ماهو اليوم الذى تعطلت فية سيارتك ولن تنساه؟

[سمير الحلوانى]

ptmnlo123per179

السلام عليكم ورحمة الله وبركاتة

ماهو اليوم الذى تعطلت فية سيارتك ولن تنساه؟

أحبائى أكيد معظمنا عطلت بية العربية فى يوم ودة بيحصل عادى

لكن اللى مش عادى هو دة اللى عايزين نعرفة من سيادتك

الموقف بيكون سخيف جداً فى وقتها وممكن يكون مفيد بعدها

بتلاشيك بعض الأخطاء أو تعلم بعض التصرفات وقد يكون مضحك بعدها

إللى هنعرفة منكم ممكن يكون تسلية حكايات

وممكن يكون نصيحة من تصرفك

أو معلومة فى التصرف الصحيح أوتحذير من تصرف خطأ !!

أرجو أن لايكون الموضوع مكرر أوسخيف شكراً للمنتدى الجميل

مصمم جرافيــك

[حازم شاهين]

أنا عندى يومين
الأول
كان معايا جولف 2 و كان عندى تسريب فى حاجه إسمها بزازة البنزين كانت مشروخة ، كمان كان عندى سلوك البوجيهات بتهرب ساعات .
المهم كنت بتمشى أناوالمدادمو بنتى وكانت لسه مولودة فجأةلقيت كلاللمبات إللى فى التبلوه بتنور و صوت إنذار الزيت رحت ركنت على جنب وطافى العربية و أول ما فتحت الكبوت لقيت نار هبت فى وشى .
الناس كانت إتلمت حوليا و الشباب حاولو يوقفو عربيات يجيبومنها طفايات لكن أن مستنتش و رحت جيبت الطفاية من شنطة العربية و فكيت برشامها و فضيتها على الموتور و كل ده مكانش أى حد من اللى ماشين فى الشارع طلع ضفايته علشان يساعدنى .
الحكاية دى أخدت أقل من نص دقيقة لكن كان نتيجيتها تغيركل ما هو ليس معدن بمنطقة الموتور زى كل السلوك و الخراطيم و فلتر الزيتو البزازة المشروخة سبب البلاوى وسلوك البوجيهات و سلك دواسةالبنزين كمان و البوجيهات بالمرة لكن الحمد لله وش السيلندر و الجوانات محصلهاش حاجه .

تانى مرة عطلت العربية و كنت مرعوب كنت راجع من القاهرة لبورسعيد الساعة 11 باليل كده وأول ما وصلت للبوابة اللى بعد العاشر لقيت مؤشر الحرارة ضرب فى السما ركنت عند البوابة و طبعا كانت ونس و كشفت على الميه لقيت مفيش ولا نقطة رحت مزود ميه من عندى بصيت لقيت فيه ميه نازله من تحت العربية أتارى كانت طلمبة الميه بتسرب بس سرسوب يكاد يكون نقطة نقطة .

المهم بعج فترة حيرة قررت إنى أكمل لغاية بورسعيد بالحالة دى بعد ما جمعت جركنين و تلات زجاجات ميه خلتهم معايا إحتياطى .

و إتكلت على الله أمشى حوالى تلت ساعة و بعدين ألافى المؤشر هيبتدى يعلا أقوم نازل مزود الميه و أمشى تانى و قى الحكاية دى وقفن حوالى خمس مرات طبعا الدنيا كانت هس هس و فين و فين لما تعدى عربية و مرة طلعلى واحد من حيث لا أدرى قرب إسماعيلية كده أنا سألته عن صنايعى فى المنطقة قالى روح بلدك أحسن محدش هيسأل فيك دلوقتى و بعدين قالى هات جنيه بقى إديتهولوا ومشى (حاجه ترعب .... صح؟)
و فى مرة منهم وقفت فى بنزينة مقفولة أزود المية و املا الجراكن إللى نعايا قام وقفلى سواق مقطورة و كان قمة فى الزوق بصراحة و إدانى جيركن تانى من عنده و قالى بدام بتقدر تمشى تلت ساعة الأحسن تزود الميه كل ربع ساعة و ربنا معاك و فضلت لغاية ما وصلت تحت البيت الساعة 3 الفجر و أا بتشاهد على روحى و بحمد ربنا إنه سترها معايا .

[AHMEDCAR]

فى مره كنت فى الحسين الساعه 2 الفجر فى عز الشتاء و كان معايا سكودا فليشيا

و اذ بها فجاءه قطعت بنزين طيب ازاى و انا لسه مفولها

المهم فتحت الكبوت و اتاكد الاول ان دايره الكهرباء شغاله كويس و بعد كده مشيت وراء دايره البنزين لقيتها شغاله تمام بس بتيجى عند فيلتر تنقيه الهواء من البنزين ( ده غير فيلتر البنزين ) و تقف عرفت ان الاستاذ مسدود المهم ماكنش كعايا عده خاله و قفت سواق تاكى و اخدت منه بنسه و فكيت الفيلتر و اول ما فكيته قومت راميه فى الشارع و نيجى بقى للاهم حته قولت اكمل طريقى لحد البيت بدون فيلتر

جيت اول الخرطوم لقيته قصير جدا و مش هايوصل اعمل ايه و اجيب خرطوم زياده منين

ضربت فى دماغى فكره غريبه افتكرت ان معايا شيشه فى شنطه العربيه

قومت فاككها و و اخد الرفاس بتعها و ركبنه كوصله بين الخرطوميين و سبحان الله العربيه مشيت كويس بعد كده

[Dr. Bolbolan]

المشاركة الأصلية كتبت بواسطة AHMEDCAR فى مره كنت فى الحسين الساعه 2 الفجر فى عز الشتاء و كان معايا سكودا ضربت فى دماغى فكره غريبه افتكرت ان معايا شيشه فى شنطه العربيه قومت فاككها و و اخد الرفاس بتعها و ركبنه كوصله بين الخرطوميين و سبحان الله العربيه مشيت كويس بعد كده

عربيه صاحبة مزاج ! الحمدلله انك ما حطيتش حجرين كان زمانها ولعت ! ptmnlo123per1106
Dr. Bolbolan

[AHMEDCAR]

من جهه المزاج فهيه صحبه مزاج بحق و حقيقى لانى تانى يوم اشتريت الفيلتر و ركبته يادوبك مشيت بيها ربع ساعه و عطلت تانى

و لو ما اشيل الفيلتر تمشى هههههههههههههههههههه

و بخصوص الحجريين فدول كانوا معايا انا بس فى دماغى