رابطة مالكي الكيا سيفيا فيد واستفد ( صداقة - نقل خبرات )

[sameh_saso]

المشاركة الأصلية كتبت بواسطة retaliation السلام عليكم ورحمة الله و بركاته يا رب يكون الجميع بخير فى حاجه غريبه أوى حصلت دلوقتى و هى أنى جاى أدور العربيه مش راضيه تدور مع أنها كانت شغاله من ساعتين بالظبط مش عارف أيه اللى حصل بس الحاجه الغريبه الى لاحظتها أنى لما ببدى العربيه سنة كونتاكت قبل ما دور و أسيبها شويه مش بسمع صوت طلمبة البنزين فشاكك أنه يكون منها !!!!؟؟؟؟

طلمبة البنزين مش واصلها كهربا من العربية ابقي بص علي التوصيلات بتاعتها .

[zadgo]

السلام عليكم ويارب يكون يوم سعيد عليكم وعلى مصر ان شاء الله
محتاج منكم شوية نصائح كده وياريت تساعدونى

1- كنت عاوز اعمل غطاء تفصيل للعربية عشان العربية لتهرت من الشمس خلاص قياريت لو حد ينصحنى ويكون سعر مناسب لانى سمعت اسعار مبالغ فيها شوية 400 جنيه.

2- كنت مسافر من 10 ايام كده والجو كان حر جدا وقت الظهر كده فركنت ونزلت اشترى حاجه مفيش 5 دقائق ورجعت ادور العربية مش بتدور خالص مفيش كونتاكت لكن البطارية سليمة قعدت حوالى نص ساعه قلت خلاص مفيش امل وبعدين جيت ادور راحت دارت الحمد لله ومن وقتها لم يتكرر ومش عارف ايه السبب فهل ممكن تكون السخونة ولما سبتها بردت شوية اشتغلت...ياريت حد يفيدنى

3- العربية سحبها كويس الحمد لله بس ساعات لما بقف كتير فى الزحمة يعنى مابين الغيار الاول والتانى وبعدين الطريف يفتح الاقى العربية مش بتجمع معايا خالص وسحبها بطىء وممكن صوت الموتور يعلى شويه لدرجة ان الناس اللى ورايا بتقعد تزمر وبتكون متضايقه لانى ماشى تاتا فامش عارف ممكن يكون ايه السبب ياريت برده تفيدونى لانى مش بحب استغلال الميكانيكية ويقعدوا يجربوا لحد ماتصيب معاهم فبحب اكون فاهم وانا بعمل الحاجة.
وشكرا لكم مقدما

[Sameh Ragih]

صباح الخير على الجميع...
في الواقع المرير أنا لاحظت حاجة مهمه في عربيتي ممكن تكون تفسير مناسب للإحساس بالإستهلاك العالي للوقود. أنا عربيتي سيفيا 2000 أوتوماتيك و إشتريتها لمراتي من حوالي 3 شهور و بعدين طمعت فيها و سبتلها عربيتي الصني... المهم إني في أول تفويله عملت 110كم!!!! و لأني أمتلك خبرة لا بأس بها في صيانة السيارات فبدأت الطريق من حساس الشكمان و ال TPS و الشكمان نفسه و بعد تغيير كل ده حتى الشكمان لأني لقيته بعافيه خالص الحمد لله التفويله بقت بتعمل 275كم في الزحمة و ده كان أفضل إستهلاك وصلتله و رضيت و قلت يا واد أديك راكب عربية قديمة حبتين و أوتوماتيك و ماتقرفش نفسك بأه.
الملاحظة المهمه هنا إني في أخر تفويله -وأنا دايما بافول قبل اللمبة ما تنور علطول- باسأل الراجل عايز كام يا عمو الحاج قاللي 69 جنيه و بحسبه بسيطة 69/1.85سعر اللتر=37.297297 لتر
و لما بصيت على جوجل لقيت تانك السيفيا 13.2جالون و الجالون= 3.78541178 liter يعني التانك المفروض ياخد 13.2*3.78541178=49.967 لتر!!! يعني إييييه!! فيه 13 لتر مش باينين عندي؟ عليهم باسوورد مثلاً؟!
التفسير الوحيد اللي عندي إن مؤشر البنزين بيدي قراءة خاطئه أو فيه سبب تاني أنا مش شايفه و ممكن حد يشاركني في الوصول ليه

[كيا سيفيا]

استاذ / Sameh Ragih
بعد التحيه....
انا قرأت مرة فى كتالوج العربيه انه بمجرد ان تضىء لمبة البنزين فمن الممكن ان تسير بالسيارة حوالى 10 الى 12 ميل بمنتهى الامان . وبما ان حضرتك بتمون قبل اللمبه ماتضىء كده يكون وضع طبيعى جدا ان التانك يكون فيه بنزين كتير

[Sameh Ragih]

المشاركة الأصلية كتبت بواسطة كيا سيفيا استاذ / Sameh Ragih بعد التحيه.... انا قرأت مرة فى كتالوج العربيه انه بمجرد ان تضىء لمبة البنزين فمن الممكن ان تسير بالسيارة حوالى 10 الى 12 ميل بمنتهى الامان . وبما ان حضرتك بتمون قبل اللمبه ماتضىء كده يكون وضع طبيعى جدا ان التانك يكون فيه بنزين كتير

شكراً على مشاركتك.. بس هل كل السيفياوية بيمشوا 12 ميل يعني حوالي 19 كم بعد ما اللمبة تنور؟!