اسئله المبتدئين ..عفوا ممنوع الفتى :)))

[Ahmed AlGamal]

المشاركة الأصلية كتبت بواسطة مهند سالم لا ده ولا ده، الاثنين مجانبين للصواب. أولا مش مهم حضرتك طلعت الكوبري على أنهي غيار. ثانيا: في نزول الكباري يستحسن البقاء على الغيار (وطبعا يكون غيار مناسب لسرعة العربية)، يعني لو هأنزل على عشرين يبقى هأفضل معشق الثاني وهكذا، يعني لا أمور العربية ولا أدوس دبرياج، بل بأسيب العربية تنزل وهي واخدة الغيار المناسب لسرعتها، طيب ليه؟ لأن في حالة المور (أو الضغط على الدبرياج) بيتم فصل التروس، وبيبقى العجل حر تماما، وده بيدي دفعة للعربية وبيصعب التحكم فيها، وبيبطأ فاعلية الفرامل. أما في حالة التعشيق التروس مع الفرامل بتساعد في زيادة التحكم وتقليل مسافة الفرملة. وده بينطبق على أي فرامل، يعني لما حضرتك تحب تفرمل العربية ما تجبش دبرياج الأول بالعكس حضرتك بتسيب العربية واخدة الغيار بتاعها عادي خالص وتشيل رجل من على البنزين وتدوس فرامل وقبل ما العربية تقف تبقى تدوس دبرياج، يعني الدبرياج ده آخر مرحلة عشان العربية ما تبطلش بس، وعشان بعد كدة تديها الغيار المناسب للسرعة الجديدة بعد الفرملة. أرجو أكون أوضحت الفكرة ، وشكرا

و بعدين بقىىىىىىى انتو هتلخبطونا ليه ... انا اعرف انه لما اجي ادوس فرامل لازم افصل الماتور عن العجل بالدبرياج سواء هديها او هوقفها لان لو ما دوستش دبرياج هيبقى كاني بحاول اوقف ترس الماتور نفسه و بعاند معاه و اظن ده ليه اضراره كمان بيقلل من كفاءة عمل الفرامل كاني بحاول اهدي العربية و مع ذلك الماتور عمال يديها قوة دفع

المشاركة الأصلية كتبت بواسطة CARDIO برضه بحب ااكد دوسه الدبرياج الى مع الفرامل لما بكون حوقف العربيه دى علشان العربيه ما تبطلش منى لكن مش اجبارى زى دوسه الدبرياج اللى مع الغيار لانى مش حعرف اغير اصلا.. لكن فى حاله الفرامل هى شغاله للاخر حتى من غير دبرياج و الله الموفق

برضه الله انتو كده هتخلوني اشك في المدرب اللي بيعلمني

المشاركة الأصلية كتبت بواسطة hyundai2005 الدبرياج بيكون لابد مع الفرامل في حاله التوقف النهائي فقط لاغير او للنزول من نقله اعلي لاخري اقل اما لو العربيه ماشيه وعايزه تهدي يبقي تدوسي فرامل بدون دبرياج نهائي وذلك لعدم وضع حمل زائد علي الدبرياج مما يؤدي لتأكل الاسطوانه

ايوا بس انا لما ادوس فرامل و العجل متوصل بالموتور انا متخيلها كاني بحاول اكسر ترس الموتور

المشاركة الأصلية كتبت بواسطة eng_ahmed_90210 الفتيس علي المحايد مع الفرامل احسن لان رجل حضرتك ممكن تتشال من علي الدبرياج بالخطأ ساعتها العربيه هتتطفي و هتتنطر لقدام و ممكن تتسب في حادث ... بتحصل مع افضل السائقين مع التوتر و كمان الدبرياج بيأثر علي الرجل الشمال علي المدي الطويل

اصلا المنزل ده بيبقى موقف خاص و الكل منتبه بس حتى لو الدبرياج فلت مني ايه اللي يخلي العربية تبطل

انا عندي شوية قواعد عايز اتاكد منها معاكو

انا اعرف انه طالما هدي امر للعربية يبقى معملش عكسه في نفس الوقت

يعني لما ادوس فرامل يستحيل افضل دايس بنزين الا لو مجنون

نفس المعنى لما ادوس فرامل و اسيب المتور موصل بالعجل عمال يشغلها و يعاندني

اللي شاكك فيها بقى " هل حرام شرعا ان انا ادوس بنزين و انا لسه ما شيلتش رجلي خالص من على الدبرياج "

انا متاكد انه حرام ادوس بنزين و انا دايس للاخر دبرياج لان ده بياكل الدبرياج اكل

بس كتير بيقولو انه المفروض ابتدي اشعر بنزين و انا بسيب الدبرياج بالتدريج بتشيل و تحط ( زي فيلم بلبل حيران شالو و حطو عليكي يا بعيدة)

[amir elgamal]

المشاركة الأصلية كتبت بواسطة galal17841 الاخوة الاعزاء خبراء مصر موتورز اتقدم لكم بجزيل الشكر ولكل من ساهم بمعلوماته القيمة في هذا الموضوع الاكثر من رائع لقد تعلمنا منكم الكثير وزادت ثقتنا في انفسنا بفضلكم:ff5a34af6efe f0e643e ونظرا لكل هذا الكم الهائل من المعلومات في هذا الموضوع الرائع فقد قمت بقراءة الموضوع مرتين وفي المرة الثانية قمت بتجميع المشاركات التي بها معلومات وأصبحت ككتيب ارشادات يستفيد منه كل مبتدئ مثلي الملف موجود على هذا الرابط اسئلة المبتدئين.zip واذا اراد اى شخص التعديل عليه او اعاده ترتيبه فله مطلق الحرية في ذلك

ما شاء الله مجهود رائع بجد ربنا يبارك فيك

[amir elgamal]

فى حاله لو الواحد هيهدى فقط يصح انك تدوس فرامل وهيه واخده غيار مافيش مشكله لكن لو دوست فرامل ولقيت العربيه سرعتها بتقل عن الغيار الى هيه واخداه لازم تنزل الغيار يعنى لو انت مديها الرابع ودات نتهدى ولقيت عداد السرعه وصل 40 مثلا ده خطر جدا على الموتور ولازم تنزل الغيار فورا

[3bd0]

المشاركة الأصلية كتبت بواسطة Ahmed AlGamal و بعدين بقىىىىىىى انتو هتلخبطونا ليه ... انا اعرف انه لما اجي ادوس فرامل لازم افصل الماتور عن العجل بالدبرياج سواء هديها او هوقفها لان لو ما دوستش دبرياج هيبقى كاني بحاول اوقف ترس الماتور نفسه و بعاند معاه و اظن ده ليه اضراره كمان بيقلل من كفاءة عمل الفرامل كاني بحاول اهدي العربية و مع ذلك الماتور عمال يديها قوة دفع برضه الله انتو كده هتخلوني اشك في المدرب اللي بيعلمني ايوا بس انا لما ادوس فرامل و العجل متوصل بالموتور انا متخيلها كاني بحاول اكسر ترس الموتور اصلا المنزل ده بيبقى موقف خاص و الكل منتبه بس حتى لو الدبرياج فلت مني ايه اللي يخلي العربية تبطل انا عندي شوية قواعد عايز اتاكد منها معاكو انا اعرف انه طالما هدي امر للعربية يبقى معملش عكسه في نفس الوقت يعني لما ادوس فرامل يستحيل افضل دايس بنزين الا لو مجنون نفس المعنى لما ادوس فرامل و اسيب المتور موصل بالعجل عمال يشغلها و يعاندني اللي شاكك فيها بقى " هل حرام شرعا ان انا ادوس بنزين و انا لسه ما شيلتش رجلي خالص من على الدبرياج " انا متاكد انه حرام ادوس بنزين و انا دايس للاخر دبرياج لان ده بياكل الدبرياج اكل بس كتير بيقولو انه المفروض ابتدي اشعر بنزين و انا بسيب الدبرياج بالتدريج بتشيل و تحط ( زي فيلم بلبل حيران شالو و حطو عليكي يا بعيدة)

بص يا باشا
انا عارف ان انتا بتحب تفهم السبب الميكانيكي ورا اي حاجة بتعملها، فانا هاحاول اشرحلك على قد علمي

دلوقتي سؤالك عبارة عن جزئين، استخدام الدبرياج وانتا بتهدي سرعتك، واستخدام الدبرياج وانتا بتزود سرعتك.


أولا: استخدام الدبرياج وانتا بتهدي:
انتا عارف طبعا ان وظيفة الدبرياج انو يفصل العجل عن الماتور، فاالماتور يبقى حر، فتقدر تديلو الترس (الغيار) الانسب ليه
لو افترضنا انك ماشي على سرعة 100، وهتنزل لسرعة 90. الترس المناسب للماتور في الحالتين هوا الرابع مثلا. في الحالة دي انتا مش محتاج الدبرياج في حاجة، ممكن ببساطة شديدة تدوس فرامل لحد ما توصل 90 وترجع تدوس البنزين تاني
لكن لو انتا عارف انك هتفرمل لحد 60 او 50 مثلا، يبقى انتا عارف ان الماتور لما يوصل السرعة دي هايحتاج الغيار التالت، فلازم تدوس الدبرياج

بالنسبة لموضوع انك هاتبقى بتدي امرين مختلفين للعربية، فانا اختلف معاك
انتا مجرد لما بتشيل رجلك من على البنزين، كده مابقاش في بنزين (الا كمية صغيرة جدا لا تكفي انها تحرك العربية) بيدخل الماتور. دلوقتي الحركة بقت معكوسة، بسبب ان عجل العربية بيلف، فا الترس اللي في الجير بوكس بيلف، وبيلف معاه ترس الماتور، وبالتالي الماتور بيبقى شغال (البساتم بتطلع وبتنزل) من غير اي مجهود من الماتور نفسو. في نفس الوقت، ده لا يؤذي الماتور في اي شئ.
وطبعا بسبب ان العجل مش حر ومحتاج انو يشغل الماتور معاه، فبتحس ان العربية متكتفة
لكن لما بدوس الدبرياج، بتفصل التروس، وبالتالي مافيش حاجة تدفع الماتور انو يشتغل فتلاقي صوته هدي وعدد لفاته بقى قليل جدا، وفي نفس الوقت العجل بقى حر من الماتور، فتلاقي العربية متهداش بسرعة، ولوعلى منزل هتلاقي سرعتك بتزيد.
فلو شفنا الموضوع ده من وجهة نظر الفرامل، فاحسنلها بمليون مرة ان العجل يبقى متكتف بالماتور احسن ما يكون حر كده وبيجري براحته، اللي هايبقى وحش بالنسبالها ان الماتور يبدأ يشغل نفسو (اديتو بنزين) ويبدأ يحاول يزود سرعة العجلة بنفسو. عشان كده انتا بتستخدم رجلك اليمين للبنزين او الفرامل، ما ينفعش الاتنين.



ثانيا: استخدام الدبرياج وانتا بتزود:
انتا لما بدوس الدبرياج لحد الاخر بتفصل الماتور عن التروس تماما وبالتالي دوست بنزين ولا لأ مش هاتفرق مع حد الا الماتور اللي عدد لفاته هايزيد على الفاضي
اللي بيخلي الدبرياج يتاكل، هوا ان الناس بتخلي رجليها على الدبرياج طول الوقت حتى بعد ما يخلصو تغير النقلات، لا هوا مداس للاخر ولا هوا متساب للاخر.
وانتا بتشيل رجلك من على الدبرياج شوية شوية، انتا بتوصل الماتور (اللي كان حر) بالعجل اللي هوا ماشي بطئ اوي بالنسبة للترس(الغيار) الجديد اللي انتا اديته، وبالتالي ده بيبطئ الماتور عشان هما بقو متصلين ببعض. ممكن الماتور يبطئ لحد ما يوقف خالص (العربية تبطل)
فحتة البنزين الصغيرة اللي انتا بتديها دي بتمنع حاجة زي كده تحصل
العربيات الحديثة ماتورها بيعرف يتعامل مع سرعة العجل البطيئة دي من غير ما يبطل، فما بتحتاجش تدوس بنزين الا بعد ما تخلص الدبرياج خالص


أرجو اني اكون وضحت ولو جزء بسيط من اسئلتك

[حسام البورسعيدى]

مفيش كلام يتقال بعد كلام عبده باشا .. واتمنى تكون وضحت الرؤيا ...