قيادة الفيرنا الاوتوماتك وصيانتها وبعض اسعار قطع الغيار وخبرة قيادة

[ashussein]

السلام عليك ورحمه لله وبركاته وكل عام وانتم بخير
انقل إليكم تجربتي عن قيادة سيارتي الفيرنا الاوتوماتك موديل 2008

اولا هذة تجربتي الشخصية فقط وليست عن دراسة علمية وشكرا لكل من يريد التصحيح

اركب الفيرنا من 2.5 سنه (جديدة ) والحمد لله لا يوجد بها مشاكل خطيرة تستوجب التدخل وعملت التالي
متابعه تغيير الزيوت ( موتور) وفلتر الهواء واشتريت فلتر التكييف وركبته بنفسي في حدود ( 25 جنية لفلتر التكييف ) وبالنسبة للهوا كان ب 45 جنية ( السعار دي حديثة )

اشتريت 4 علب زيت موبيل اوتوماتك dot4 الواحده ب 32 جنية وده علشان غيرت زيت الفتيس واشتريت علبة زيت فرامل وسألت عن ميكانيكي محترم علشان انا محتاج اغير الاشياء دي قدامي مش زي التوكيل يعني اصلهم بيخدو العربية ومش بعرف عملو فيها اية

وتم تغيير زيت الفرامل بالكامل وزيت الفتيس اخد 3 لتر رغم ان السعة الكاملة 6.7 لتر تقريبا ولما سالت عرفت ان ده بيكون داخل الفتيس ومش بيتصفي بالكامل عن طريق الطبة واني لو عاوز اصفية لازم يتشال وش الفتيس
( وطبعا ماجتش نحيتة )

ودايما بحافظ علي الفرامل وانها تتغير دايما في معادها يعني تقريبا 4 شهور ( كانت مستهلكة او لم تكن لاني بخاف انها تشقق وللعلم كوري اصلي ) او حتي حسب الكشف عليها عند اي حد.
المهم
يعني تم تغيير زيت الباور والفتيس والفرامل والفلاتر هوا وتكييف وشديت السيور ( باور زكتينة وتكيف ..)

والحمد لله تمام وزي الفل

وكانت اسلوب قيادتي للاوتوماتك كالتالي

دايما الصبح تكون علي حرف p وشادد الهاند ادور بهدوء( كان فية قفشة في المارش بتروح وتيجي سعات وسعات يعني وإتحلت تماما لم غير البطارية في التوكيل بجافة وعملت 1130 جنية والله في توكيل قليوب مع اخر صيانة عندهم وكانت الاخيرة تماما
لاني عرفت انهم سرقوني في السعر ومن هنا رفضت اكمل صيانه عندهم وابتديت لوحدي اجيب قطع الغيار من الحرفيين كوري اصلي بالختم واغيرها بنفسي لاقيت اني كنت متبهدل زمان لما كنت بعمل الصيانة عندهم )
وبعد كده دايما امشي علي حرف ال D ولو في إشارة طويلة با اطفي الماتور وخلي الفتيس علي ال N وشد الهاند ولما تفتح ادور بسرعه وارجع للD واشيل الهاند.

ولما كانت تاخدني الجلالة وامشي علي OverDrive يعني مش بشغلة عمال علبطال وكان اخري بية 100 كيلو ( محورNA ) قبل مطلع المقطم من علي الدائري قدام صنية مدخل التجمع الخامس .. ومش بنصح حد يشد فية اكتر من كده ربنا يسترها معاكو ومعابا

وحاليا واحد اعرفة ركبها فالاقيتة بيعمي حاجه غريبة جدا !!!

اولا
لاقيتة بعد ما يدور العربية ينقل علي حرف L ويطلع ولما ال RPM يكون عالي وصوت الموتور عالي شوية ينقل بدون ما يشيل رجله من علي البنزين علي ال 2 لغاية سرعة 60 كيلو وبعد كده يرجع الدراع الي D ويسمع ويحس بالنقلة من التاني الي التالت ( غير محسوسة تقريبا ) ثم يدوس علي زرار OverDrive الي 100 كيلو وبعد كده يطفية !!! العربية بتبقي مانيول في معدل التسارع يعني الوصول للسرعة في معدل زمني قليل جدا !!!

لاقيت اني راكب عربية تانية غير اللي انا كنت راكبها يعني العربية ( وجهة نظر عن سرعتها قل كدة ب ال D بس ) ولاقيت اني زي مايكون راكب عربية مانيوال مش اوتوماتك في العزم والسرعة ومعدل التسارع

إية رأيكم ؟؟ برجاء الافادة لو في اي شيء
وشكرا

الله عليك يا بشمهندس تقرير مفيش بعد كدا وربنا يديك خيرها ويكفيك شرها وسؤال بسيط انا اول مره اعرف ان للفيرنا فلتر تكييف بس دلوقتي ممكن اعرف مكان الفلتر ده فين وهل اقدر اغيره بايدي ولا اوديه عند حد متخصص يغيرهولي ولك جزيل الشكر والتقدير واهلا بيك معانا في المنتدي وان شاء الله تكون معرفة خير اخوك احمد ممدوح فيرنا 2009 كامله مانيول

[hazem_khidr]

ربنا يباركلك فيها
لعلمك اللحركه اللي صديقك بيعملها مش بتقلل في زمن التسارع اكتر من ثانيه او اتنين علي الاكثر
يعني مش الفرق الرهيب اللي هو بيحسسك بيه دا ابدا

[manchester]

بالنسبة لفلتر التكييف ف مستر غبور شايل 3/4 من العربيات و بيبيعو ب 180 جنيه وهو بيكون خلف درج التابلوه و انت ممكن تركبو عادى وهو بيبقى قطعتين و برة التوكيل ب 100 جنيه وربنا يستر علينا من مستر حرامى

[كومندا]

ربنا يباركلك فيها
ونصيحه اخويا خليك ماشى زى ما انته متعود بلاش تعمل زى صحبك دى فذلكه وزى مقالك الاخ حازم مش هتفرق اكتر ثانيه او اتنين فى التسارع