|
#1
16-06-2010, 10:31 PM
|
||||
|
||||
- رحلة العودة - مغامرات أبو كمال فى الصحارى و الجبال بس المرة دى من مصر للكويت
السلام عليكم و رحمة الله و بركاته ...
نظرا للطلبات المتزايدة من اخوانى الاعضاء على كتابة رحلة العودة من مصر للكويت و نظرا لأن التقصير من عندى أنا لأنى كسلت بصراحة اكتبها من فترة طويلة او بمعنى اصح مكنتش لاقى وقت فاضى و دماغى رايق فيه علشان اكتبها لحضراتكم و نظرا لأنى خلاص كلها اسبوع ان شاء الله و جايلكم مصر تانى قررت استجمع قواى و ما تبقى من ذكريات للرحلة علشان اكتب لحضراتكم التفاصيل و المواقف اللى حصلت و ارجو من سيادتكم تقبل اعتذارى عن التأخير.... و كانت رحلة العودة كما يلى ..... قبل العودة بكام يوم رحت مطروح انا و عائلتى الصغيرة المكونة من زوجتى و طفلتين احداهما سنة و نص و الاخرى شهرين وقتها و قعدنا هناك يومين استمتعنا فيهم بالطبيعة البكر و الشواطئ ذات المياة الصافية الى ابعد الحدود و طبعا تدريب لا بأس به على طريق العودة من مصر للكويت للمدام حيث ان المسافة من مطروح لطنطا هى 420 كيلو بالتمام و الكمال ... مسافة محترمة لما تتاخد نفس واحد .. المهم الغرض من التدريب تم و البروفة كانت كويسة الحمد لله.... فى يوم السفر بعد عمل تشييك سريع على العربية و تغيير الزيت فى الصباح ... رجعت البيت اخذت قسطا لا بأس به من النوم لمساعدتى على السفر فى المساء حيث أنه كان من المقرر ان ننطلق فى منتصف الليل تم تعبئة الشنط و تكييس عفش البيت و تغطيته لحمياته من الاتربة التى سيتعرض لها لمدة عام كامل او اكثر ثم انزلنا الشنط فى السيارة وودعنا البواب  وودعنا الاستاذ المشرف على الجراج ايضا ,, انطلقنا الى بيت حمايا و قعدنا شوية مع حمايا و حماتى ثم انطلقنا الى بيت والدى و قعدنا شوية برده مع عائلتى و بعد الوداع الحار الممتزج بالدموع و الوعود بالتليفونات و المسجات طول الطريق ... وانطلقنا من طنطا لمقابلة رفيق الكفاح صديقى بتاع بركة السبع و كان معاه زوجته و ابنه ايضا .. و طبعا كالعادة اتأخرت عليه و لم يطيق الانتظار و انطلق من بيته قبل ما انا انطلق من بيت عائلتى المهم دست شوية فى السرعة و قابلته على اول الطريق الدائرى من الزراعى للانطلاق الى السويس و خدنا الدائرى و من اول بنزينة فولنا و جبت 6 ريدبول اللى مبيعطيش جوانح لزوم الطريق و الصحصحة و اهو يساعد مع النسكافيه شوية المهم وصلنا السويس الساعة 3 صباحا بدون مشاكل الحمد لله و الطريق كان تقريبا فاضى و شكله مسفلت جديد بعكس الطريق العكسى من (السويس الى القاهرة) فكان تمام الحمد لله و البنانيت نامو و انطلقوا و قبل نفق الشهيد احمد حمدى يوجد كافيه متواضع قعدنا عليه شوية و شربنا قهوة و الرفيق شيش و صلينا الفجر و انطلقنا فى النفق و من النفق الى طريق سيناء الغالية التى عادت الينا بدماء شهداءنا الغالية و بعد القليل من الوقت بدأت الشمس تقطع بأشعتها الذهبية ظلام الليل الدامس المخيم على ارجاء الصحراء ... و مش عاوز اقولكم يمكن دى احسن لحظة فى الرحلة كلها جمال غير طبيعى يا جماعة سبحانك يا رب .. ما خلقت هذا باطلا ... و طبعا افتكرت الآية الكريمة (و الصبح إذا تنفس) صدق الله العظيم فعلا تشبيه إلهى ووصف ليس بعده وصف لشروق الشمس..تحس فعلا ان السما كان نايمة و بعدين بدأت تتنفس ... و مع بداية اليوم الجديد و كان يوم جمعة مشينا فى وسط الجبال بمنحدراتها و زواياها الحادة و المنفرجة و طبعا سبت كباية النسكافيه للتركيز فى الطريق على قد ما اقدر و دى بعض الصور للموقف ده    و طبعا بما ان الرحلة لا تخلو من المواقف فإن صديقى اللى كان ماشى قدامى كان جاى فى وشه سائق تريلا (طريق رايح جاى)و داخل عليه فى حارته و غالبا كانو الاتنين نايمين (صاحبى و سواق التريلا) و انا طبعا ايدى باقصى قوة على الكلاكس و عمال اقلب نور و انا شايف صاحبى هايتهرس بعربيته تحت التريلا و بحمد الله فى اخر لحظة زى الافلام صاحبى جه بالعرض و خد حارة التريلا و نزل على الرمل و خرج من الطريق و دخل تانى ماوقفش .. اعصابه حديد ما شاء الله .. و انا طبعا قاعد ورا الدركسيون كل جسمى بيتنفض المهم الحمد لله عدت على خير و احسن حاجة ان مراتى ماخدتش بالها حيث انها كانت تستمتع بجمال الطبيعة مع ممارسة مهمتها و هى الرغى المتواصل اللى انا موصيها بيه علشان عينى ماتغفلش و اخيرا وصلنا الى ميناء نويبع الجوى قصدى البحرى و كان تانك البنزين اقل من الربع و لسة امامنا انتظار طوييييل و طبعا لازم تشفيل التكييف لأن الجو نار.. المهم صديقى قالى يا عم هتكفى ماتقلقش .. و انا عارف عربيتى .... و يا سلام لو فصلت بنزين و انا فى العبارة ,,,, ههههههههههه يبقى موقف جامد مووووت .. المهم اقرب بنزينة كانت على بعد 7 كيلو رحت فولت و جيت و كان مستنينى الاخ امين الشرطة اياه و دخلنى فى السريع و خلصلى الاجراءات و غير حجز العبارة الى اللانش السريع و اللى كان مقرر انه هييجى بعد ساعتين و طبعا اتأخر ساعتين كمان و انتظرنا 4 ساعات و صلينا فيهم الجمعة و بعد طول انتظار فى تكييف العربية و طبعا انتوا عارفين التكييف بيبقى تقريبا مالوش لازمة طالما العربية واقفة ... المهم وصل اللانش و مارضيوش يدخلونا .. قالولى انت حجزك عبارة مش لانش و كان اوشك اللانش انه يقفل الباب ... فاكلمت امين الشرطة فورا و جالى فى دقيقتين و عملنا كام تليفون و دخلنا الحمد لله بعد ما دفعنا فرق 120 جنيه على ما اتذكر ....و نزلوا الحريم و الاطفال من العربيات علشان يطلعوا يركبوا مع الناس ... و احنا دخلنا العربيات فى اللانش و ركناها بمساعدة العاملين على اللانش السريع .... و ركبنا اللانش اخيرا بعد عناء الانتظار و المعاملة فى حبيبتنا مصر و قعدنا حوالى ساعتين فى اللانش و احنا ميتيين من التعب و وصلنا الاردن اخيرا الى العناء الاخير .. و عاملين فى الاردن اجراءات جديدة ان العربيات لازم تدخل على جهاز مسح بالاشعة علشان انتوا عارفين لو كنا مهربين مخدرات و لا حاجة و فتحو الشنط و ماعلقوش غير على الادوية اللى كنا واخدينها معانا من مصر .. حكم الادوية فى الكويت غالية جدا جدا و كمان لازم (وصفة طبية) يعنى مش بيصرفوها غير بروشتة كمان فا بناخد معانا شوية ادوية برد على مضادات حيوية على ادوية اطفال .. تشكيلة كدة يعنى .. المهم خلصنا الفحص بالاشعة و بعديها اجراءات التربتك و بعديها اجراءات الحدود الاردنية و يليها الحدود السعودية و كانت الاجراءات المرة دى اطول و الناس ارخم مش عارف ليه .. حتى العسكرى السعودى اللى بياخد البصمة (بتكون مرة واحدة بس اوا ما تعدى من الحدود) كان حاطط قدامه كلينكس .. فاستأذنته و خدت كلينكس علشان امسح ايدى من الحبر فا قاللى هو كل واحد يدخل ياخد مناديل .. هو انا هلاحق عليكم منين .. المحارم دى بتاعتى انا .. كنت فاكره بيهزر فى الاول و ضحكت فا طلع بيتكلم جد .. قلت له هى تمنها كام و انا ادفع لك تمن 100 علبة .. و هو انتو مش حاطينها للناس تستعملها ابقى شيلها فى درج المكتب ... المهم خرجت و انا متضايق اكتر ما انا متضايق و تعبان و وصلنا مدينة حقل السعودية و احنا مش شايفين قدامنا و مقررين نشوف اول فندق و نريح شوية خصوصا ان الطريق من حقل الى تبوك (المدينة التالية فى الطريق) كله منحنيات خطرة و جبال و طالع و نازل فمن المستحسن اننا نمشى فيه فى النور مش فى الظلام و قعدنا نلف فى مدينة حقل و هى مدينة ساحلية جميلة و صغيرة و بتشوف البحر منها من فوق الجبل و بها بعض الشواطئ المهم لقينا اول نزل و كان دون المستوى و دورنا تانى و تالت و رابع لحد ما لقينا اخيرا فندق نظيف شوية و لكنه كان للأسف كومبليت .. بما اننا كنا اخر ناس تقريبا خارجين من الحدود.. المهم قررنا نضرب قهوة و ننطلق الى تبوك و كان القلق و الخوف من الطريق اياه... بس توكلنا على الله و كانت المفاجأ ان المشى فى الطريق ده بالليل احسن بكتيييييييييييييير من النهار لأن الواحد مابيكونش شايف غير الطريق من عيون القطة فا مفيش قلق من الجبال و الانحدارات القوية على الاقل نفسيا .. ودى صورته  و الحمد لله خدنا الطريق فى ساعة و نص تقريبا ووصلنا الى مدينة تبوك الاكبر و الاوسع و كنت بقول لمراتى عاوز نسكافيه فا قالتلى حاضر و بعدها بشوية ياماما فين النسكافيه و بصيت عليها لقيتها فى عاشر نومة من كتر التعب الله يكون فى عونها .. المهم صحيتها و قلتلها يلا وصلنالقيتها بتقولى .. خلاص وصلنا طنطا ؟؟ قلتلها ايوا يلا بقى علشان هنروح ناكل فول من عند البغل ..هههههههه .. تهيييس بقى للصبح ..المهم صحيت و فوقت و دخلنا الى احد المطاعم كلنا لقمة و ريحنا 3 او اربع ساعات .. حيث ان المطعم كان كبائن و يمكن اغلاقها بهدوء ووصينا العامل بالمطعم ان يوقظنا عند الفجر.. المهم نمت على الفرش الغير مريح بالمرة و لكنى رحت فى النوم من كتر التعب و صحيت بعد تلت ساعات و انا مخنفر و حالتى بلا خدت برد هههههه,, هو ده وقته برد بقى و صداع و قلة تركيز فافتكرت ان معايا الادوية اياها و الحمد لله ضربت اتنين (داى) من دواء البرد الشهير نايت اند داى و بفضل الله فى خلال نص ساعة كانت الاعراض تقريبا اختفت و جت مشكلة الحمامات .. غير مناسبة للحريم من حيث النظافة و الجاهزية فا طرينا نمشى بالعربيات و دورنا لحد ما لقينا حمامات نظيفة فى احد المطاعم الراقية فا دفعنا فلوس للعامل و استعملناها و فوقنا تمام التمام الحمد لله و طبعا كان الفجر طلع و الشمس ملأت السما باشعتها الذهبية و الطريق بعد تبوك كان ما شاء الله مالوش حل وااسع جدا و منفصل طبعا و جبت حتى ساعتها سرعة 220 .. بس تراجعت علشان العائلة و الحمولة مع ان المدام كانت راحت فى النوم ههههه, اصلها لو شافت 220 دى ممكن يغمن عليها ..و طبعا صديقى رفيق الكفاح اختفى من ورايا .. لحد ما جه تقاطع طرق فا وقفت و استنيته لحسن يدخل طريق غلط ولا حاجة و وصل ومشينا ورا بعض تانى حتى وصلنا مدينة سكاكة .. نزلنا فولنا بنزين و شربنا قهوة و ريحنا شوية و كان فيه حاجة غريبة .. العربية بتحدف يمين .. و بعدين بقى .. ما هى كانت ماشية كويس و انا مشيك على كل حاجة قبل ما اتحرك من مصر و فضلت تحدف و انا اعدل الدركسيون .. المهم قابلنا بنشرجى (يعنى بتاع كاوتش) فالقيت صاحبى هدى و دخل عنده من غير ما اقوله . المهم نزلت قلتله فى حاجة .. قالى ايوا العربية بتحدف يمين .. قلت الله ,, انت كمان؟؟؟ المهم شيك و العربية تمام الحمد لله فا فهمنا بقى ان المنطقة دى فيها جبال مغناطيسية او ما شابه بتخلى العربيات تعمل كدة ... المهم وصلنا مدينة عرعر و الطريق ما شاء الله زى الفل معظمه زوجى و حان وقت الغداء (الساعة 2 ظهرا ) نزلنا برده فى مطعم كبائن و اتغدينا كبسة سعودى كبست على نفسنا تانى .. و ريحنا ساعة و توكلنا على الله فى الطريق و الحمد لله برده الطريق كان كويس و بعدين شوية لقيت الرفيق ركن على جنب و ركنت وراه قالى مش قادر اكمل و مش شايف ... قلت له طيب ماقلتش ليه و كنا ريحنافى عرعر شوية .. قاللى مش قادر نزل بقى فرغ زجاجة مية فوق دماغه و شربنا 2 ريدبول و انطلقنا تانى لحد ما الدنيا بقى ليلت و نزل الظلام و احنا سايقين و انا بقى من كتر التعب كنت شايف السما مزروعة شجر و شوية اشوف كأن جبل كبييير قدامى و عمال يقرب و بقول لمراتلى شايفة الشجر الكتير اللى فى السما و شايفة الجبل ده .. و هى مستغربة و تقولى هما فين دول ؟؟ اقولها انتى مش شايفة ولا ايه .. الله دا فيه كمان جمال اهه بتقوم و تقعد .. قدامك اهم فا عرفت انى هيست من التعب خلاص قالتلى اركن على جنب بس شوية فا ركنا على جنب و فرغنا كمان زجاجة مية على دماغى .. ههههه بس كنا تقريبا وصلنا مدينة حفر الباطن و فاضل على حدود الكويت اقل من 100 كيلو ..ال 100 كيلو دول طريق فردى و مكسر ربنا يستر ... المهم وصلنا الحفر و فولنا و نطلقنا فى الطريق العظيم و كان رفيق الكفاح واضح انه تعب هو كمان فا كان واخد الطريق ده تقليب علشان يعدى اللى قدامه و انا طبعا فى ديله عاملين زى عربيات القطار و وصلنا سرعة 190 على الطريق ده .. من كتر التعب وقطعنا ال 100 كيلو فى اقل من 40 دقيقة .. ههههههه ووصلنا الحدود الكويتية اخيرا و كانت فى اللذيذ يعنى .. بس انا كان لازم ادخل الادارة اختم ورق بنتى الجديدة لأنها اول مرة تدخل الكويت و طبعا تدخل الدارة يعنى تحتك بموظفين مدنين كسالى و مستفذين بعكس ظباط الحدود الكرام و المدنيين حتى اللى على الشبابيك و انت فى العربية مابتنزلش بيخلصولك كل حاجة .. ربنا يكرمهم يا رب و انطلقنا الانطلاقة الاخيرة 120 كيلو متر من حدود الكويت الى شقتى و كلمت نسيبى قلت له هات اى اكل و حطه فى البيييت ههه فاطلب كنتاكى و وداه البيت و مشى و ولنا و احنا مش شايفين قدامنا طلعنا كلنا و طلعت انا شوية شنط و شبت باقى الحاجات فى العربية و اتعشينا و و انا خدت دش تمام و با ى باى .. نووووووووووووووووووم حتى الصباح الباكر ..هه و صحيت رحت الشغل و استأذنت طبعا و رجت كملت نووووم تانى طول اليوم ... و نراكم فى رحلات قادمة ان شاء الله
__________________
 ......................... .. يا ترى جاهزين لتجربة السواقة اللى جاية ؟؟؟؟؟!!!!!!! التعديل الأخير تم بواسطة bmkbmk ; 16-06-2010 الساعة 11:22 PM 
|
|
#2
16-06-2010, 10:54 PM
|
||||
|
||||
|
رد: - رحلة العودة - مغامرات أبو كمال فى الصحارى و الجبال بس المرة دى من مصر للكويت
الله ينور يا كيمو
بس مش كنت كملت علي الموضوع تاني احسن يلا مش مشكله و في انتظار مغامرة 2010 ان شاء الله لما توصل مصر بالسلامة
__________________
Sharief Mansy
 Farewell my Cayenne, you were the best car i ever had and driven
|
|
#3
16-06-2010, 11:01 PM
|
||||
|
||||
|
رد: - رحلة العودة - مغامرات أبو كمال فى الصحارى و الجبال بس المرة دى من مصر للكويت
مشكور على الحكاية الرائعة و الأسلوب الشيق
 بس لو كان الخط أكبر شوية و فيه فواصل كتير بين الكلام كانت العينين ترتاح شوية  بالمناسبة هي العربية اللي كنت راكبها نوعها إيه؟ و ملحوظة أخرى أنا لو كنت مكانك في السواقة دي كلها كنت نمت أول ما وصلت ثلاث أيام على الأقل مش أروح الشغل تاني يوم!!  ptmnlo12 3per1101ptmnlo123per1101p tmnlo123per1101
__________________
![[IMG]file:///C:/DOCUME%7E1/ragy/LOCALS%7E1/Temp/moz-screenshot-4.png[/IMG]](image.php?s=8672e0adcdbb67fda5a85c30b41d7b7e&u=5722&type=sigpic&dateline=1317473683)
|
|
#4
16-06-2010, 11:03 PM
|
||||
|
||||
رد: - رحلة العودة - مغامرات أبو كمال فى الصحارى و الجبال بس المرة دى من مصر للكويت
انا فكرت والله اكمل بس لقيت انى اعمله موضوع مستقل احسن و عموما انا هحط لنك فى الموضوع التانى و يا رب مغامرة 2010 تعدى على خير و شكرا على الرد يا جميل
__________________
......................... .. يا ترى جاهزين لتجربة السواقة اللى جاية ؟؟؟؟؟!!!!!!!
|
|
#5
16-06-2010, 11:10 PM
|
||||
|
||||
رد: - رحلة العودة - مغامرات أبو كمال فى الصحارى و الجبال بس المرة دى من مصر للكويت
انا كبرت الخط شوية .. يا رب يكون كدة اوضح العربية يا باشا هى نفسها اللى معايا فى صورة التوقيع دى .. شيفروليه كابريس 2004 و انا كان نفسى اريح اسبوع يا باشا والله .. بس نعمل ايه بقى ...مرغم اخاك و شكرا على مرورك الكريم
__________________
......................... .. يا ترى جاهزين لتجربة السواقة اللى جاية ؟؟؟؟؟!!!!!!!
|
 |
|
|
