تجربتى مع نيسان صنى 2013 بعد 7000 كم

[Mahmoud Tammam85]

السلام عليكمfficeffice" />
انا الحمد لله معايا الصنى الاوتوماتيك الجديده وعامل بيها لحد دلوقتى 7000 كم واليكم ملاحظاتى :
1- للشكل:
دى طبعا ازواق بس انا عجبنى شكلها اوى وخصوصا من الامام اما من الخلف فهى مش وحشه.
2- الاتساع:
العربيه ما شاء الله بحر يعنى انا سافرت بيها مسافه 500 كيلو وكنا خمسه كبار فى العربيه وكلنا كنا مستريحين والشنطه مش عايز اقولك بحر ما شاء الله .. بس ده جه على حساب حوض الموتور فهو صغير نسبيا.
3- الارتفاع.
عاليه جدا على الارض مع الحموله الكامله ومطبات ت الزراعى تشهد على كلامى الحمد لله محكتش معايا خالص واكرر مع الحموله الكامله.
4- التكييف.
تكييف ممتاز تلاجه يعنى بس الهوايه اللى ورا مش عمليه قوى وبتاخد وقت وصوتها شويه عالى.
5- الاتزان على الطريق.
انا سافرت بيها مرتين من القاهره الى اسيوط (500 كم) والحمد لله ثابته جدا على الطريق لحد 170 بصراحه مرضيتش ازود عن كده عشان الناس اللى معايا وطريق شغلى هو الدائرى يعنى كل يوم تقريبا فى اختبارات للاتزان ما بين الغرز والفرمله الفجائيه واللذى منه .
6- استهلاك البنزين.
مقارنه بنيسان الشكل القديم فهى موفره جدا بشهادة الجميع.
7-التوكيل.
عملت صيانه الالف وال 5 الاف فى توكيل السبع بزهراء المعادى وبصراحه ناس محترمه جدا بس فى عندهم مشكله فى الوقت بيتاخروا جدا نتيجه الضغط اللى عليهم وفى غسيل العربيه متغسلهاش احسن.
8- السعر.
بأمانه الله انا فضلت 3 شهور محتار اجيب ايه بس ملاقيتش عربيه بالامكانيات دى وبالاسم ده بسعر مناسب زى الصنى 2013.
9- عوامل الامان.
ABS فيها و2 Air bags وكده كده فرامل النيسلن معروف بقوته ده طبعا بالاضافه لموضوع الاتزان اللى اتكلمنا عليه قبل كده.
10-الشكل الداخلى.
شكل التابلوه يعنى معقول كان ممكن يعملوه احسن من كده لكن باقى المميزات تشفع للشكل الداخلى (عملى يعنى مش ترفيهى) والمشكله كمان انه مفهاش USB هى CD& AUD فقط.
11- قوه الموتور.
عزمها جامد جدا و overdrive بتاعها جامد سواء مع التكييف او من غير وانا مش حاسس ان فى فرق كبير لما نزلت من 1600 سى سى الى 1500 سى سى
اما العيوب الموجوده.
انا حاسس ان الصاج بتاعها مش قوى زى القديمه حوض الموتور زى ما قلت صغير نسبيا الفوانيس بتاعتها مش بالقوه المطلوبه
.الهوايه صوتها عالى . الاوبشنز مش على المستوى المطلوب.
ده يا جماعه رأيى بكل امانه وشفافيه وبالتوفيق ان شاء الله ومتنساش ان اهم حاجه انك صلى استخاره قل ما تاخد اى قرار. مع خالص تحياتى
اخوكم فى الله
محمود تمام

[Marlborooo]

مبروووووووووووك علي العربية وربنا يحفظهالك

وان شاء الله اشوف تقريرك بعد ال500 الف كم

[Emgrand]

اخيرا تقرير كنت فين يا راجل

[sehsss]

ربنا يباركلك فيها.. عربية محترمة

[MR/E]

مبروك على العربيه وربنا يخليهالك
--
انا كنت عاوز اعرف هى تمنها فعلا 99.900 الف جنيه ولا اغلى من كده ؟
لو ب 99.900 دى اوتو ولا ايه ؟
والعربيه فعلا يبانى ولا ؟
من وجهة نظرك العربيه معمره ولا ايه