استفسار ضرورى بخصوص السـواقه بدون رخصـه !!

[مروان خالد على]

السلامـ عليكم و رحمـه الله و بركـاته
لو سمحتـم انا عندى استفسـار غريب شـويـه
اولا انا لسـه مكملتـش الـ18 سنــه
و فـى اوقات كتير بخـرج بالعربيه و انا معيش رخصـه سـواقه
و بسمع كلام كتـير فى الموضوع ده
الى يقـولك لـو وقفت فى لجنـه و انت سنك مكملش الـ18 حيـاخدوا العربيه منك و يحجزوها فـى القسـم !
و الـى يقـولك حيتعملك محضـر و جلسـه و كعبـله !
و فـى الى بيقـول ان الظابط كبيـره يسحب رخصـه العربيه و ممكن كمـان تعمل معاه مصـالحـه و انت واقف و تدفعله غرامه و تـاخد العربيـه و تمشـى عادى
فـانا قـولت اسأل هنـا علشان الناس هنـا فاهمـه اكتـر
و كنت عايز اعرف
لو مـاشى بعربيه والدى مثلا
و معـايا رخصـه العربيه و بطـاقتى و بطـاقه والدى كمــان
و وقفت فى لجنـه مرور
ايـه الى ممكن يحصــل بالظبـط
بس ياريت الى يقـولى ياجمـاعه يبقـى متأكد علشان الموضوع ده مهم جدا بالنسبـه لـى
و كمـان العربيـه لسـه زيرو فى حرام انها تتسحب و تتبهدل فى القسـم و كدا
و شكـرا ليـكم مقدمـا

[Felefel Ahmed]

السلام عليكم
عموما انت ليه مفترض ان المشكله هتكون فى لجنه
ممكن واحد حمار يطلع من جانبي يخبطك (تتطلع علي القسم وهتكون انت الغلطان مهو معكش رخصه)
واحد يفرمل قدامك ........... واحد يخبطك من ورا وعربيتك تخبط ألي قدامك ..........
فيه الف حاجه تعتبر عاديه لآي شخص بس معاك هتكون مشكله كبيره

بالنسبه لموضوع اللجنه
من الأخر انت هتكون تحت رحمه الظابط
ممكن يسحبك بالعربيه ويلبسك (رعونه فى القياده , تعريض الأخرين للأضرار , بدون رخصه قياده , بدون رخصه تسيير , تحت السن , ....................)
ممكن يختارلك أي نصيبه براحته
العربيه لو اتخدت حضانه الشرطه , نصفها هيتسرق ممكن تدفع لحد يجلس جنبها وانت هتتعرض نيابه , ولو خرجت من كل ألي فات هتدفع بس غرامه حضانه للعربيه 1500 الي 2000 جنيه

من الأخر صون نفسك وصون والديك من البهدله

[ahany]

حبس من ثلاثة شهور الى ستة
وغرامة على العربية من 500 الى 1500 جم
احسن اصبر شوية وطلع الرخصة الموضوع خطر جدا
وتقبل مرورى

[مروان خالد على]

يانهار ابيض
يعنى ياجدعـان الواحد لـو نزل يـوم بالعربيه ممكن على كدا ميرجعش :D
اصل فى ناس كتير قالولى 50 جنيـه مصالحه و بتاع علشان كدا كنت بنزل مطمن شويه يعنى بقـول لو ظابط شـافنى حخلص معاه الحوار و احنا واقفين معرفش ان هى حتبقـى بهدله كدا
المشكله ان فى مشاوير الواحد بيبقى محتاج فيها العربيه ضرورى
انا كدا كدا مكنتش حنزل بيها كل يوم علشان مش كل مره ربنا حيستر و مش حقابل لجان بس قولت اسأل علشان لو نزلت بيها يوم ولا حاجه ابقى مطمن
بس شكل الموضوع كدا متكعبل

[مروان خالد على]

يا جدعـان بس فى الموضوع المثبت مكتوب ان الرخصـه بتاعت العربيه بس بتتسحب لو الى سايق معوش رخصـه و محدش جاب سيره القضيه و الحبس و الحوارات دى !؟
6 - عند ضبط المركبة يقوده شخص غير مرخص له أو كان مرخصاً له وألغيت رخصته ، وكذلك إذا ضبطت يقودها شخص سحبت أو أوقفت رخصته أو شخص مرخص له برخصة لا تجيز قيادة المركبة التى ضبط يقودها ويكون السحب لمدة لا تزيد عن تسعين يوماً ، ولمالك المركبة استرداد رخصة المركبة ما لم يثبت علمه بالواقعه .