حادثة بالبومة 2013 :( .. و بالمرة رأيي فيها في الفترة اللي فاتت

[AbdElLatifJawsh]

السلام عليكم

أولاً نبدأ برأيي فيها

أنا معايا بومة هاف سبورت فيراني 2013

العربية بصراحة تحففففففة من حيث كل حاجة

ثبات و إعتمادية و شكل ووسع و تكيف و ماتور و كل حاجة

يعني لو في حد بيشاور عقله يجيبها ولا لأ .. أنا إتشقلبت في السوق قبل ما أجيبها و قعدت حوالي 3 شهور أدعبس و هي أحلى الموجودين في فئتها

و عاوز أقول كمان إن ثباتها على السرعات العالية أحسن من التيوتا كرولا الجديدة
أنا جبت بيها 180 قبل كده و كانت ثابتة ما شاء الله عليها و لو دست تاني هتجيب مش هتقول لأ

و الفرامل تحففففففففففففففففففففففف ففففففففففففففففففففففففف فففة .. أنا معايا ABS ماشي بس الـ ABS نظام مساعد للفرامل .. يعني الفرامل بتبقى عادية في الأول و أول ما الكاوتشات هتبدأ تزحف و تتزحلق الـ ABS بيخش يستلم .. الفرامل جميلة جداً جداً جداً جداً قبل مرحلة إستخدام الـ ABS و برضه تحفة لما الـ ABS بيشتغل .. و نصيحة للي هيجيبها .. متجيبهاش بدون الـ ABS أنا جايب الهاف سبورت عشانه .. لأن هو أول فئة فيها الـ ABS سيبك من الكلاسيك و الكلاسيك بجنوط و خليك في الهاف سبورت عشان الـ ABS .. ياما لمني قبل مطبات الأوتوستراد المنيلة بستين نيلة .. و لمني قبل ما كنت هشيل واحد من على الأرض و لمني قبل كذا بلوة من البلاوي اللي بنشوفها على الطرق ..

نيجي للعيوب اللي فيها

بصراحة التابلوه شكله قديم و إن كان لازال شيك .. أنا كنت لما كنت في الأجنص كنت لسة عمال أقول جوايا ( طيب ما الصني الجديدة حلوة و شكلها جديد و أرخص و فيها ABS و EBD كمان ) .. بس بمجرد ما ركبتها و شفت التابلوه البشع و مسكت بإيدي الصني و شفت تقفيلها قلتلهم هاخد اللانسر

مفيش فتحات تكيف ورا .. بس قشطة يعني عيب مقبول التكيف بتاعها بيكيف الكل

العيب اللي مضايقني أوي بقى .. الفتيس الستيب ترونيك .. قبل أي حاجة اللي بيفكر يجيب لانسر جديدة ميخافش الفتيس كويس مفهوش حاجة بس هو حاجة مرخمة عليا بس .. السحب .. مقارنة بالفتيس الـ CVVT القديم .. مش قد كده .. الفتيس الـ CVVT القديم الأوتوماتيك كان خمس سرعات .. الستيب ترونيك 4 بس .. ده بيأثر على السحب .. في واحد هيقولي طيب ما تشتغل بالمانيوال هقوله برضه الخمس سرعات بتفرق عن الأربعة .. و بعدين سر المانيوال في الدبرياج مش في الغيار وقت ما تحب .. أنت ممكن تغير في الفتيس الـ CVVT بمزاجك بسنس رجلك على دواسة البنزين .. هبقى أقولكوا إزاي في موضوع تاني .. بس هو سحبه أقل من الفتيس القديم ..

العيب التاني في الفتيس .. لو أنت بتحرق .. بصوا .. الـ 180 اللي أنا جبتها هتيجي معاك تمام بس تجيبها واحدة واحدة .. لكن مش هتيجي معاك بالحرق .. ده عيبه التاني .. لو أنت بتحرق مش هتجيب معاك سرعات عالية .. لكن لو ماشي عادي هتجيب معاك .. أنا لما بمشي هادي على طريق فيه رادارات ببقى مخنوق عشان العربية مش هتعرف تمشي بيها تحت الـ 100 .. العربية بتجيب الـ 100 من غير ما تحس .. فلازم كل شوية تشيك على العداد عشان مش تتلقط رادار و تتغرم


نيجي بقى للحادثة

مبدئياً أنا من عاشقي حزام الأمان .. مش بعرف أسوق من غيره .. حتى لو رايح مشوار صغير لازم أتحزم .. بحس و أنا لابسه إن أنا و العربية واحد .. بحس إن الكرسي و أنا قطعة واحدة .. ما علينا

كنت ماشي على طريق الأوتوستراد واخد شمالي و فاتح .. و جه واحد إبن حلال على يميني راح كاسر عليا عشان يفادي إيه الله أعلم .. فراملي مكانتش هتجيبني يا ألبس فيه أقلبه من الباب الخلفي شمال بتاعه يا أطلع على الرصيف أفاديه و ألبس أنا .. رحت طالع على الرصيف اللي في النص .. و هو مش عريض بمعنى إن الكاوتشات اليمين كانت على الطريق و الرصيف شايل العربية من النص و الكاوتشات الشمال في الهوا أو على الرصيف هم كمان مش أخدت بالي .. أنا أول ما طلعت على الرصيف بسرعتي .. مشيت حبة لقيت في عمود في وشي لو خبطت فيه هلبس نص قدماني + إيرباج هيفتح يعني العربية هتضيع و تكاليف ملهاش أول من آخر .. و برضه العمود كان أقرب من إن الفرامل تجيبني .. رحت نازل تاني من على الرصيف .. طبعاً النص اليمين اللي كان على الأرض سرعته كانت أعلى من النص الشمال اللي كان في الهوا .. راحت العربية لفت بيا يمين و فضلت عامل دريفت بيمين العربية حبة حلوين و بحاول ألمها .. حسيت إن العربية هتتقلب بيا عشان كنت بحول ألمها و أنا على وضع الـ D .. رحت جايب الفتيس على الـ N يعني خليتها على المور .. و قلت أسيبها تاخد لفتها و أهو تلف و هي معدولة أحسن ما تتقلب .. و الدركسيون في إيدي و الباور مساعدني الحمد لله ( باور العربية تحفففففففففففففة ) .. أول ما مورت العربية رسيت و راحت مكملة بضهرها .. و الحمد لله ساعتها عرفت إن مش هتقلب بس كنت ماشي بضهري بسرعة عالية لسة بعرض الطريق و بزاوية خفيفة .. خبطت في الرصيف التاني بالكاوتش اللي ورا شمال .. فرقع .. و راحت العربية لفت من الخبطة التانية و إتعدلت مع الشارع بس عشان برضه السرعة كانت لسة إلى حد ما عالية و هي بتلف الباب اللي ورا يمين إتخبط هو و العتبة بتاعته في الرصيف التاني و طلعت بيميني على الرصيف ده كمان بس نزلت من عليه ووقفت بسلام مفيش فيا خربوش بسبب حزام الحياة اللي كان ممسمرني في مكاني ..

ما بعد الحادثة
العربية ما شاء الله عليها مش بطلت و الماتور كان لسة داير .. التلفيات كلها في العجل .. الصاج سليم و حتى الإكصدامات .. الباب اللي ورا يمين و العتبة بتاعته مخبوطين .. بس الباب بيقفل و بيفتح عادي .. حلق الباب ده من تحت ناحية الكاوتش واخد خبطة بسيطة قابة ناحية الباب بس مش بتحك في الباب ( مش عارف دي كده تعتبر دواخل ولا إيه ) .. و طبعاً الجنط اللي ورا شمال متبهدل بس مش إتكسر .. هو متجرح جامد .. و العجلة دي إتعوجت .. مش عارف ده مقص ولا طنبورة ( أنا مليش لسة في الميكانيكا أوي ) و الشكمان طرفه متطبق بس علبته سليمة ..

العربية بتدور الحمد لله بسلاسة .. مفهاش أي حاجة .. الدركسيون بقى حادف شمال سنة .. و الحمد لله العربية متأمن عليها .. بس أنا عاوز حد بيفهم في التأمين عشان مش يتضحك عليا .. أنا عملت محضر في القسم إمبارح بعد الحادثة و عملت معاينة و تمام التمام و النهاردة هروح النيابة .. مش عارف بعد كده بقى هتصرف إزاي .. ياريت حد يقولي هعمل إيه بالتفصيل عشان مش إتعاملت مع الـتأمين قبل كده .. أنا مأمن تبع مصر للتأمين فرع سمير ريان .. و هل بعد ما تتصلح في التوكيل هترجع فابريكا ولا خلاص كده إتعلم عليها ؟؟ .. اللي عاوز يوصلي أنا إسمي عبداللطيف جاويش و رقمي 01111614463

[tarbook]

ربنا عافاك والحمد لله أ. عبد اللطيف وان شاء الله بسيطه
موضوع العجله الى داخله لجوه ممكن يكون شداد العجله او المقص بسيطه
الى فهمته من حضرتك ان الخبطه بتاعت الباب فى العتبه من تحت صح لو صح بيفتح العتبه من جوه وبيعدلها ومبتبقاش دواخل نهائى ده لو العتيه الى تحت والله المستعان
موضوع التامين انا معرفش عنه حاجه بصراحه
بس حمد لله على سلامتك ويحفظك ان شاء الله

[screamseko]

الحمد لله انها جت علي اد كده اقل خساير الحمد لله

[bunnybunny77]

الحمد لله انها جت علي اد كده

[AbdElLatifJawsh]

الله يسلم حضرتك و متشكر جداً

هي في خبطة في العتبة غير خبطة الحلق

بص هو الكاوتش لما خبط في الرصيف العجلة خبطت في حلق الباب من تحت فراح صاج الحلق قابب ناحية الباب .. و هو مش من تحت خالص هو من عند الورك كده ( ورك اللي راكب في الكرسي اللي جنب الخبطة ) .. و الكاوتش مش إتخبط من تحت هو يعتبر كأني كنت راجع مارش بس على سرعة عالية و رحت لابس في الرصيف في إتجاه شبه عمودي على الرصيف يعني العجلة مش إتخبطت من تحت لفوق .. إتخبطت من ورا لقدام