#1
|
||||
|
||||
الميكانيكي حمار حتي تثبت جدارته :((
يههاحكي ليكم عن تجربتي مع الميكانيكيه لمده 3 ايام وفلوس اد كده كرهتني في العربيه والي عاوز عربيه علشان ماحدش يغلط غلطتي بس.
ابتدت معايا الحكايه من اكتر من شهر واتكلمت فيها قبل كده في المنتدي الا وهي مشكله الخنئه في العربيه وقله في السحب وانا اساسا من النوع الموسوس بطبعي فتجمعت الشكوك في اتجاه الفتيس الأوتوماتيك وابتدي اول يوم من التلات ايام اني روحت لميكانيكي الفتيس الأتوماتيك الي في عين الصيرة ، وقولتله علي المشكله اساسا مافكرش انه يجرب العربيها الأول قالي روح اكشف علي الفتيس كمبيوتر الأول وتحس انه مش عاوز يشتغل اساسا قولتله طب تعرف حد اروحله ، قالي في واحد في شارع الدقي واداني العنوان روحتله الراجل سألني سؤال قبل مايعمل اي حاجة قالي هل لمبه PWR بتنور معاك وانت ماشي قولتله لا قالي يبقي كمبيوتر الفتيس مافيهوش حاجة وقالي انا ممكن اكشف واخد منك فلوس علي الفاضي وطلع معايا ركب العربيه وقالي الفتيس كويس وبينقل نقالته عادي بقوله ياباشا انا المشكله عندي مش في النقلات انا مشكلتي في الطلعه بس السحب مش زي الأول قالي دي تبقي طرمبه بنزين علاطول تعاليلي يوم الأتنين اكون جبت ونجرب واحده وعالعموم تعالي هاوديك عند ميكانيكي بتاع دايو بس قولتلوا ماشي روحت للميكانيكي ده سألني قالي حد لعب في الكاتينه قولتله لا بس انا كشفت عليها قبل كده وطلعت مظبوطه طلع جرب العربيه قالي في سخونيه تحت فرامل اليد ودي معناها ان في مشكله في علبه البيئه احنا ممكن نروح لبتاع شكمان يحط مكانها ماسورة ونجرب ولو مش كده يبقي طرمبه بنزين قولتله ماشي روحت لبتاع الشكمان وطلع علبه البيئه والماسورة الي كانت راكبه فيها كانت شكلها برده تعبان قمت مغيرها ودفعت ال 230 جنيه التمام ومشيت العربيه هي هي بالعكس صوتها علي كمان مشيت لحد مالقيت ميكانيكي تاني وحكيتله القصه من اول وجديد واني غيرت الفلاتر والبوجيهات وسلوك البوجيهات وغيرت الشكمان كله وشيلت علبه البيئه والعربيه لسه مكتومه قالي طيب ولقيته فك وش الكاتينه وفك البوجيه الي جنبها وحط فيه مفك وقالي الكاتينه مأخرة سنه قولتله اظبطها وقعد يلف الصاموله الي علي الكاتينه وشال السير وركبه تاني وقالي اطلع جرب لقيت العربيه بقت اسوء من الأول رجعتله قولتله العربيه بقت اسوء قالي يبقي تسيبهالي كده يوم علشان الموضوع ده محتاج مراجعه حجات كتير وقالي طب استني ثواني وخادني وروحنا عند كهربائي الكهربائي قعدت يراجع علي الفيوزات وقالي هاتلي مشط فيوزات وقعد يعك شويه وقالي بص بقي ياباشا انت محتاج حد بتاع كمبيوتر يبص عليها وهو هايعرف فيها ايه بالظبط قولتله تعرف حد قالي في واحد بتاع دايو ووصفلي المكان وروحتله وحكيتله تاني قالي لا ده محتاج وقت قولتله طب بص كده راجعلي علي الحساسات يمكن تلاقي حاجة قام ركب الجهاز وبعد اقل من 30 ثانيه قالي الموتور ده فيه شنبر وحش ويالتالي الباقي كله وحش قولتله ازاي دا انا لسه عامل كبس موتور والموتور كله كفائته في حدود 75% والبساتم ضغطها قريب من بعضها قالي طب استني وقام داخل جايب عداد الضغط وفك البوجيه الأولاني وقاس كبس قالي اهو بص كده قايس 10 بار قولتله ماشي ودي معناها ايه قالي لو الموتور كويس قرايته بتبقي 14 بار ولو وسط 12 بار واقل حاجة 8 بار الموتور مايشتغلش قولتله يعني العربيه عاوزة طقم شنابر قالي هاتغير طقم شنابر مع صبابات يعني بتتكلم في عمرة وهنا جاتلي الصدمه وخد 50 جنيه في 3 دقايق ومافكرش حتي انه يمكل يشوف باقي قرايات العربيه المهم انا اخدت الصدمة وروحت بعد 12 ساعه من اللف علي الميكانيكيه وروحت نمت وانا في قمه الخنئه وكان صابح عندي شغل في السويس ورحت بالعربيه وحسيت ساعتها اني راكب بطه بلدي وخلصت تانك بنزين بالكامل في المشوار علشان اعوض ضعف السحب الي في العربيه ورجعت واول مادخلت شارع الهرم لقيت العربيه السلانسيه بتاعها عمال يهيس يعلي ويوطي لوحده لحد ماالعربيه بطلت ادور العربيه مابتدورش وبعد نص ساعه من المحاولات اكتشفت اني لازم ادورها والحقها ببنزين علشان تدور واول ماشيل رجلي من علي البنزين العربيه تبطل قولت كملت وطبعا عرفت من خلال التخمين والخبرة من موضوعات المنتدي هنا ان دي اكيد مشكله في سينسور الأيدل قعدت افكه وانظفه مرة يظبط وتدور العربيه واول ماتحرك تبطل ولك ان تتخيل ان ده يحصل وفي شارع الهرم وفي يوم حد وفي عربيه اوتماتيك مابتدورش غير علي N نحس انا عارف بس هاعمل ايه المهم اعتمدت علي الله ثم علي احتمال الناس الي سايقه جنبي علي مراعه الظروف ولااسف ماحدش بيستحمل حد واول مالعربيه تبطل تلاقي الشتايم نازله ترف والكلاكسات شغاله علي ودنه مع العلم اني واحد حارة اقصي اليمين ومشغل انتظار ولاحياه لمن تنادي المهم فضلت كده مابين بنزين وفرامل و موور ومارش لمده ساعه لحد ماوصلت البيت وابتديت رحله البحث عن الحساس لحد ما بالصدفه لقيت ميكانيكي بسأله علي حد بتاع قطع غيار فقالي انت عاوز ايه قولتله عاوزة ده قالي انا عندي استيراد وعامل 100 جنيه قولتله هات وبالمرة قولت اساله علي العربيه قالي هاتهالي روحت ركبت الحساس ورجعتله وجرب العربيه قالي بس ياباشا الي عندك ده مش موتور الموتور بسم الله ماشاء الله بيقسم تقسيم 100 100 المشكله دي ياباشا من الفتيس هو الفتيس ورجت تاني لأول الحلقه المفقوده وروحت وجه تالت يوم كنت الصبح في شغل في 6 اكتوبر وبصراحه ماكنتش مستحمل مش قادر ياجدعان العربيه بعد ماخد مطب وعاوز اطلع مافيش حتي لو علي الكيك دون ولاحياه لمن تنادي لحد ماانا بقيت زهقان للناس الي واريا وعازرهم بصراحه خلصت شغلي ورجعت تاني للميكانيكي بتاع اول يوم الي هو متخصص في دايو بس قولتله ابوس ايدك خد الي انت عاوزة بس اعرفلي العربيه دي فيها ايه قالي انت كده محتاج تدخل جراحي احنا هانفك نشوف الكاتينه ولقيته بيعمل حاجات غير الي البيه الي مفروض ظبطها قبل كده لقيته فك العجله الي جنب الكاتينه وفك حاجات كتير اوي وفي الأخر خالص شالي السير ولا فك بوجيه ولا حط مفك ولا الهباب الي التاني عمله ده وقالي تعالي شايف العلامه دي والعلامه دي قولتله اه قالي شايف بينهم فرق اده ايه قولتله حوالي 3 سنون من الترس قالي انا عاوز اعرف العربيه دي كانت بتدور وتمشي ازاي وقعد يظبطها مع ترس كمان تحت كده وقالي اطلع جرب العربيه وانا مش هاطلع معاك ولو لقيتها زي ماهيا امشي ومش عاوز منك فلوس ركبت العربيه ياجماعه وعنيكوا ماتشوف الا النور سنه بنزين ووالعربيه تطير واكبس تطير قولت لا انا مش مصدق انا الدايري اجرب اديها ال 100 بتيجي هوا ورجعتله تاني قوتله الله يباركلك في عيالك يا اخي وروحت وانا راجع في الطريق رجعت بالسيناريو الي حصل ان فعلا ممكن تكون الكاتينه كانت ماخرة سنه واحده والأستاذ الي لعب فيها اول يوم بدل مايكحلها عماها وبدل مايظبطها اخرها اكتر والأستاذ التاني الي كان بيقولي انت عاوز عمرة مش عارف اقوله ايه انا طولت عليكم اوي بس انا حسيت اني يمكن كلامي ده يفيد حد ومايتعملش فيه الي اتعمل فيها وتحياتي لكل اعضاء ومشرفين المنتدي الي بستفيد منهم كتير اوي وخلوني من جاهل الي علي الاقل واحد عنده شويه خبرة صغيرة تقبلوا تحياتي جميعا م. محمود |
#2
|
||||
|
||||
رد: الميكانيكي حمار حتي تثبت جدارته :((
ربنا يباركلك وفعلا البني ادم لما يبقي فاهم في شغلتة بيريح وبيوفير في الوقت والفلوس حتي لو كان اغلي صنايعي في مصر - وياريت الناس اللي ملهاش في الشغلانة ميشتغلوهاش
__________________
فى كل شارع فى بلادى صوت الحريه بينادى Ashraf Kerima
|
#3
|
|||
|
|||
رد: الميكانيكي حمار حتي تثبت جدارته :((
شكرا على الموضوع المفيد
اللي يغيظ بقى ان الميكانيكي من دول يبقى تعباااان وتلاقيه عامل نفسه معلم ومتعرفش تتكلم معاه واللي يغيظ اكتر انه مبيبقاش عارف العيب فين وبيفتي |
#4
|
||||
|
||||
رد: الميكانيكي حمار حتي تثبت جدارته :((
شكرا يا باشا وربنا يباركلك فيها ويكفيك شرها وشر الغشاشين
|
#5
|
||||
|
||||
رد: الميكانيكي حمار حتي تثبت جدارته :((
الحمد لله انك عرفت العيب فين اخيرا .. الميكانيكية احيانا يودى الواحد البحر و يرجعه عطشان
|
|
|