نصيحه عن الاسبيرانزا

[amryosef]

أيه رأيكم فى الاسبيرانزا.......؟
أيه رأيكم الاسبيرانزا ولا الانوس.........؟
صحيح الاسبيرانزا قطع غيارها غاليه..........؟
أكيد أكيد كلنا زهقنا من الاسئله دى والتى قتلت بحثا وردودا وخناقات واشتباكات واراء من اللى بيعرف واللى مابيعرفش واللى فاهمين واللى مش مش فاهمين بيشجعوا واحنا معاهم
أعذرونى على العنوان بس بصراحة انا نوىت اشترى سيارة وقلت اعمل بحث علجوجل فلقيت المنتدى وطبعا سجلت وبصراحة هالنى كم المشاركات والنصايح ولكن لم اجد منتدى مشتعل مثل منتدى الاسبيرانزا تلك اللسياره التى بهرت المصريين بسعرها واخافتهم بمحل ميلادها فانطلق كل شخص يحكى تجربته الخاصه فمن رفعها الى السماء ومن انزلها الى سابع أرض فقررت أن ابحث فى الانواع الاخرى وطبعا فى الحاجات اللى اسعارها حنينه يعنى ستينات أو سبعينات ولو قسط
فخلصت من تجربتى الى الأتى
1-لايوجد سياره الا وبها عيوب مثلا الانسر يقلك هى اصلا يابانى اسم وبتتجمع فى الصين واللى يقولك دى منخفضه وسحبها ضعيف مع التكييف واللى يقولك الفيرنا دى احسن عربيه فى فئتها وسحبها جامد ويرد التانى ويقول دى عربية موت و90% من الحوادث هى الفيرنا أما الانوس عشق المصريين الاول فعربيه رخيصه اه وسعرها حلو بس شكلها قديم والتابلوه وحش موتورها ضعيف والقفل بتاع الشنطه تعبان واللى حلف واقسم ان النيو اكسنت زباله وان الفيرنا احلى منها وانه بيدورلها على بيعه و......و.......و......و.. ....و......و...
2-كل كلمه عن الاسبيرانزا تحس ان اللى بيقولها بيقولها انها قانون يعنى لو واحد الباب اللى ورا مفتحش بقت العربيه زفت واللى مركبهاش يقولك ياعم دى شبه الفوانيس الصينى واللى عاوز يركبها يقله خليك فى الفيرنا وتروح منتدى الفيرنا تلاقى مشاكل بالعبيط تخلي الواحد لو عنده عيال يطلع يأمن على نفسه بمليون جنيه ويركب الفيرنا ويتشاهد ويتكل والعزاء فى أبو غالى "أبو غالى مين"
3-اللى بيشكر فى اسبيرانزا وجابها وركبها ده أصبح واحد غير طبيعى بيتاهجم كأنه انكر وجود الشمس وازاى ده الدينامو باظ والعربيه عاوزة مساعدين من أول يوم وشويه وتحس ان فى خناقة هتحصل
4-ان لم تخنى الذاكرة أول ماالانوس نزل مصر قلك كورى ايه دى ب 38 الف بس ومضخة البنزين بايظه والتكيف بيعطل والعربيه صاجها خفيف التوكيل قال هنصلح والناس خافت بس ناس اشترت لعند ماوصلت انها اصبحت ثلث مبيعات السيارات فى مصر واصبحت العربيه دى اشهر سياره فى تاريخ مصر بعد ال 128 فلو حطينا الصينى مكانها النهارده وقلبناها بالعقل هو تفتكروا الاسبيرانزا امكاناتها اقل من الدايو او شهرتها أقل. فى الفتره دى الدايو كانت تلفزيونات بس بعدين نزلت عربيات كمان
5-خلصت عن الاسبيرانزا بالاتى
بشكل عام اعطال ومشاكل الاسبيرانزا لا تزيد ولاتقل عن مشاكل العربيات الاخرى وان كان لسه محدش فاهم فيها فده بيخلى الناس محتاره خاصة ان التوكيل مش قد كده وصدقونى الاعطال فى كل الماركات وان كا الاستخدام الشخصى بيلعب دور كبير
ال M11 افضلهم واكثرهم امانا واقلها اعطال
ال A 516 أشهرهم واكثرهم استخداما عربيه حلوة بس عفشتها ناشفه بس شيك
ال A113 عربيه صغيره وحلوة هايجى واحد ويقلك ياعم ده التابلوة وحش والتقفيل ضعيف هيكون الرد وهو حضرتك عاوز مرسيدس مثلا تنزل عربيه ب 50 الف جنيه مهو لازم السعر هيكون على حساب حاجات كتير فى الجوده والامان .
وبشكل عام الاسيبرانزا فى المستعمل سوقه لسه مش ماشى لأن السوق عندنا فى الاول بيعتمد على توافر قطع الغيار الرخيصه والاستهلاك الاقتصادى والقدرة انها تعيش 20 و30 سنه لان احنا ناس عشريين فمثلا لو بتوع فرنسا شافوا النهاردا البيجو 504 اكيد هينزهلوا من مدى التطور التكنولوجى لميكانيكية مصر وقدرتهم على الابتكار واختراع موديل شبيه طبق الاصل من البيجو 504 التى توقف انتاجها سنة 1979
طبعا هيجيلى واحد محترم ويقلى وانت كنت ركبت اصلا ولا اصلا انت بتعرف تسوق هقله بصراحة انت احرجتنى بس انا بقولك نتيجة البحث عالنت وعالمنتدى ومتابعه لمئات المواضيع والاف المشاركات وانا مبقلش رأى ليا انا بقول اللى استخلصته واللى عاوز يصدق يصدق واللى مش عاوز يشوف ويراجع المنتدى واى مكان فيه كلام عن الاسبيرانزا
7- فى رد للاخ الجميل ابو الاسعاد كنت طلبت نصيحه بخصوص ال M 11 ورد عليا رد جميل بجد وحرام ابخل بيه عالناس فانا هكتبه فى موضوع لاحق لأن الصفحة كبرت وطولت أوووى وانا بشكرة تانى على رده الرائع
8-أسف نسيت رقم 6
9- تصبحوا على خير

[mohamedgammal]

شكرا على الكلام الجميل ده و انا ان شاء الله هاشترى 516

[أحمد فاروق سيد]

الله يفتح عليك

[BASSEM BESO]

عندك حق فى كل كلمة قولتها

[mostafaelsamahy]

بجد مافيش كلام يتقال بعد اللي انت قولته

شكر و تقدير