يوم 25 يناير 2012 ..ليه تنزل الشارع وليه تقعد في البيت؟

[احمد ابوفايد]

ليه تنزل الشارع ؟ على سبيل المثال و ليس الحصر




علشان تتخلص من شعور الجبن و الخوف الذى يرافقنا كلما كتمنا كلمة اعتراض داخلنا

علشان االنظام وصل فساده و ظلمه لدرجة يستحيل السكوت عليها و البلد بتنهار فلازم النظام يحس ان الشعب لسه فيه الروح و انه ممكن يغيره لو محققش مطالبه


علشان هرم الفساد لازم يتهد من قمته و كل الكلام اللى بيتقال ان الناس نفسها بقت فاسدة كلام غير سليم لو الناس لقت قيادة واعية و نظام محترم بيديها حقوقها و اتوفر لها عدل و رحمة هتلاقى الناس اللى كانت فاسدة ناس محترمة و قادرة على البناء


علشان مهما كانت تحفظاتنا على المطالب و التنظيم و كل الاشياء المتعلقة باليوم ده الا ان ده الفعل الايجابى المتاح قدامنا دلوقتى و هو ان الناس تنزل الشارع تتظاهر سلميا و تعبر عن رايها بدون تخريب لاننا لو قعدنا كلنا مستنيين الثورة العفوية و الاجندة الواضحة و الترتيبات المتستفة هنفضل مستنيين كتير قوى و اللى مش عاجبه يوم 25 يناير اقصى شىء المفروض يعمله هو انه يقف على الحياد و لكن اللى هيقف على الحياد ده لو حصلت ثورة فعلا و بدأت تنجح هيزل الشارع زى باقى الناس


علشان تجربة تونس اثبتت ان التغيير ممكن الحدوث و كل الكلام اللى بيتقال اننا مختلفين عنهم كلام فاضى..القمع و النظام الفاسد هو هو و احنا شعبنا مش اقل عراقة و قوة من الشعب التونسى و اللى يثبت الكلام ده اسلوب الترضية اللى بيتبعه النظام مع الشعب من ساعة الثورة التونسية و ده معناه ان النظام مرعوب من الناس و بيحاول يتجنب غضبهم بأى شكل..يعنى الناس مصدر قوة بيتعمل لهم حساب و ده لمجرد التنويه عن النزول للشارع بس فماذا ستكون النتيجة عند النزول للشارع بالفعل

علشان الثورة لازم اللى يقوم بيها الطبقة الواعية المستنيرة من الشعب بدل ما نستنى لحظة انفجار تخرج فيها كل الطبقات المطحونة الجائعة لتقوم بثورة عشوائية فوضويه او كما يطلقون عليها ثورة الرعاع..اذا حدث هذا الانفجار فلن يكون هناك احد فائز على الاطلاق..سيخسر الجميع بلا استثناء حتى القائمين بالثورة انفسهم..لذلك يجب ان تاخذ الطبقة الواعية المثقفة زمام المبادرة و تنزل فتيل الثورة و توجهها فى الاتجاه الصحيح


علشان نتخلص من نظام الشرطة اللى بيعذب الناس و بيهين كرامتهم كل يوم و ما بيوفرش الامن الا للنظام لكن اخر حاجة يفكر فيها هو امن المواطن العادى


علشان نتخلص من رئيس فاسد عايز يورث البلد لأبنه كأن الشعب ده كرسى او شقة تمليك تورث بمنتهى البساطة


علشان نعمل انتخابات ديمقراطية بدون تزوير يختار فيها الشعب اللى هو عايزه و فيه كوادر كتير ممكن تتولى الحكومة فى مصر و لكن معظمها مهمشة او هاربة خارج البلد من النظام الفاسد الغير كفء الذى يغتال كل الكفاءات الامينة التى لا تتناغم مع منظومة الفساد القائمة


علشان ولادك لما يكبروا يلاقوا بلد محترم يعيشوا فيه


علشان ثروات البلد و خيرها يوصل لكل اهلها


علشان تشعر بالكرامة و الحرية فعلا مش حرية التعبير المزعومة المقترنة بالاعتقال اذا لم يعجب النظام كلامك و حرية تعبيرك


علشان تبطل تحس ان لقمة العيش اللى بتاكلها متغمسة بالذل و المهانة و كسرة النفس


علشان المواطن المصرى ترجع له قيمته و الجنسية المصرية تبقى هى الجنسية المحترمة اللى بتفخر بيها بدل ما تروح تدور على جنسية اجنبية توفر لك الحماية فى بلدك

علشان البلد دى بلدنا احنا و احنا اولى بيها.

ليه تقعد فى البيت؟ على سبيل المثال و ليس الحصر


علشان الدعوة لليوم ده مش واضحة المعالم و المطالب بتاعته مش قوية و التنظيم داخل فيه ناس كتير و عشوائى و بالتالى هيفشل..شكل المنظمين هواة و ماعندهومش خطة و مش عارفين هما عايزين ايه بالظبط

علشان مافيش ثورة بيتم التخطيط لها مسبقا ..الثورة لازم تكون عفوية...و ده هيبقى يوم مظاهرات هيعدى و هيخلص مش هينوبنا منه غير البهدلة بدون نتيجة زيه زى كل المظاهرات اللى فاتت

علشان كل قوى المعارضة بتقفز على الحدث و تستغله لمصالحها و اجنداتها رغم ان الدعوة اساسا من شباب الفيسبوك

علشان الفساد و الفقر و الجهل استشرى فى المجتمع و الشعب لمرحلة لا يصلح معها العلاج و لكن يجب إستئصال عدة اجيال متتابعة او نسف هذا الشعب تماما و البداية من جديد

علشان مافيش فايدة فى الشعب ده..معظم الناس اللى بتدعو للثورة ناس عندها وعى و ظروفهم نوعا ما كويسة و بيدعوا للثورة دى عشان الطبقات الاقل المطحونة و عايزين يقودوا حركة التغيير عشان الناس المطحونة اللى تحت الصفر تطلع من جحورها و تمشى ورا قيادتهم الواعية المستنيرة فى طريق التغيير...لكن اللى الطبقة الواعية دى ما تعرفهوش ان الطبقات المطحونة هتطيرهم هم فى اول شرارة للثورة لانهم من وجهة نظرهم زيهم زى الطبقة الغنية اللى واكلة البلد والعة..الناس المطحونة اللى تحت الصفر وصلت لدرجة من الجهل و الفقر و الفساد ايضا خلاها قنبلة موقوتة غير قابلة للتوجيه و للأسف دى بقت أغلبية الشعب ..الشعب فيه اغلبية بايظة من فوق الهرم الاجتماعى و من تحته..و الناس اللى فى الوسط اللى عايزين يغيروا دول مش عارفين انهم هما اللى دخلاء على النظام و النظام اقوى منهم بكتير

علشان احنا كشعب فينا ناس زبالة كتير و بالتالى زحمة التظاهر هيدخل فيها الحرامية و البلطجية و من غير ما تحتاج الحكومة تدسهم و لا حاجة هما هيدخلوا فى الوسط يقلبوا رزقهم و لو الثورة استمرت زى تونس هنتحول لحالة من الفوضى و النهب و البلطجة و عدم الامان و هو ده هيبقى البديل عن للنظام الفاسد الموجود دلوقتى و بالتالى نبقى استبدلنا السىء بالأسوء ..لأن زى ما قلنا...فى وسطنا ناس زبالة كتير

علشان حتى لو الثورة نجحت و طيرت النظام القائم..مافيش اى بدائل على الساحة ينفع نجيبها مكان اللى موجودين..المعارضة بجميع طوائفها و اتجاهاتها بلا إستثناء كسيحة و ينقصها النضج و مليئة بالخلافات الداخلية..احنا لما نعمل ثورة لازم نبقى عارفين احنا بنعمل ثورة عشان ايه بالظبط..مش رايحين نعمل ثورة نشيل فيها الحاكم و بعدين نشوف هنعمل ايه و ماحدش يقول ديمقراطية لان الشعب الجاهل الغير الواعى اللى ما بيعرفش يفك الخط لسه مش مؤهل للديمقراطية...و حتى لو ضمنا انتخابات نزيهة بمراقبة دولية بدون تزوير الناخب المصرى هيبيع صوته بوجبة و بخمسين جنيه بمنتهى السعادة

علشان البلد دى ما بقتش بلدنا خلاص..بدل ما تحاول تنقذ بلد حالتها ميئوس منها..حاول تنقذ نفسك بالخروج منها فى اول فرصة.

[احمد على 1999]

25 يناير 2011 و لا 25 يناير 2012 ؟

[احمد ابوفايد]

ياباشا 2011 او 2012 هيا هياها.. ده بالعكس انا حاسس ان احنا يوم 25 يناير 2011 كانت خناقة وانفضت وكل واحد راح لحاله.. والرجالة زي ما كانوا بيحكموا من بره برضه لسه بيحكموا من جوه..

[nktis]

[خميس حسن]