سايبا تيبا 2014 !!!

[Hisham.Elgazzar]

تم تغيير مساعد فى التوكيل بالسوستة بتاعته فى الضمان بسبب مطب
والحمدلله الناس هناك متعاونين جدا ومحترمين

منقووووول

[announcer]

دى تجربتى مع العربية والتوكيل فى صيانة الالف كيلو:
روحت التوكيل يوم الاحد وكان فى العربية مايلى:
1- خشانة فى الموتور فى الغيار الاول عامل زى صوت الديسك والاسطوانة
2- سنتر الباب اليمين الامامى علق قبل ماروح بيومين كان شغال يدوى بس من غير الريموت وكمان كان تقيل جدا
3- رشح زيت (خفيف جدا يكاد لايذكر) من عند الرشاش الاولانى ومن الخرطوم اللى طالع من وش المكنة
4- قفلت الابوات غير العاطفية

وصلت الصيانة الساعة 11 ومهندس الاستقبال سجل الملاحظات اللى فاتت كلها

الحقيقة المهندس كل ماحاجة تتعمل بييجى يقولى ...بالنسبة للخشانة قال انها بسبب ان الديبرياج واطى وعلوه شوية...فعلا الصوت راح بنسبة 90% بس مش نهائى بيظهر فى بداية التحرك بالعربية لثوانى

ظبطوا الابواب تمام

صلحوا السنتر...

بالنسبة لرشح الزيت قاللى احنا غيرنا الكوليه وركبنا واحد محمل شوية بس للاسف مغسلوش مكانه فمعرفتش رشح تانى ولا لأه بعد ما روحت البيت وكمان ماخرجتش بالعربية من ساعتها...هغسل المكنة واجرب واقول لكم

المهم غيرت زيتTotal 5w40 10.000 وفلتر ودفعت 317 جنيه 290 زيت و 27 فلتر

يتبع >>>>>>>>>>>>

يالنسبة لقطع الغيار الحقيقية جايبين منها كميات كتيرة جدا ...انا شوفت المخزن مليان لأخره ...ودى بعض اسعارها:
فلتر هوا 52
رفرف 330
زجاج خلفى (فاميه) 385
ريش مساحات 44
رادياتير 800
ديسك 275
اسطوانة 275
مساعد 440 طنبورة 330

الخلاصة :
التوكيل مقبول وان كنت شايف ان لازم يهتم بالعربية اكتر من كده..والناس محترمين وفى منتهى الذوق فى التعامل..

العربية بعد تجربة 1300 كيلو...
العربية انا شايف انها مناسبة جدا للاجواء المصرية...العربية عفيجية بمعنى الكلمة بتهرس بيها فى المطبات والحفر والنقر ومابتزعلش ...

[شريف كامل]

نرجو عمل قسم خاص للسايبا الايرانية

[Hisham.Elgazzar]

المشاركة الأصلية كتبت بواسطة شريف كامل نرجو عمل قسم خاص للسايبا الايرانية

خلاص اتعمل لها موضوع وقريبا قسم خاص للايرانى

[أيمن الروبي]

بسم الله الرحمن الرحيم
انا اسف للتأخير بسبب ظروف شغلي
انا وديت العربيه للتوكيل في 6اكتوبر يوم السبت 8مارس 2014
وكانت عامله 1950 كم بسبب سفري كتير وظروف شغلي والمسافه دي تم قطعها في 10 ايام والعيوب اللي ظهرت عدم استقرار الار بي ام علي السلانسيه واتحلت هناك والابواب تقيله في القفل بس مردتش اقولهم عليها علشان كنت مستعجل وكان في مساعد امامي شمال ضرب من والدي كان راح بيها مشوار ونزل بيها في حفره
غيرت زيت توتال 5000كم وفلتر ب 147.5ج وغيره المساعد بسوسته ببلاش بعد جدال لبعض الوقت لأن قطع الغيار مش في الضمان بس انا استعبطت عليهم وقولتلهم اني استلمتها من السواق وانا برخص كده وتم تربيط العفشه
الصراحه مكنتش مرتب اعمل في الصيانه دي بس كان اهم حاجه بالنسبالي تغيير الزيت والمساعد وقد كان
بس ناوي ان شاء الله لو ظهرت حاجه هكتبها علشان منسهاش وافضي نفسي يوم واروحلهم
وفي العموم العربيه كويسه الحمد لله جدا ومفيهاش العيوب اللي بتظهر في عربيات تانيه قبل الالف كيلو
صوت الموتور بعد 4 ار بي ام عالي شويه
اقصي سرعة مشيت بيها لحد دلوقتي 150كم بس مبقتش احب اجري كتير وكان ثباتها تمام اوي وللعلم هي دونجل خلفي وده عامل مركز ثقل في الخلف العربيه عاليه كويسه في المطبات الغبيه
ده تقرير مختصر بسبب الضغط في الشغل واي استفسار جاهز
وياريت اللي عنده العربيه دي يوطي الدبرياج شويه ودي كانت نصيحه من كارز ادماير في محلها هتلاقي فرق في السحب وراحة الموتور والفتيس وعدم التنتيش وبالتالي متضرش قواعد الموتور ويفضل يروح وييجي
وسلامي مؤقتا