العودة   مصر موتورز مجتمع السيارات > منتديات السيارات العامة > مقارنات

مقارنات لمساعدة الأعضاء فى المفاضلة بين الأنواع المختلفة من السيارات


إضافة رد
 
أدوات الموضوع
  #1  
قديم 05-06-2012, 12:45 AM
الصورة الرمزية borio1704
borio1704 borio1704 غير متواجد حالياً
من انا؟: أعشق السيارات، أحب اليابانية، الكورية، ولا أفضل الأوروبية
التخصص العملى: استشاري نظم جودة
هواياتي: السيارات - الكمبيوتر
 
تاريخ التسجيل: May 2011
الموقع: جدة - المملكة العربية السعودية
المشاركات: 692
borio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond repute
مميز عايز تشتري عربية ومحتار؟؟؟؟ تعالى أقوللك إزاي تختار




أنا فكرت أعمل الموضوع ده لما لقيت مواضيع على المنتدى لناس بتقارن عربيات لا يمكن تتقارن مع بعض، وكل الموضوع إن أسعارهم قريبة من بعض.

فكان لازم أتدخل عشان ... بصراحة ... حسيت إن احنا في مصر لسه بنبص للعربية على إنها موتور واربع عجلات... مش حاجة بتعبر عن أسلوب حياتنا.



قبل ما أبدأ... لو انت بتحب ماركة معينة أو شكل عربية بعينها... فالكلام اللي حقوله ده مش حيفرق معاك كتير، لإنك تقريبا محدد اللي انت عايزه.

إنما لو انت محتار ما بين عربيتين أو أكتر... جرب وفكر زي ما حقوللك... يمكن تلاقي الجواب بعد ما تقرا.



موضوع اختيار العربية دايما بياخد مجهود وتفكير كتير .. لإنها خطوة حيدفع فيها مبلغ كبير نسبيا ولازم المبلغ ده يتحط في مكانه الصحيح


ولإننا في مصر... والعربية سلعة غالية جدا مقارنة بمستوى الدخل (وأغلى كمان من أي حته في العالم) فمعظمنا بيعتبر إن ثمن العربية هو الحاجة الأساسية اللي بيقارن بيها العربيات... أو بمعنى آخر... معظمنا بيشوف العربيات اللي في نفس الفئة السعرية وبعدين يبدأ يقارن



العربية ما بقيتش مجرد وسيلة مواصلات... العربية بتعبر عنك... عن شخصيتك... عن مستوى معيشتك... عن مستواك الثقافي... عن حجم عيلتك... عن طريقة حياتك



لو عايز تختار صح... السعر مش هو أول حاجة تختار بيها

إذا ما كانش السعر هو المهم... أمال إيه هو المهم؟؟؟


قبل ما تشتري ... خد من وقتك شوية وفكر ... لإن في حاجات لازم تحددها الأول قبل ما تفكر في الفلوس اللي حتدفعها عشان تحس إنك حطيت فلوسك في مكانها.




أول خطوة: حدد انت مين!!!

نعم؟؟؟ يعني إيه؟

أيوه.. يعني راجل ولا ست.. شاب صغير ولا رب أسرة.. مستريح ولا المواضيع على قد حالها
كل الحاجات دي بتفرق في اختيارك

غالبا... الراجل عايز عربية قوية وملامحها حادة... إنما الست عايزة عربية شكلها ناعم

الشاب الصغير عايز عربية صغيرة وسريعة وما تستهلكش بنزين، إنما رب الأسرة عايز عربية تكفي العيلة بشنطها وهو رايح المصيف

الناس المستريحة مش حتبص للماركات المتواضعة، إنما اللي على قد حاله بيدور على حاجة برضو على قد حالها


تاني خطوة: لازم تحدد انت عايز إيه من العربية

بمعنى إنت عايز العربية تعمل بيها إيه؟؟ إيه غرضك من شرا العربية وهتستخدمها في إيه؟

إزاي؟؟

يعني أغلب مشاويرك فين؟؟

جوه البلد في الزحمة ولا مسافر؟؟
مشاويرك قصيرة ولا طويلة؟؟ ...
الطرق اللي انت حتمشي فيها متسفلتة كويس ولا حتروح بيها المزرعة؟؟؟
ممكن تطلع بيها سفاري ولا المواضيع مسالمة؟؟ ...

عايز عربية سريعة ولا عايز عربية موفرة في البنزين؟؟؟

عايز عربية تستحمل الشقا بتاعنا ولا عايز عربية الناس تشاور عليك فيها؟؟؟

عايز فيها حاجات محددة؟؟؟ مثلا: موتور قوي ... عفشة قوية ... اتزان عالي ...

حتشيل فيها حاجات غير البني آدمين ؟؟؟



نتيجة الخطوتين دول إنك تحدد شكل العربية اللي انت محتاجها...
يعني: سيدان ... هاتشباك ... 4×4 ... فان ... نص نقل


الخطوتين دول لوحدهم حيخلوك تشيل عربيات كتير من دماغك، لإنهم ببساطة... مش مناسبين.



تالت حاجة: اختار حجم العربية المناسب حسب احتياجاتك وإمكانياتك

أنا هنا باتكلم عن حجم العربية ... مش حجم الموتور...

مش معنى إن نص العربيات في مصر بقت 1600 سي سي إني أقارن هيونداي فيرنا بـ سوناتا، أو جولف بـ باسات

طبعا تفرق لو عندك عيلة صغيرة أو كبيرة، لو حتركب لوحدك أو معاك كل صحابك

بس لما تحدد حجم العربية.. حتلاقي الاختيارات كمان بتقل.


رابع حاجة: حدد إيه التجهيزات والكماليات اللي انت شايفها أساسية في العربية اللي انت بتفكر فيها وإيه اللي ممكن تستغنى عنه

التجهيزات والكماليات الأساسية يعني اللي ما تقدرش تسوق العربية من غيرها، وأي حاجة تانية لو موجودة تبقى حاجة كويسة ترجح كفة العربية

زي إيه؟؟؟

تكييف ... باور ... فتيس أوتوماتيك ... إزاز كهرباء ... RPM ... GPS ... كراسي جلد ... ساوند سيستم كويس ... كومبيوتر رحلات ... ABS ... إيرباج ... جنوط اسبور ... ألوان جذابة ... إلخ



إيه ده ؟؟؟ ده احنا ما جبناش سيرة الفلوس

من أول هنا ممكن نفكر في الفلوس




خامس نقطة: السعر والتكلفة

الفلوس مهمة.. ولو الفلوس متوفرة ... مش حيبقى عندك أزمة إنك مش لاقي اللي انت عايزه.. ... بس من غير ما تحدد اللي فوق ده... الفلوس هتوهك

إنما المشكلة الكبيرة بقى ... إنك تبقى عارف انت عايز ايه... ومش عارف تجيبه عشان الفلوس مش مساعداك...

هنا نرجع للنقطة اللي فاتت، ونراجع التجهيزات الأساسية اللي ما نقدرش نستغنى عنها... ونحاول نتنازل شوية.


خلي بالك... الفلوس هنا مش مجرد سعر العربية

تكلفة تشغيل العربية كمان مهمة، عشان كده لازم تعرف حاجات تانية زي:
• معدل استهلاك البنزين
• نوع البنزين اللي يتحط في العربية
• تكلفة التراخيص في المرور
• ... إلخ.


سادس حاجة: الصيانة

يعني التوكيل محترم وقطع الغيار متوفرة ولا حجيب العربية واقعد أعيط جنبها لما تعطل

طيب أسعار قطع الغيار في التوكيل كويسة ولا نار؟؟؟

حاول تعرف بعض أسعار لقطع الغيار اللي حتحتاجها في أول 3-4 سنين زي:
• تيل الفرامل
• سير التقسيمة
• فلاتر الهوا والزيت والبنزين
• مقاس الكاوتش بتاع العربية متوفر في السوق ولا لأ... طب سعره في حدود قد إيه؟؟

كمان ... تكلفة الصيانة الدورية في التوكيل


سابع نقطة: المُصنّع

الناس حتقوللك الألماني مفيش زيه... وانا حقوللك : صح.... بس تقدر على مصاريفه؟؟؟؟

عموما... الموضوع ده بالذات فيه اختلاف كبير ما بين الناس... شوف اللي انت عايزه وترتاحله.


تامن حاجة: جرب قبل ما تاخد القرار النهائي

لو بعد كل اللي قلناه ده لسه قدامك عربيتين ولا حاجة... حاول تشوفهم من قريب... ويستحسن تجربهم

يعني لو لقيت أجنص فيه العربية اللي في دماغك ... اقعد فيها وشوف:

• القعدة جوه العربية مريحاك ولا لأ
• كل المفاتيح تحت إيدك وتقدر توصلها بسهولة
• في مكان كفاية للناس اللي حتقعد وراك لما تاخد وضعك اللي حتسوق فيه
• شنطة العربية تكفيك ولا لأ
• تقدر تعرف أماكن الأجزاء الرئيسية في الموتور ولا الموضوع مبهم بالنسبالك


ويا سلام بقى لو تقدر تسوقها وتجربها من عند حد تعرفه


آخر حاجة: استشير

لسه محتار برضو؟؟؟ اسأل حد خبرة في العربيات

لسه محتار؟؟؟ انت لسه ما صليتش استخارة؟؟؟؟


لو كل ده ولسه ما عرفتش... ما تشتريش أحسن




...

التعديل الأخير تم بواسطة borio1704 ; 05-06-2012 الساعة 01:32 AM
رد مع اقتباس
  #2  
قديم 05-06-2012, 01:51 AM
الصورة الرمزية YahiaAshraf
YahiaAshraf YahiaAshraf غير متواجد حالياً
التخصص العملى: طالب بالأكادمية العربية للعلوم و التكنولوجيا و النقل البحرى بالاسكندرية
هواياتي: السيارات - الكمبيوتر
 
تاريخ التسجيل: Mar 2011
الموقع: Alexandria
المشاركات: 11,343
YahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond reputeYahiaAshraf has a reputation beyond repute
افتراضي رد: عايز تشتري عربية ومحتار؟؟؟؟ تعالى أقوللك إزاي تختار

رد مع اقتباس
  #3  
قديم 05-06-2012, 08:08 AM
mffg mffg غير متواجد حالياً
 
تاريخ التسجيل: Feb 2010
المشاركات: 12
mffg is on a distinguished road
افتراضي رد: عايز تشتري عربية ومحتار؟؟؟؟ تعالى أقوللك إزاي تختار

تسلم ايدك موضوع متعوب عليه و مكتوب بصورة منظمة و شاملة كل النواحى اللى بتشغل بال اى مشترى شكرا ليك و انا استفدت من كلامك و اخذت نسخة على الوورد و احتفظت فيها لارسالها لاصحابى للاستفادة و الدراسة قبل شراء اى سيارة و لكن ارجع و اقولك مفيش عربية فيها كل اللى الواحد بيحلم بيه حتى لو معاه مبلغ كبير و ممكن يشترى عربية غالية برضوا مش هيكون فيها كل اللى بيحلم بيه لازم تكون فيه حاجة يضحي بيها مقابل حاجة مفيش عربية كاملة حتى السيارات الفارهة جدا - و كمان هتلاقى اذواق الناس تختلف - يعنى ممكن واحد يحب سيارة و يشوفها احلى سيارة و غيره يذم و يسب فيها - و لكن هناك قاعدة عريضة من الصفات المشتركة عند معظم الناس هى التى تجعل فئة كبيرة من الناس تشترى نوع معين من السيارات و تنتشر فى الشوارع زى الارز و التصبح سيارة من السيارات الشعبية - شكرا لمجهودك
رد مع اقتباس
  #4  
قديم 05-06-2012, 11:01 AM
الصورة الرمزية akerima
akerima akerima غير متواجد حالياً
من انا؟: VW OLD Beetle Big FAN
التخصص العملى: Sales
هواياتي: IT
 
تاريخ التسجيل: Apr 2010
الموقع: Alexandria
المشاركات: 1,410
akerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond reputeakerima has a reputation beyond repute
افتراضي رد: عايز تشتري عربية ومحتار؟؟؟؟ تعالى أقوللك إزاي تختار

: 14FEAD~151:

__________________

فى كل شارع فى بلادى صوت الحريه بينادى






Ashraf Kerima
رد مع اقتباس
  #5  
قديم 06-06-2012, 02:28 PM
الصورة الرمزية borio1704
borio1704 borio1704 غير متواجد حالياً
من انا؟: أعشق السيارات، أحب اليابانية، الكورية، ولا أفضل الأوروبية
التخصص العملى: استشاري نظم جودة
هواياتي: السيارات - الكمبيوتر
 
تاريخ التسجيل: May 2011
الموقع: جدة - المملكة العربية السعودية
المشاركات: 692
borio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond reputeborio1704 has a reputation beyond repute
نقاش رد: عايز تشتري عربية ومحتار؟؟؟؟ تعالى أقوللك إزاي تختار


المشاركة الأصلية كتبت بواسطة mffg مشاهدة المشاركة

تسلم ايدك موضوع متعوب عليه و مكتوب بصورة منظمة و شاملة كل النواحى اللى بتشغل بال اى مشترى شكرا ليك و انا استفدت من كلامك و اخذت نسخة على الوورد و احتفظت فيها لارسالها لاصحابى للاستفادة و الدراسة قبل شراء اى سيارة و لكن ارجع و اقولك مفيش عربية فيها كل اللى الواحد بيحلم بيه حتى لو معاه مبلغ كبير و ممكن يشترى عربية غالية برضوا مش هيكون فيها كل اللى بيحلم بيه لازم تكون فيه حاجة يضحي بيها مقابل حاجة مفيش عربية كاملة حتى السيارات الفارهة جدا - و كمان هتلاقى اذواق الناس تختلف - يعنى ممكن واحد يحب سيارة و يشوفها احلى سيارة و غيره يذم و يسب فيها - و لكن هناك قاعدة عريضة من الصفات المشتركة عند معظم الناس هى التى تجعل فئة كبيرة من الناس تشترى نوع معين من السيارات و تنتشر فى الشوارع زى الارز و التصبح سيارة من السيارات الشعبية - شكرا لمجهودك

أشكرك على ردك... وأنا معاك إن مسألة الأذواق دي مالهاش قواعد... وكمان مسألة الاعتقادات الشخصية في ماركات معينة

أنا مثلا ما بحبش العربيات الأوروبية بشكل عام... وعندي أسبابي اللي ممكن أقنعك بيها.. إنما لو عايز تختار مش حفرض عليك رأيي.

أنا غرضي بس من الموضوع إننا نحاول المقارنة والاختيار على أساس موضوعي ومنطقي ... مش مجرد فلوس... لإني بصراحة بلاقي ناس بتقارن عربيات لا يمكن تتقارن مع بعض

تخيل لما تلاقي ناس بتقارن العربيات دي مثلا:
  • مقارنة دايهاتسو تريوس مع شيفروليه كروز
  • مقارنة كيــا ســول مع لانسر شارك
  • مقارنة هيونداي إيلانترا مع نيسان قشقاي
  • مقارنة كيا كارينز مع هيونداي أكسنت

إزاي أقارن العربيات دي مع بعض وهم أصلا في فئات مختلفة واستخداماتهم مختلفة والناس اللي المفروض تركبها مش زي بعض!!!!!!!!!!!!!!

من وجهة نظري ... انتشار عربية بعينها في مصر مالوش ارتباط بكون العربية دي كويسة ولا لأ... هي أساسا مسألة اقتصادية وضعف فهم من الناس بشكل عام.

سامحني... احنا في مصر فعلا لسه ما عندناش ثقافة كافية في العربيات... وبنعتمد على آراء غيرنا بدون تفكير ... يعني مثلا مجرد إن حد يطلع إشاعة على عربية إنها وحشة في حاجة معينة (ثبات مثلا) تلاقي الإشاعة انتشرت بشكل رهيب والعربية بقت سمعتها زي الزفت... مع إن اللي قرر ما يشتريش العربية بسبب الإشاعة دي هو نفسه ما يعرفش يعني إيه العيب ده ولا تفرق معاه أساسا.... والعكس صحيح ... يعني اللي اشترى العربية بسبب إشاعة في صالح العربية ما يعرفش المميزات ولا تفرق معاه برضو.

ولا حضرتك رأيك إيه؟؟؟



...
رد مع اقتباس
إضافة رد

الكلمات الدليلية
مطلوب شراء سيارة, دليل

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع

 MasrMotors غير مسؤول عن أي اتفاق تجاري أو تعاوني بين الأعضاء
التعليقات المنشورة لا تعبر عن رأي MasrMotors ولا نتحمل أي مسؤولية قانونية حيال ذلك ويتحمل كاتبها مسؤولية النشر


الساعة الآن 10:59 AM.


Powered by vBulletin® Copyright ©2000 - 2024, Jelsoft Enterprises Ltd.
www.MasrMotors.com ™ Copyright ©2008 - 2024
Egyptian Automotive Community
جميع الحقوق محفوظة - مصرموتورز 2008 - 2017