دعوة لمقاطعة المستعمل

[sherifabden]

ما هو المشكلة ان الواحد لو حب يبيع عربيته لازم يكون فيها خازوق يطلعلك
انما اللي يبيع العربية علشان ظروف والكلام دا نادرا جدا

[modyate2006]

انا سمعت مره راى فى موضوع الجمارك معرفش مدي صحته ...........ان لو الجمارك اتلغت هتقل سعر السيارات الجديده وده هيشجع كل الناس تشتري سيارات ..........وهتبقى الشوارع مواقف سيارات

تخيل انت لو الجمارك أتشالت وعربيه زى الماروتى بقت ب 20000 جنيه وأكيد الشعب الغلبان المطحون فى المواصلات ما هيصدق وهيجرى يشتريها والنتيجه الزحمه اللى أحنا بنشوفها كل يوم هتبقى 3 أو 4 أضعاف وهنندم على اليوم اللى أشترينا فى عربيات بس فى ظل القرف والمواصلات الزباله من حق كل واحد يركب عربيه عشان يرتاح او لابد من اعادة هيكلة وسائل المواصلات بأكملها وده المستحيل بعينه

[modyate2006]

المشاركة الأصلية كتبت بواسطة sherifabden ما هو المشكلة ان الواحد لو حب يبيع عربيته لازم يكون فيها خازوق يطلعلك انما اللي يبيع العربية علشان ظروف والكلام دا نادرا جدا

المشكله بقى انى لما اشتريت العربيه مالقيتش خازوق واحد.... لأ .... انا لقيت مجموعه متنوعه من الخوازيق وكل خازوق انقح من اللى قبليه والمشكله ان العربيه قطع غيارها نادره شويتين لغاية اما ورمت ..... على قد ما الجديد غالى بس بصراحه أضمن على الأقل ان شاء الله مش هتعطل منك غير بعد 5 سنين قدام على الأقل .... ثانيا يكفى ان سعرها تقريبا واحد عند كل المعارض مش كل واحد بسعر وكل واحد بيبيع بيع غناوه ..... بس الجديد نااااااااار يا حبيبى نااااااااار

[capohosen]

بصراحة عجبنى جدا الموضوع وبرضه عاوز اضيف تجربتى مع المستعمل ولعنت اليوم اللى فكرت اجيب عربية ومش هنسى اليوم ده
فى البداية قلت عاوز اجيب عربية فى حدود 5 الاف ج او 6 عشان خلاص اتخنقت من المواصلات وقرفه روحت واخد ميكانيكى معايا ونازل السوق وجبت سيات 133 مو 81 المهم الميكانيكى قالى تمام وزى الفل وعلى البركة واشتريت العربية ب4750ج السنة اللى قبل اللى فاتت ومن يوم مجبت العربية وفلوس يومية اول حاجة اسطوانة وديسك وتانى حاجة فرد العجل كله وتالت حاجة سمكرة ودوكو ورابع حاجة عمرة وفى الاخر خلال سنة لحد مبقيت خلاص ابيع هدومى بقيت اتحايل على حد يشتريها منى باى تمن اتخنقت وبيعتها ب3250ج بعد الاضعاف اللى صرفته عليها
بجد تجربة فظيعة ودلوقتى محتار هل اكرر واجيب عربية مستعملة زى 128 بس خايف ولا اجيب موتسيكل وبرضه خايف من الحوادث مش عارف اعمل ايه

[eaglenest]

أنا كنت مشتري لانوس 2008 وايه فرحان بيها بقا اول عربية ومستعملة هخبط فيها براحتي وبتاع .. العربية كانت هتموتني والحمد لله ربنا ستر بسبب الكسل والاهمال من صاحبها وقلة الخبرة عندي
الكاوتش كان متاكل وهوه منبهنيش واعتمد اني مليش خبرة وقشطة يا معلم بقا الزبون وصل ههههههههه بس للامانة اللي كان معايا جابها بسعر كويس واطمني على المكنة وكله تمام المهم الكاوتش وانا ماشي كان شانبر وهوبااا اساحبي فرقع وانا على السريع والحمد لله افتكرت كلام خالي لما الكاوتش يفرقع متدوسش فرامل وربنا ستر وجبت 4 كاوتشات جداد
وبعدين رحت غيرتلها بقا السيور والحركات والفلاتر وبصراحة العربية الحمد لله أنا كانت ايدي فيها رجعت احسن من الاول وربنا يجازي صاحبها الاولاني على اللي كان عمله فيها ,,,,

بس العربية مش عارف بتاكل بنزين وله دي طريقة سواقتي ال 20 لتر تقريبا كانوا عاملين 100 وشوية بس في الغالب طريقة سواقة

خلاصة الكلام المستعمل عيبه ان العمر الافتراضي لحاجات كتير خلصت والراجل مش بيغيرها بيبيع على كده وانت بتلبس زيي كده انا هغير ديسك واسطوانة اهه ولسا الله اعلم .. بس انا لو بعت دي او رجع بيا الزمن هجيب زيرو حتى لو صيني مش هكرر مستعمل تاني