صني 2013

[heba_hasan]

المشاركة الأصلية كتبت بواسطة dodyam بالنسبة لان حضرتك تشترى اوكتافيا فطبعا عربية جميلة بس مستعمل انصحك تبعدى عنه و بالطبع السيراتو عربية منتشرة و كورى آه بس مفيهاش وسائل أمان و واطية على الأرض انا شخصيا ما عجبتنيش هتلاقى كلام كتير عليها فى المنتديات ان فيها حدفة شمال كل ده خلانى ابعد عنها واضح ان حضرتك فى نفس حيرتى قبل ما كنت اشترى العربية هأسأل حضرتك سؤال حضرتك احتياجك ايه من العربية أنا هأفترض انه نفس احتياجى و هو عربية عائلية و موفرة للبنزين و واسعة و فيها وسائل امان وخدمة ما بعد البيع تكون جيدة أنا كنت بأدور من رنج سعر 80 حتى 115 تقريبا فعجبنى اللوجان الأوتوماتيك بـ 80 الف و هى واسعة و عالية عن الأرض و الصنى أوسع و عالية عن الارض برضه خاصة ان كان عندى عقدة من الموضوع ده بسبب اللانوس لكن اللوجان قطع غيارها غالية و مفيش فيها ABS للفرامل لكن فيها مالتى فنكشن عجبنى برضه الكيا الريو بس لما شوفتها فى الوكيل اوبشنها مش كتير و أغلى فى السعر و ضيقة و تقفيلها معجبنيش و الاكسنت الجديدة شكلها شبابى زيادة عن اللازم و مفيش فيها وسائل أمان و أغلى و ضيقة عن الصنى حتى روحت شوفت الأوبترا كمان ما عجبتنيش نيجى لرأيى فى النيو صنى و السعر على فكرة لو حضرتك مش مستعجلة و محتاجة المالتى فنكشن زى اللوجان ممكن تستنى الفئة الأعلى من الصنى بس مش أقل من شهر على ما يعلنوا عنها و فيها كمان جنوط سبور و عدادات ليد وشوية حاجات تانية سعرها تقريبا هيبقى من 113 الى 116 الف أما العربية الـ Ex فهى معايا زى الفل الحمد لله وعلى فكرة هو كان معروف من زمان ان سعرها أعلى و نيسان عملت تخفيض عليها الى 100 فعلشان كده وانا بأحجز كنت عارف ان السعر ممكن يزيد و المفروض الموزع كان بلغك بده و انتى بتحجزى لكن هى طبعا تستاهل بدليل ان ناس بتحجزها كتير لدرجة ان باب الحجز اتقفل و اتفتح مرتين والناس بتضطر تجيبها بالأوفر برايس بسعر اعلى من 8 آلاف الى 10 آلاف فحضرتك السعر زاد معاكى ألفين بس يبقى تمام أوى و هى طبعا تستساهل سعرها الحمد لله الدفعات الجديدة من بعد عيد الفطر مفيهاش مشكلة المساعدين و دى كانت فى الدفعات القديمة فى عدد صغير من العربيات مش كلها و تم تلافى المشكلة حاليا و تم تغيير البطارية الى جافة و ده معنها اهتمام من الشركة بعملائها و بشكاويهم بعد البيع الاوتوماتيك بتاعها جميل و رائع و مش بتحسى بيه لما بينقل مش زى اللوجان مثلا و تانك البنزين يمشيكى 500 كيلو وطبعا العربية واسعة جدا وده راجع لان العربية نفس طول النيسان الشكل القديم لكن مساحة الموتور بتاعها أقل و الصالون أطول واى استفسار تانى انا جاهز للتوضيح وعلى فكرة كل اللى كتبته ده رأيى الشخصى وممكن يكون مختلف مع حد بس أنا حبيت أوضح تجربتى و أنا بأدور على عربية لغاية لما ربنا كرمنى بالنيو صنى و بأنصحك بصلاة الاستخارة .

شكرًا علي رد حضرتك
بجد طمنتني بس ياريت حضرتك تشرحلي اكتر عن العربيه لان دي اول عربيه اشتريها يعني العربيه من جوا تقفلها كويس والتابلوه بتاعها شيك وبعدين العربيه موريحه في السواقة وايه أخبار الباور بتاعها عشان أنا متعلمه علي عربيه أوكتافيا وقالولي أن العربيات الأقل من كده هتتعبني في السواقة
وياريت أي إضافات من عندك مميزات أو عيوب
شكرًا لهتمام حضرتك

[dodyam]

المشاركة الأصلية كتبت بواسطة heba_hasan شكرًا علي رد حضرتك بجد طمنتني بس ياريت حضرتك تشرحلي اكتر عن العربيه لان دي اول عربيه اشتريها يعني العربيه من جوا تقفلها كويس والتابلوه بتاعها شيك وبعدين العربيه موريحه في السواقة وايه أخبار الباور بتاعها عشان أنا متعلمه علي عربيه أوكتافيا وقالولي أن العربيات الأقل من كده هتتعبني في السواقة وياريت أي إضافات من عندك مميزات أو عيوب شكرًا لهتمام حضرتك

بصى يا فندم بخصوص التقفيل طبعا هو تقفيل مصرى بس معقول لدرجة كبيرة يعنى لو خدنا فرش الكراسى و المخادع مثلا هو كويس بس لما تقارنيه بالتيدا الى هى تقفيل مكسيكى لا طبعا التيدا افضل
أما التابلوه فهو فقير قليلا بالنسبة للعربيات الكورى مثلا و حتى بالنسبة للصنى الشكل القديم يعنى مفيش عليه مساحات محفورة لو عاوزة تحطى حاجة و ما تقعش بس ما حصلتليش مشكلة معاه بالعكس انا شايفه كويس و كمان ان الابواب مفيهاش فرش جلد او قماش من وجهة نظرى ان ده عملى لانه بيسهل النضافة بالنسبة لراحة السواقة هترتاحى فيها جدا لان الكرسى ممكن يعلى و يوطى على حسب الطول وترجعى لورا براحتك بدون أى مضايقة للى قاعد ورا و تعدلى الدريكسون كمان و الباور بتاعها كهرباء يعنى سهلة حتى و هى واقفة فى موتور كهرباء بيساعدك و لو كنتى ماشية على سرعة كل ما تزودى السرعة هيتقل الدريكسيون معاكى للأمان
بالنسبة للعيوب فالكاوتش سئ و بيلم زلط كتير و تسمعى صوت تك تك وانتى ماشة و محتاج يتغير بمقاس اعرض لزيادة الثبات كمان

[adamlion]

بمنتهى الموضوعيه ان مع الراى الذى يويد الصنى تماما ولانها تمتلك وسائل وانظمة امان
لاتوجد فى هذه الفئة السعرية غير الصنى والصالون الاوسع كذلك فى فئتها ووكيل محترم.
تحياتى ادم

[b A d R]

حضرتك إستلمتي العربية ولا لأ ؟؟ .. و هل الوكيل أخرها عليكي اكتر من كدا ولا ايه ياريت توضيح ..
انا رايح بكرا إن شاء الله احجز السوبر صالون .. و خايف من تأخير ميعاد التسليم و خصوصا إنهم قالولي هنسلمك خلال شهرين قولتله شهرين بالظبط قالي و قبل شهرين كمان
فأنا حاسس إنه بيريح الزبون

انا برضه معايا اوكتافيا و هابيعها و اجيب صني