرور 8 بالظبط او قبل كدة كمان لو عرفت وتدخل تركن فى وحدة الفحص على اى جنب كدة
2- تسيب العربية وتدخل المرور تدفع التأمين الاجبارى (دة الوحيد اللى بيفتح 8)

3-تقف على الخزنة (بتفتح 8 ونص) وتشترى منها ورق الفحص(15 جنية)

4- تروح وحدة الفحص وترفع بصمة وتفحص والموضوع دة مش بياخد اكتر من 10 دقايق

5- (هام) بعد ماتفحص تطلع على المباحث الجنائية وتعمل استعلام امنى على صورة البطاقة .... بيفتحوا الساعة 9 ( لازم تعمل الخطوة دى عشان ماتفضلش واقف طابور واول ماتوصل للشباك الموظف يرجعك عشان الاستعلام الامنى )

6- (ركز معايا عشان تنجز) هتنزل من المباحث على الكشك تشترى طلب نقل ملكية -( وورقتين استعجال ملف ) وملف وتحط ورقك كلة فية وتطلع على شباك مكتوب علية نقل قيد وملكية (هتلاقى 3 شبابيك منهم واحد لسة فاتحينة جديد تيسيرا على المواطنين)
7- هتسلمة الورق هايراجعة ويسئلك عايز سنة ولا 3 وبيديك وصل الضريبة عشان تدفعة وبيقولك تشترى نموزج 251
(لو انت دافع الضريبة فى شهادة البيانات بتدفع رسوم بسيطة حوالى 11 جنية تقريبا)
اللقطة هنا انك هتحتاج شباك السداد وشباك بيع النمازج والاتنين عليهم طوابير من هنا لأبو ظبى
فأنت وانت واقف على طابور السداد شوف اى حد ابن حلال واقف فى طابور بيع النمازج واديلة 15 جنية يجيبلك معاة نموزج 251
واملى على قد ماتعرف البيانات اللى فية عشان الموظف مايرجعكش تانى تملى البيانات
8- هترجعلة بالورق دة وهيملى شوية بيانات ويديك ورقتين امر استلام لوحات تروح لبتاع اللوحات بيمضى عليهم ويختمهم ويمضيك اقرار وترجع للموظف تانى تديلة الورق

9- بيدبس الورق كلة فى الملف بتاعك وخلاص كدة تستنى تحت المظلة لأستلام الرخصة
(خلى عينك مع الموظف عشان من كتر الملفات ساعات بيتلخبط وكان هيضيعنى ويدبس ورقى فى ملف تانى مش بتاعى وكنت هاتسوح )

بس يا سيدى وبتروح تقعد تحت المظلة وتستنى الرخصة والموضوع دة ممكن ياخد ساعة او 2 او 3 انت وحظك
انا شوفت ناس قاعدة من الساعة 9 ولغاية 3 الا ربع ماكانوش لسة استلموا

لو عندك مطابقة بصمة (وغالبا هيبقى عندك لو بتنقل من مرور لمرور )
كدة كدة هتضيع اليوم عشان هاترجع تانى تعمل مطابقة فى المرور اللى تابع لية العربية
فعشان اليوم دة مايضيعش اونطة تعمل الأتى :-

1-تروح بدرى برضو عشان تلحق تروح المرور اللى تابع لية العربية عشان المطابقة (قبل مايقفلوا)
(المطابقة دى بترجع للمرور التابع لية العربية تدخل للموظف يفتح الملف بتاع العربية ويطابق البصمة اللى فى الملف بالبصمة اللى انت رفعتها فى المرور ويمضيلك عليها وتروح تختمها من المهندس اللى فى المرور وخلاص كدة)

2-تشترى ورق الفحص وتفحص وترفع بصمة وتخلص ورق الطفاية
3-تعمل الاستعلام الامنى (بيفتحوا الساعة 9)
4-تشترى ورق نقل الملكية وورقتين استعجال الملف من الكشك
5-لو الخزنة فاضية وعرفت تشترى نموزج 251 بالمرة يبقى مصلحة

بس ياسيدى وتييجى تانى يوم باااااشا على شباك نقل الملكية على طوول وساعتها هتنجز مصلحتك فى نفس اليوم ان شاء الله

ملحوظة :-
لو بتنقل من مرور لمرور والنمر جديدة بيرخصلك بأسمك بنفس النمر وبيطلعلك رخصة تصريح 6 شهور عقبال ما الملف ييجى من المرور بتاع العربية

[hamed2020]

والله كنت ناوي اسئل بس بعد العيد علشان ناوي اشتري اكسنت 2000 او 1999 و هشوف ال2 بعد العيد باذن الله
بس معلش انت كده قولت علي كل تفصيله عن المرور يا ريت لو تكمل الموضوع و تقولنا عن الشهر العقاري
بتروح تعمل عقد بيع مسجل ببساطه برخصه المالك ولا ايه النظام

[Vanditta]

المشاركة الأصلية كتبت بواسطة hamed2020 والله كنت ناوي اسئل بس بعد العيد علشان ناوي اشتري اكسنت 2000 او 1999 و هشوف ال2 بعد العيد باذن الله بس معلش انت كده قولت علي كل تفصيله عن المرور يا ريت لو تكمل الموضوع و تقولنا عن الشهر العقاري بتروح تعمل عقد بيع مسجل ببساطه برخصه المالك ولا ايه النظام

بتروح الشهر العقارى انت والمالك نفسة لو هتشترى بعقد بيع على طووول
لو البائع هايعملك توكيل وانت تسجل
بتروح بالتوكيل والبطاقة والرخصة لو سارية او شهادة بيانات (موجهة للشهر العقارى) لو الرخصة منتهية
وتروح تشترى عقد مسجل من بتاع التصوير وتصور البطاقة والرخصة وتدخل على الموظفة بتملالك شوية بيانات من الرخصة والبطاقة ويعد كدة تبعتك الخزنة تدفع تكاليف التسجيل
ودى بتختلف حسب النوع والموديل والسى سى
وبترجعلها تانى تملى بيانات تانى وتمضيك على العقد والدفتر الكبير اللى عندهم دة
وبعد كدة تبعتك تدفع حاجة اسمها الميكروفيلم
بترجعلها تانى بتختملك العقد وخلاص كدة

[hamed2020]

لا انا هعمل عقد مسجل
اروح انا والمالك و نخلص العقد و كده القصه خلثت بدل لفه التوكيل دي
و جزاك الله كل خير

[د/محمود عبدالمقصود]

يلااااااااااااااااااااااا ااااااااااهوي ده انا كنت ناوي اخلص في اسكودا فابيا 2002 بعد العيد كل سنه و انتم طيبين بس بعد اللي حضرتك كاتبه و الرصه المحترمه ديه بلاها عربيه يلااااااااااااااااااااااا هوي كل ده ورق و اجرائات عشان عربيه ب30 الف