لأول مرة فى مصر : خليها تصدى وموديلها يعدى .. حملة تخفيض اسعار السيارات

[الدملاوي]

المشاركة الأصلية كتبت بواسطة Injection أنا لسه داخل قارى الموضوع دلوقتى, وبصراحة مش قادر أعبر عن فرحتى بأن مواطن "مصرى" قرر يعمل حاجة ويحاول يغير من الواقع اللى حواليه, ومش هاقدر أمدح فى الحملة أكثر من اللى أتقال. بس فيه حاجة غايبة عنكوا يارجالة, دلوقتى القاهرة مثلا فيها 5 مليون عربية, العربية الواحدة ب100 ألف جنيه, والدنيا زحمة والطرق مبهدلة والمحاور مكسرة والحوادث بالعبيط, ده أنا بروح مدينة نصر الفجر فى ربع ساعة, أرجع الساعة 3 الضهر فى ساعة ونص وحرقة دم وعصبية للصبح بسبب غباء الناس وأثار الصيام عليهم. فدلوقتى لو سعر العربية بقى ب 50 ألف, الناس هتشترى, والعيلة اللى عندها عربية هيبقى عندها أثنين وتلاتة, و50% من الناس اللى مامعاهمش عربيات هيشتروا, وعدد العربيات هيزيد الى 8 مليون على أقل تقدير. حد يقدر يقولى العربيات دى هتركن فين, ولا حتى هتمشى فين فى الشارع, والزحمة اللى أساسا فى بعض المناطق ممكن تضطر تفطر فى عربيتك هيحصلها أيه, وتعداد الحوادث, والبنزين اللى غالى أصلا ومش هيكفى العربيات,ألخ. البنية التحتية للبلد بايظة أصلا, والبلد ماشية بالبركة ومصر أساسا موجودة بأعجوبة, أى تغيير هيأثر على البلد لعدم وجود مساحة لحدوثه, زى زيادة المرتبات هيحصل قدامها نقص شديد فى السلع وبالتالى السلع هتغلى, وهكذا بالنسبة لأى حاجة زى البنزين والسيارات, وموضوع الجمارك على السيارات متوقع أصلا علشان موضوع الأنخفاض فى الجمارك على السيارات الأوروبية, وكان ده التصرف الصح علشان يواجهوا الزيادة اللى هتحصل فى عدد العربيات لو أنخفاض الجمارك أتطبق ومش بعيد السنة الجاية يغلوا البنزين. أنا مش ضد الحملة ولا حاجة بالعكس, أنا نفسى حد يقوم فى البلد دى ويقول لأ, وحضرتك عملت كده وأحييك على هذا, بس البلد ماشية بالبركة, وأى تغير بيحصل بيبهدل الدنيا كلها, زى علاقة أسعار البنزين بحياتنا كلها اللى هتتغير لو سعره طلع جنيه لفوق. والسعودية مش مصر, الدنيا هناك أفضى من هنا بمراحل من ناحية التكدس, وخفض سعر العربيات مش هيأثر بصورة سلبية عندهم زى ماهيأثر هنا. وبأحيى حضرتك على الحملة ومع تمنياتى لها بالنجاح (مفيش حد أعرفه هيشترى قريب)

الحال أسوأ كثيراً مما تظن يا صديقي
هناك أسر بل واحياء وتجمعات بأكملها أفقر مما تتخيل مصر ليست القاهرة فقط
بل أن هناك داخل القاهرة من هم افقر وأفقر
الفكرة هنا هو محاولة ألتماس طريق نحو النور والحرية المسلوبة منا
نحن في أسوأ حال مرت علىتاريخنا ولابد أن نتحرك حالاً وألا المستقبل سيكون مظلم وسيكون حساب ربنا -- قبل اولادنا -- لنا عسيراً
اللهم ما بلغت اللعم فأشهد

[vr.w32i]

انا قررت اشترى عجله اتمشى بيها واركب مكروباص بقا وخلاص

[luckyman]

هو ده الكلام الصح الصح والمضبوط الله ينور عليك
فعلا ياريت نقف وقفة ضد جشع الوكلاء والموزعين واللى بيتحكموا فى السوق يمين شمال بدون حتى اى اخلاقيات وبيفرضوا علينا موديلات معينة يا اما معيبة او محدودة وباسعار غير مبررة وباهظة والمواطن المصرى بيتحرم من اخر التكنولوجيا والتنوع لدرجة بقت مهزله نفس العربية بنفس المواصفات الجوهرية وسعرها بيتراوح بين 30 او 40 الف زيادة بسبب لون اكر كروم وجنوط وفتحة سقف وكلام فارغ لا يغير فى جوهر السيارة فى شىء والمصيبة فى ناس بتدفع كما الحال مع الكيا سيراتو او الباسات اللى ممكن تلاقى نفس العربية بفرق سعر ممكن يوصل 60 الف لنفس الموديل بسبب الجنوط وفرش جلد وخامات موكيت السيارة ومهازل
فعلا ياريت نخليها تصدى والبارومة تاكلها ياريت المجتمع يتكاتف ويكون واعى بما يكفى ويمتلك ثقافة كفاية لحماية نفسة وحقوقة ومنفرضش على نفسنا موديلات محدودة فى طور التجارب زى العربيات الصينى اللى مالهاش سوق فى العالم الا فى مصر ولية لا بس تكون بسعر زهيد
ياريت يا جماعة بس مش ننضم للحمله دى خليها تصدى بس ياريت نتوقف على الاقبال على السيارات النتجة والمجمعة محليا المليئة بعيوب التصنيع وبخامات رديئة لا ترتقى ابدا بربع المستوع المطلوب والفايدة الوحيدة بتصب فى صالح التوكيل او الصانع المحلى
اضم صوتى اليك سيدى العزيز بشدة وتقبل خالص تحياتى ودمت بود

[eng_zezo]

تمام اوي يا عبدالله بيه
انا معاكو في الحملة ان شاء الله
واللهي الموضوع ده مضايق كل الناس بلا استثناء .....
احنا كنا في السعودية واحنا اسرة كبيرة ( ما شاء الله) فكان معانا التويوتا الاندكروزر كانت مستعملة ( لما كنا في 2006 كان جايبين وحدة موديل 2003.. وتقريبا دي تساوي سعر عربية تويوتا كرولا هنا ... الالندكروزر هنا محدش متخيل تمنها اصلا ... . اكيد كلكو تعرفوها وكانت مريحانا جدا وبتشلنا في السفر الطويل واجمدة جدا جدا وفي كل حاجة .. انما بقى لما جينا مصر .... صعب جدا نجيب حاجة زي اللاندكروزر كدة او فان على الالقل .. انا و والدي كنا محتارين جدا .. ولحد دلوقتي ....حتى هو فكر في التريوس الجراند .. تخيلو يا جماعة ...... بعد لاندكروزر الـ 4500 بيفكر في التريوس المعفنة 1500 ..دي مقارنة في انه منطق دي... بس الحمد لله لسة مجبش....حتا فكرنا في الجيب الليبرتي .. بس دي للأسف مش 3 صفوف كراسي... انا حتى بهزر مع والدي . وقلتلو خلينا في المكروباص الهاي ياس..اهو 4 صفوف واتكيف والعزم حديد هههههه
تخيلو .... 200 الف جنيه مش عارفين نجيب بيهم عربية كبيرة .. مع انها في السعودية تجيب برادو أو باجيرو...ويفيض كان ..... والبنزين كمان هنا .. سعر اللتر بنزين 95 بـ60 هللة تقريبا ...تخيلو .. يعني اقل من ربع تمن اللتر 92 هنا ..حراااااااااام.......ايه اللي بيحصل ده .... بجد الموضوع ده تعبنا جدا .... وانا لما كنت هناك كنت راكب كامري وده لما كنت في اعدادي و ثانوي ( لسة عيل صغير ) انما دلوقتي انا في رابعة جامعة واركب لانسر بومة..... ده في انه ملة ده ... المقارنة غيير عادلة اطلاقا.... ولما نسافر بنسافر بعربيتين .. هم وقرف ونكد ......انا معاكو ... ا اوعدك الموضوع ده ينتشر في الاسماعيلية ........ هنا المعارض شغالة ناااااااااااااار كل يووم بتباع تقريبا 5 عربيات او اكتر من كل معرض.... انا بتكلم على الياباني والاوربي زي الالماني وكدة بصورة خاصة ..طبعا الامريكي مش عليه رجل خالص لأنو مش كتير وعايز بنزين 95 .. المهم (
انا ليه مش من حقي مثلا كمواطن عادي اركب عربية كويسة ...... ليه ده دايما بيبقى من احلامنا ....ليه دايما العربيات اللي هيا من فئة السيدان الكبيرة .. زي الكامري والاكورد والافالون والكابرس واللومينا بتبقى بس موجودة صور على الكمبيوترات .....
انا هطبع كتيييييييييييييييير اوي اوي وكل عربية في السماعلية هيكون تحت المساحات فيه ورقة وفي الجوامع الكبيرة بعد الجمعة وفي الاسواق الكبيرة زي مترو .....وكل صحابي هقولهم ونوزع سوا .. لازم الموضوع ده يتخططلو وبتنفذ صح.... واسف على الاطالة .. ده بس من الكبت اللي جوايا
والسلام خير الختاام

[vr.w32i]

هو دا الشغل انا طبعت الورقه ونازل انهاردا بعد الفطار اطبعهم فى اى مطبعه وورونى بقا هيكسبو ازى