تقرير عن تويوتا كريسيدا 1985

[desiel]

كريسيدا جوهرة التاج الياباني في تويوتا في الثمانينيات . أفخم صالون واعلى تكنولوجيا تواجدت فيهاوتفوقت على غريماتها اليابانية واشهرهم هوندا اكورد ونيسان ماكسيما. كريسيدا بيعتبرها البعض الاب الروحي لـ (لكزس) وانا بعتبر ده مبالغة لان اعتقد الاب الروحي ليها هي تويوتا كراون – كنت حشتريها برده قبل الكريسيدا
السيارة هي تويوتا كريسيدا موديل 1985 2000 سي سي بفتيس مانيوال انا اشتريتها من حوالي سنة ونصف وكانت عاملة 180 الف كيلو وكملت معايا 200 ألف واليكم تقييمي لها بعد المدة دي:
1- المحرك:
محرك 2000 سي سي يبدو أحيانا ضعيفا على جسم السيارة الضخم – نفس الشاسيه كان بينزل بمحركات 2600 سي سي 6 اسطوانات- ولكن هو مناسب جدا على الطريق المفتوح وفي السرعات العالية. يعيب الموتور ايضا تعقيد تركيبه رغم المساحة الواسعة حوله الا ان الميكانيكي بحس انه بيواجه صعوبه في التعامل معاه بالمقارنة مع موتور كريسيدا 1982 السابقة لها. الكاربراتير حساس جدا لنظافة البنزين وبيحتاج مني متابعة وتنظيفه كل حوالي 5 الى 6 أشهر .
2- التكييف:
تلاجة على واحد
3- العفشة:
ناعمة جدا وظبطت زوايا مرة واحدة. رغم ارتفاع العربية عن الارض الا انا بضطر اخد المطبات بالجنب لما يكون اكتر من واحد راكب ورا
4- الفرامل :
ممتازة ونجدتني في اكتر من موقف صعب وتيل الفرامل بيدوم معايا مدة طويلة .
5- الثبات:
اقصى سرعة جبتها بالعربية كانت 150 كم/س ورغم ارتفاع العربية عن الارض الا انها بسبب حجمها الكبير بتكون ثابتة جدا على الطريق .
6- الصالون :
صالون كلاسيكي جدا من خامات ممتازة والعربية فيها الكاسيت الاصلي والراديو الاصلي ليها لان كل واحد فيهم منفصل عن التاني والكراسي مريحة جدا سواء للي قاعدين ورا او قدام فيها بعض الكماليات مرايات كهربا وسخان للزجاج الخلفي وامكانية التحكم في شدة اضاءة التابلوه

عيوب السيارة :
1- حجم السيارة : حجم السيارة الكبير رغم مميزاته الا انه في زحمة بلدنا الجميلة بيكون مشكلة كبيرة في الركن مثلا بس بيخليني اسوق العربيات التانية كلعبة اطفال في ايدي
2- قطع الغيار: طبعا دي مشكلة المستعمل القديم في مصر كلها وبيزيد في العربيات اللي زي دي لانها اساسا كانت خليجي وبتكون غالية جدا بس معمرة – تيل الفرامل الاصلي الياباني ب 500 جنيه – ركب 5 سنين في كريسيدا 82 مع والدي من غير تغيير.

[ابراهيم وجدى]

اظن ان الكراون هى تاج تويوتا