جديد فى المنتدى وعاوز اشترى ستروين ax

[احمد عصمت محمد]

المشاركة الأصلية كتبت بواسطة mahmoudelmasry2016 نصيحة منى ابعد عن الستروين قطع غيارها مش موجودة كتير وتقيلة فى بيعها لما تيجى تشترى سيارة اركب ليك وللسوق يعنى هات حاجة تكون معروفة وقطع غيارها متوفرة كتير اسألنى انا ,,,,, انا بقالى اشهر بقلب ف موضوع السيارات ده عشان عايز اجيب ليا عربية فا ياما اتعرض عليا حاجات واقسم بالله بأقل الاسعار بس للأسف سوقها مش قد كدا وقطع غيارها مش موجودة اصلا زى من كام يوم لسه كان معروض قدامى كيا سفيا موديل 95 بسأل عالموديل ده كلهم بالاجماع قالوا اوعى تجيب الموديل ده ده قطع غياره مش موجودة خالص وصاحبها كان طالب 25 الف بس وعربية فبريكة من جوا بس للاسف بقى ,,,,,,,,,,,,,,,, كمان اتعرض عليا رينو رينبو موديل 97 وفبريكة جوا وب 25 الف بس باردو وما رضيتش اخدها شان قطع غيارها

لا اله الا الله
مع احترامي لكلامك الستروينax عربيه محترمه جدا ناعمه وسريعه وتكيفها جبار وقطع غيارها موجوده في الهرم - المعادى - صقر قريش - امبابه - عين شمس - جسر السويس واماكن كتير
وفيه صنايعيه كتير بيشتغلوا فيها

[karem_kemo3000]

الف شكر للاستاذ mahmoudelmasry2016 طبعا كلامك محل تقدير واحترام
بس زى مقال الاستاذ احمد عصمت محمد هى ليها محلات قطع غيار متخصصه فيها وميكانيكيه برده متخصصه فيها وانا ساكن فى جسر السويس ودا فيه محلات كتير وفى عين شمس قريبه برده وفى الحرفين قريبه جدا
انا اصلا كل الى معايا بالعافيه 15 الف ومفيش حاجه بالسعر دا غير العربيه دى
بس ياريت لو حد يعرف حاجه عن موضوع احسن موديل منها كان سنه كام ياريت حد يفيدنى
وشكرا للجميع

[spera516]

مع احترامي لكل الاراء
اى حد بيتكلم عن السيتروين وحش يبقى ماركبهاش ولا جربها

لان كل اللى اعرفهم ركبين سيتروين مقررين مايركبوش غيرها

والعيب الوحيد فى ال AX انها ضيقه وهى تعتبر سياره بناتي أو شبابي وليست عائليه

أما بالمقارنه بمنافسيها فى السعر ستكون الفائزه بإكتساح وتقدر تعاين العربيات اللى معروضه وتشوف الفرق فى السواقه والنعومه والثبات على الطريق يجعلها لا تقل عن سيارات فى حدود 25 الى 30 الف

بالنسبه لقطع الغيار والصنايعيه فيه ناس شغاله فيها بالتخصص فى القاهره والاسكندريه أما لو كنت فى محافظه نائيه يبقى ماتشتريهاش للسبب ده

أنا عن نفسي فى اسكندريه وركبت 3 عربيات سيتروين حتى الان وكلهم كانو ممتازين وأول مابشترى العربيه بشدها عند واحد متخصص فى السيتروين قبل ما اركبها وبعدها بتقعد معايا سنه او سنتين ماصرفش عليها مليم لحد ما ابيعها

[karem_kemo3000]

الف شكر طبعا للاستاذ spera516 ولكل الى رد عليا
وانا مع حضرتك انها عربيه محترمه وميحكمش عليها صح الا الى ركبها
عموما انا مش فارقه معايا الوسع عشان انا لسه متجوز يعتبر جديد وعندى ابن واحد سنتين فمش محتاج حاليا ان العربيه تكون واسعه
وانا من القاهره - جسر السويس يعنى جمبى الحرفيين وعين شمس والف مسكن وكل بتوع قطع الغيار فمعنديش مشكله فى النقطه دى كمان
والف شكر كمان مره لكل الاعضاء

[karem_kemo3000]

بس انا كنت عاوز حد يفيدنى فى موضوع الموديل دا ايه احسن موديل للعربيه دى ولا مش فارق