مشكله بخصوص الترخيص ..

[jaxjax]

السلام عليكم ورحمه الله وبركاته

تحيه طيبه وبعد ..

الموضوع غريب شويه بس ياريت اقدر الاقي الحل عندكم ..


انا قبل الثوره ربنا كرمني وجبت عربيه كيا
رحت رخصتها
وهي نازل فيها الفاميه فبريكه خلفي
وطبعا ده مثبوت في شهاده البيانات
فكده مافيش مشاكل
رحت المرور رخصت .. والراجل اللي بيكتب الرخصه
نسي يكتب في الرخصه فاميه
رجعتله تاني .. قالي هنعطلك علي مانغيرهالك
وكده كده مثبوته في شهاده البيانات ماتخفش .. لما تيجي ترخص تاني هنثبتهولك
بصراحه " هو غلطي " سبته ومشيت

قامت الثوره .. الملفات كلها ولعت .. شهاده البيانات اللي فيها فاميه راحت

والرخصه ال معايا مافيهاش فاميه
رحت ارخص تاني بعد الثوره .. قالو لازم فحص من الاول .. عادي مافيش مشاكل
فحصت .. لاقيت المهندس بيقولي الفاميه
قلتله ده فبريكه وشوف بنفسك
قالي مش مثبوت في الرخص
حكتله الحكايه .. قال لأ مش هثبتهولك
قلتله وانا اعمل ايه لو ده لزق قدامك شيله
قالي هات مايثبت " واضح ان الثوره لسه ماجتش عنده "

المهم قالي اتصل ع الشركه بتاعت كيا
وخليهم هياخدو بيانات العربيه .. رقم شاسيه وماتور
وهيبعتولك مايثبت ان العربيه دي خارجه اصلا من الشركه فاميه فبريكه
واحنا هنثبتهولك هنااااا

والعربيه خليجي مش وكيل


حد عنده اي طريقه اقدر اكلم شركه كيا الاصليه عشان اطلب منهم حاجه زي دي ؟
ولا اعمل ايه بالظبط لو في طريقه تاني اسهل ؟؟؟


طولت عليكم معلش

[طوفة]

اكسر الزجاج امامه عشان يصدق انه وضع بلاده وان العربية خليجى مفيش فايدة الروتين الى بيأخر البلد مازال موجود مع ان المفروض

النظام اتغير احنا كمان لازم نتغير

حاول بقه ترجع للماضى وتشتغل بالوسطة انا معروض عليا

ادفع 200 ج رشوة لواحد فى المرور ويطلع لى رخصة

مثبوت فيها فاميه كامل وانا قلت لا لازم احنا كما نتغير

[romioromio]

مبحبش الموضوع ده ولا اللي بيعملوه لكن مضطر اقولك هي الواسطه مفيش غيرها بغباوتها ووشها العكر

لو حاولت تشوفله حد معرفة بس متدفعش رشوه ............حاول

[jaxjax]

المشاركة الأصلية كتبت بواسطة طوفة اكسر الزجاج امامه عشان يصدق انه وضع بلاده وان العربية خليجى مفيش فايدة الروتين الى بيأخر البلد مازال موجود مع ان المفروض النظام اتغير احنا كمان لازم نتغير حاول بقه ترجع للماضى وتشتغل بالوسطة انا معروض عليا ادفع 200 ج رشوة لواحد فى المرور ويطلع لى رخصة مثبوت فيها فاميه كامل وانا قلت لا لازم احنا كما نتغير

المشاركة الأصلية كتبت بواسطة romioromio مبحبش الموضوع ده ولا اللي بيعملوه لكن مضطر اقولك هي الواسطه مفيش غيرها بغباوتها ووشها العكر لو حاولت تشوفله حد معرفة بس متدفعش رشوه ............حاول

يعني موضوع اني اكلم الشركه ده ويبعتولي حاجه تثبت انها فاميه فبريكه .. مافيش ؟؟؟؟

انا مدفعتش جنيه واحد في الترخيص وانا برخص المره دي ,,
عشان اثبت حاجه حقي بقي .. ادفع برضو !!!

[محمد فيصل]

ممكن محاولة ان تنجح
اذهب للتاجر الذى قمت بالشراء منه
من المؤكد ان يحتفظ بنسخة من اصل الافراجات الخاصة بالسيارات التى قام ببيعها
خذ صورة منه
اذهب بها الى جمارك السيارات لتحصل على ختم صورة طبق الاصل
عد مرة اخرى للمرور وجرب
ان شاء الله خير
ولا يوجد مانع من مراسلة الشركة الام والحصول على جواب مواصفات للسيارة طبقاً للبلد التى تم الاستيراد منها
ثم قم بترجمة المواصفات اذا كانت باللغة الانجليزية ووثق هذا الورق من مكتب تصديقات وزارة الخارجية
والله الموفق
متابع معك