رابطة مالكي الكيا سيفيا فيد واستفد ( صداقة - نقل خبرات )

[abu_eldahab]

السلام عليكم ورحمة الله وبركاته
بحي جميع من شارك في هذا الموضوع المثمر الي استفدت منه جدا وقريته صفحة صفحة مشاركة مشاركة
وجزاكم الله خيرا
إن شاء الله تعلى هذا الأسبوع هنضم رسميا لأصحاب السيفيا وهشتري عربية سيفيا ٢٠٠٠ بمشيئته تعالى
ودعواتكم الواحد يتعلم المشاكل بتاعتها بسرعه ويبقي فاهم فيها كويس زي الكثير من الإخوة هنا ولو فيه نصائح عامة لا تبخلوا علينا بيها

[a_s_a_o]

السلام عليكم ورحمة الله وبركاته

انا معايا كيا سيفيا 99 اوتوماتيك
بحسة فى نتشة فى الفتيس وهو بينقل خصوصا بين الاول والتانى
من التانى للتالت مفيش النتشة دى
لاكن عند سرعة 60 كيلو لما ينقل من التالث للرابع بحس بنتشة مرتين وبحس ان العربية مش عايزة تنقل برفع رجلى من على دواسة البنزين واحطها تانى تنقل عادى من غير الناتشة
وبرده فى المرشدين وانا برجع بظهر العربية بحس ان صوت الماتور بيعلى ومفيش عزم زى الاول وان العربية على السرعات الاولى يعنى من صفر ل 60 كيلوا مش بالسحب الطبيعى بتعها بعد كده بتجرى عادى
هل ممكن يكون مشكلة فى الفتيس
علما بان قياس زيت الفتيس مظبوط وجيد
او من ايه المشكل تحديدا واشيك على ايه

بانتظار ارائكم ربنا يكرمكم ويوفقكم

ولو حد عارف حد متخصص فى الموضوع ده فى محيط جسر السويس يبقى كويس
او ايه سبب المشكلة استخدامى بنزين 92

[mody9118]

رجاء من اهل الخبرة .... معروض عليا كيا سيفيا 1995 وهتبقي اول عربية ليا .. اي عيوبها ومشاكلها المتكررة ... وقطع غيارها متوفره ؟؟؟ ارجو سرعة الرد للأهمية .. ولكم جزيل الشكر

[ابو منه]

السلام عليكم عربيتي كيا شوما موديل 2000 وفيها عيب مش عارف من ايه وهو العربيه بتفصل مني وانا علي الطريق واحاول ادور تاني مش بدور صوت المارش لاكن المحرك مبينطقش وعملتها معايا كتير وكشفت عليها كمبيوتر قال كتاوت مروحه رادياتير روحت للكهربائي ضبط والمروحه تمام وبعدها عملت نفس المشكله تاني اليوم ياريت تفيدوني اعمل ايه فيها وشكرا للاعضاء جميعا

[sameh_saso]

المشاركة الأصلية كتبت بواسطة محمدامير انا معايا كيا سيفيا 99 اوتماتك الفتيس من كام يوم بقى بيفوت على الD ومشبينقل اكتر من التانى على سرعه 40 وطبعا انا مش عايز اصلح عشان موضوع التصليح للفتيس بيبقى عباره عن مسكنات اشترى الفتيس منين واعرف ازاى ان الفتيس اللى انا هشتريه نظيف ده اول حاجه فى صوت تكتكه وهى العربيه بارده والميكانيكى قالى كستبانات طبعا طقم الكستبنات ب900 جنيه من الجندى اشترى وش جديد احسن ولا اعمل ايه ؟؟؟؟

بص يا باشا موضوع العربية اتوماتيك مش هاقدر افيدك علشان انا عربيتي مانوال وممكن حد من الزملاء يفيدك اما بخصوص تغيير الكستبنات متغيرهاش ولا تيجي جمبها لا معظم عربيات السيفيا في موضوع التكته ساعة تسخين العربية لكن بعد خمس دقائق بيروح الصوت
تحياتي