اوبل كورسا موديل 99 تكييف وباور محتاج مشوره بالله عليكوا لو سمحتم

[elmashtoly99]

ياجماعه معلش انا اسف والله بس مش لاقى حد تانى
اسال على اللى عايز اساله ده
اولا كل سنه وانتوا طيبين وبخير يارب
معروض عليا اوبل كورسا حالتها ممتازه اوى
فابريكه جوه بالكامل صالون نضيف اوى وتابلوه نضيف اوى
عامله 130 الف تقريبا ماتور 1200 وشاكمان ديفيل
مش عارف صراحه ده ما تورها الاصلى والا متغير
كل العدادات شغال وفيها فرش جلد غالى اوى
العربيه نضيفه من بره بس راشه طبعا
سالته على الحساسات والحاجات دى قاللى كله شغال ولو فى
حاجه مش شغاله هتنور فى التابلوه طبعا انا جديد فى الاوبل
والحساسات والكنترول الكهربا والحاجات دى
بس لما ركبتها حسيت بالدركسيون مش ثابت اوى فيه رجه خفيفه اوى كده
مش عارف دى من ايه بالظبط
اسف على الاطاله كل اللى انا عايزه بكل امانه ايه رايكوا فى العربيه دى
وسعرها 33 الف ايه رايكوا فى السعر
واسعار قطع الغيار ايه ظروفها وهل فى خوف من الكمبيوتر والحساسات
وانها غاليه جدا وايه اللى بيبوظها وكده
وطبعا موضوع الماتور بتاعها والا متغير
والتكييف الراجل بيقولى الكباس متشال فقط
وعايز شحن طبعا هيتكلف كام تقريبا
والف شكر ليكوا كلكوا

[MEMOO_1ST]

صباح الفل يا باشا.
اولاً بالنسبة للعربية رشة كلها برة والسقف راشش يبقى 33.000 كتير عليها مبدأياً.
موضوع الكباس الي متشال دا مش فهموا لان كل العربية دي على سير واحد والسير دا معدي على الكباس والكباس بتاعها غالي ب 3000 جنية جديد.
الموتور متغير لان ال 99 بتنزل موتور 1000 سي سي 3 سيلندر.
بالنسبة لقطع الغيار موجودة واسعارها معقولة.
ونصيحتي ليك ابعد عنها احسن.
ونصيحة اخوية الالماني بالذات ياما تركب فية حاله نضيفة ياما بلاش منه ( حاله نضيفة يعني تكون فبريكة كلها او على الاقل راشش جنبين بس مش كل العربية + تمون ناشية اقل من 100.000 كم + يكون الموتور بتاعها مش مسقط ولاعب في العربية ) لان الاوبل لو جبتها حاله نص و نص حتصرف عليها كتير علشان ترجعها زي الاول بعكس الكوري او الياباني.
وفي النهايه بالتوفيق ان شاء الله وموفق في الشراء وتحت امرك في اي استفسار.

[AbOnOrA]

مانصحش حضرتك بيها طبعاً

الاوبل انا مجربها مع صحابى كتير مصيبة فى اصلاحها ومكلفة جداً ومتشتريهاش الا وحالتها ممتازة ومعروف اصلاها وفصلها او تكشف عليها وتتاكد ان مفيهاش اى شغل
وده ينطبق على الالمانى عموماً علشان لو فيه حاجة فيها مشكلة وانت متعرفش ممكن تكرهك فى العربيه والعربيات كلها

[عبدالله منصور]

انا مع الناس المحترمة الى ردت عليك

الألمانى بشكل عام والاوبل بشكل خاص

ياتشيل حاجة نضيفة , يا تنسى الموضوع خالص