اسئلة تهم المبتدئين فى عالم السيارات

[mohamed ibiza]

لو انت مثلا بتشتري عربية مستعملة في شوية حاجات لازم تعرفها زي:

1-كبس الموتور كام

2-دواخل فابريقة ولا لا

3-عامله كام كيلو

4-محتاجة مصاريف ولا لا من ناحية(الموتور او قطع الغيار المنفصلة اللي تحت الكبوت زي (موبينا-اسبراتير-بوجيهات-فلاتر-اربه ميه الخ الخ الخ...و من ناحية العفشة تكشف عليها تشوف المساعدين خفيفة ولا لا المقصات ملووحه ولا سليمة البلي ورا و ادام و في عربيات مفهاش بلي ورا و لو جر خلفي يبقي اهم جزء الكارونة و زيت الكارونة تكشف علي زيت الفتيس و لو ناقص تزوده في اي بنزينه...اول ما تشتري عربية مستعلمة تغير علي طول طقم فلاتر(فلتر هوا و بنزين و فلتر تانك و لو فيها فلتر زيت فتيس يتغير برضه) و طقم سيور(سير كاتينة-سير دينامو-سير تكييف لو فيها تكييف) و تكتب سير الكاتينة غيرته امتي و تغيره في حدود 35-40 الف كيلو


الصاج طبعا يكشف عليه سمكري و يشوف الاحواض و الدواخل و عامله حوادث و خبطات شديدة ولا لا و البوهيجي يشوف راشه ولا لا و طبعا لو عربية قديمة يبقي بنسبة 95% هبتقي راشه برا


و هكذا......

[AbOnOrA]

عشرة على عشرة يا محمد مستنين مدرسين تانين يضيفوا شروحات جديدة وطبعا طبعا اسئلة جديدة

اللى عندة اى سؤال يسأل يا جماعة محدش يتكسف بس المهم الاسئلة كلها واسلوب الاجابة يكون فى مستوى المبتدئين ptmnlo123per122

[Nissan]

بسم الله الرحمن الرحيم
اولا اهلا بيك معانا يا أ / GOLDER اول سؤال كان العربية بتشتغل إزاى
بس انا هبدا من حيث النهاية و هجاوب على السؤال العربية بتوقف إزاى
و إختيارى للإجابة على السؤال ده لأنه أسهل سؤال و اوعدك بإذن الله إنى أكمل كل الاجابات على كل اسئلتك بالتسلسل
العربية بتوقف إزاى
شوف يا سيدى لو العربية مانيوال يعنى انت اللى بتتحكم فى سرعة العربية عن طريق تعشيق الفتيس يبقى هتلاقى 3 دواسات الدواسة اللى فى النص دى دواسة الفرامل
و لو العربية اوتوماتيك هتلاقى دواستين بس الدواسة اللى على شمالك دى دواسة الفرامل
و بكدة نبقى عرفنا معلومة بسيطة قبل ما نشرح الفرامل و هى ان العربيات الاوتوماتيك فيها عدد 2 دواسة اليمين دواسة البنزين و الشمال دواسة الفرامل
و كمان العربيات المانيوال فيها 3 دواسات اليمين دواسة البنزين و اللى فى النص الفرامل و الشمال دواسة الدبرياج و الدبرياج شرحة بالكامل فى سلسة الإجابات على سؤالك فى حلقات قادمة إن شاء الله
نرجع تانى لموضوع الفرامل
بإختصار شديد لا نستطيع إيقاف كتلة فى وزن السيارة و على السرعات العالية بقوتنا العادية لذلك لجانا الى عمل تكبير لهذه القوة ( ضغطة قدمك على بدال الفرامل ) عن طريق الفرق فى المساحة بين المكبس الرئيسى و المكابس الفرعية و هى قاعد قديمة جدا إكتشفها العالم باسكال و نظريته تقول ان كل النقط على مستوى افقى واحد تتعرض لنفس قيمة الضغط
فإذا رمزنا بالظغط Pressure بالرمز P و القوة Force بالرمز F و المساحة Area بالرمز A فمن المعروف ان P = F / A اى ان الضغط يساوى القوة مقسومة على المساحة
فإذا كان هناك نقطتين تتعرضان لنفس الضغط فإنه تكون F1 / A1 = F2/A2 حيث ان الرمز 1 يدل على النقطة الاولى و الرمز 2 يدل على النقطة الثانية فإذا كانت A2اكبر من A1 فمن المنطقى ان تكون F1 اكبر من F2 و لو إعتبرنا ان قوة قدمك F2 ستكون F1القوة المؤثرة على السيارة لإيقافها
و بتتكون دائرة الفرامل من الاتى :
1 الماستر الرئيسى و بيكون مكانه فى الامام اول لما تفتح الكابود على ايدك اليمين و تحت علبة زيت الباكم و ده هوا الإسطوانة الكبيرة
2 البوستر او السيرفو و بيكون خلف الماستر العمومى و هو عبارة عن حلة كبيرة او طبق كبير بيساعد فى زيادة القوة الفرملية عن طريق غستخدام فرق الضغط لناتج من خلخلة المحرك
3 خزنة زيت الباكم
4 تيل فرامل امامى و هو عبارة عن لقم بتمسك الديسكات الامامية لوقفها عند ضغطك على الفرامل
4 تيل فرامل خلفية و هو عبارة عن لقم بتمسك الطنابير الخلفية و التيل بصفة عامة مصنوع من الإسبستوس و دى مادة خطيرة جدا جدا بتسبب أمراض كتير و لذلك لو واقف جنب ميكانيكى بينضف ديك او تيل ابعد عنه فورا
4 ماستر فرامل أمامى و طبعا عددهم 2 على كل عجلة امامية بيوجد واحد
5 ماستر عجل خلفى و بردو عددهم 2 على كل عجلة خلفية بيوجد واحد
6 انابيب و مواسير بتمشى فيها زيت الباكم
7 دواسة الفرامل و شوية روافع بسيطة عشان نزود القوة الفرملية
و كفاية كدة عشان انا صدعتك و لو عندك اى سؤال فى الفرامل مستنى إجابتك قبل ما ابدا فى موضوع تانى

[Nissan]

http://www.masrmotors.com/vb/showthread.php?t=2742


و ده بالمناسبة لينك لموضوع مكتبة الفيديو المتميزة شوفه و هيكون مفيد جدا إن شاء الله

[AHMEDCAR]

بصراحه انا دخلت و قولت قشطه الواحد هايكتب كلمتين و يعبر عن نفسه و بعد ما كتبت فايل الوورد و كان جاهز لقيت الاستاذ ايور نورا

غاشش منى و كاتب كل اللى كنت هاقوله طيب ده اسمه كلام يا ابو نورا سؤال هو انت عامل هاكر على الجهاز بتاعى ولا ايه


بصراحه موضوع رائع و احب احى صاحب الموضوع على فكرته بجد فكره رائعه


اسمحولى اجاوب بقى على انواع الاعطال اللى مممكن الواحد يواجهها مع العربيه

1- تلف ترس البندكس اللى موجود فى المارش (بيبوظ لما بنحمل على المارش كتير او اعاده اداره السياره و هيه مداره اصلا )

2- انسداد فلتير البنزين ( بسبب ترك تنك البنزين فارغ دائما و)لتفادى الحكايه دى خلى عداد البنزين بتاعك لما يجى على الربع يبقى كده تروح تمون على طول

3- تلف طرمبه البنزين (نفس السبب السابق )

4- لو موتور بتكنولوجيا قديمه يبقى بيكون فيه ابلاتين و كوندنسر (الموسؤلين عن الكهربه داهل الاسبراتير و دول بيبوظوا كل فتره كبيره اوى (ماتحطهمش فى بالك اوى ) ابقى غيرهم كل 25000 و ريح بالك تمنهم الاتنين على بعض لا يتجاوز ال25 جندى

5- البوجيهات (نفس التعليل السابق ) بس البوجيهات بتبقى موجوده فى جسم المحرك و هيه المسؤله عن احتراق البنزين و دى بتتغير كل 10 الاف او 20 الف كيلو و برضو ب 25 جندى

6- طرمبه المياه (بتبوظ فى حاله و ضع مياه من الحنفيه فى السياره او فى حاله وجود صداء فى دوره التبريد ) و اعرضها سخونه المحرك مع نقص فى المياه
خلى بالك نقص المياه ليه اسباب كتير منها عدم ربط كويل الوصلات بين الريتادير و المحرك باحكام او انسداد الريتادير

7- بلى العجل (اعرضه انك بتسمع صوت خشونه و انت ماشى بالعربيه ) لازم تغيره على طول علشان العجله ماتسيبش العربيه و تمشى لو حدها

8- تيل الفرامل (سماع صوت صفاره اثناء الضغط على دواسه الفرامل ) و حلها بيكون بتغيير تيل الفرامل

9- العربيه مش بتدور الصبح (اكشف على البطاريه )

10- الزيت بتاع العربيه بقى لونه عامل زى الطحينه (يبقى جوان وش السليندر ضرب يمعلم بسبب سخونيه المحرك الزياده عن اللزوم

11-لمبه اليطاريه بتنور (اكشف على الديناموا ) علشان هو اللى مسؤل عن شحن البطاريه

12- لمبه الزيت نورت (بمجرد ما اللمبه دى تنور تقف مكانك على طول لانك لو مشيت بالعربيه الموتور ممكن يقفش منك

13-لمبه الفرامل نورت (اكسف على التيل و كمان على مستوى زيت الفرامل )

و بكده اكون جاوبتك على النقطه الثالثه و الرابعه