بنك مصر موتورز

[joophy]

الاخوة الفاضل اعضاء المنتدى
السلام عليكم
خطرت على بالى فكرة بسيطة ارجو من كل اعضاء المنتدى انهم يشاركونى فيها . فكرت ان فى ناس كتير بتدور على عربيات بالتقسيط وفى اللى بيلاقى بنك يقسطله وفى اللى مش بيلاقى وفيه اللى بيلاقى تقسيط ب 6% وفى اللى بيلاقى ب 10% واللى بيمضى على شيكات واللى بيمضى على كمبيالات واللى بيسيب نسخة من المفتاح للبنك او توكيل وهكذا الى اخره من كل مشاكل التقسيط والتعامل مع البنوك.
المهم مش هطول عليكو بما ان انا بأشتغل فى بنك وعندى خلفية عن موضوع التقسيط ده فأنا فكرت ان احنا ليه منعملش بنك خاص بينا ويكون للمنتدى حساب فى اى بنك الاعضاء تختاره ونختار اتنين او تلاتة يتبرعوا بالاشراف على هذا الحساب ويكون ليهم حق التوقيع والسحب منه وكل واحد فينا يساهم بقيمة مساوية لقسط السيارة اللى عاوز يشتريها ويكون كل واحد ليه دور ياخد فيه قيمة العربية كاش ويقسطها بعد كده للمنتدى بدون فوايد ولا كلام فارغ.
بأختصار الفكرة مستوحاة من فكرة الجمعية العادية اللى كلنا بنعملها مع زمايلنا فى الشغل او جيرانا وبكده هنوفر على الناس قيمة الفوايد وكل واحد هيجيب العربية اللى يقدر على قسطها بدون شروط بنكية مجحفة.
بصراحة أنا عندى تصور عام للموضوع بس طبعا محتاج اقتراحاتكم ومشاركاتكم علسان نخلى الفكرة دى حقيقة فيا ريت كل واحد موافق على الموضوع ده او يقدر يدينا اى فكرة تخلينا نحقق الحلم ده ميبخلش علينا بيها.
ولو حاسسين ان الموضوع صعب او خيالى شوية انسوا الموضوع .
شكرا ليكوا ومستنيين الردود

[منعم الكنج]

هو طبعا مش خيالى بس ممكن تشرحوا بالتبسيط شويه

[محمد التهامى]

هو فعلا فكرة جميلة بس لازم يكون فى ضمانات على كل واحد لان الثقة وحدها لا تكفى

[khaled al sharif]

والله هي الفكرة جميلة وأنا عملتها في شركات كبيره فيها مصانع وعمال وموظفين .... وكان إسمها جمعية تنمية موظفي شركة كذا .... وعملتلها لائحة مالية ونظام مالي وإداري وهي إلي الأن وبالرغم من تركي الشركة منذ العام 2003 مازالت تعمل بكفاءة ويصلني دعوات ممن إستفادوا منها سواء في تجهيز أولادهم للزواج أو لشراء السيارات أو للعلاج أو حتي لشراء الأجهزه الكهربائية والموبيلات .... بس في حالتنا هنا محتاجين دراسة الشكل القانوني لمثل ذلك المقترح حيث أنه بحكم القانون ممنوع جمع الأموال وإستثمارها إلا للبنوك أو الموسسات الإجتماعية التي تحصل علي ترخيص بذلك من وزارة الشئون الإجتماعية ... لكن مبدئيا هي فكرة قابلة للتنفيذ ومفيده جدا جدا .... وأنا تحت أمركم لو حبيتوا تتقدموا في هذا الإتجاه ... بعد إستطلاع رأي الأعضاء والإدارة طبعا لأن هذا الأمر سيكون بإسم مصر موتورز أو ممكن يتعمل بعيدا عن إسم مصر موتورز.

[joophy]

أساذ خالد
اشترك على لفتك نظرنا الى الناحية القانونية بس احنا مش هنستثمر الفلوس دى هتكون على شكل جمعية بس ليها حساب فى البنك وفى ناس ليها حق التوقيع الجماعى وليس الفردى على الحساب ده وطبعا هيكون فيه ضمانات للكل. عموما احنا ممكن نجتمع مع بعض وتدينا تصورك للموضوع ونستفيد بخبرتك. بس خلينا الاول نشوف اراء باقى الاعضاء وافكارهم