هل و انت بتلف ملف بتفضل فى حارتك و لا بترمى لجوه

بزمتك يا ابوحميد بتشوف في امريكا السيرك اللي بتشوفه هنا احنا بجد المفروض يعدمونا في ميدان عام لا وزعلنين اوي ان اللي بيمشي عكسي بيتحبس 6 شهور ويتغرم من 1000 الي 3000 جنيه ده المفروض يعدموه مش يحبسوه

[خالدخليفة]

المشاركة الأصلية كتبت بواسطة احمد على 1999 طبعا المفروض و انت بتلف ملف تفضل فى حارتك لان لو افترضنا ان الحارات كلها مليانة و الملف يمين مثلا لو الى فى اقصى الشمال دخل الحارة الى يمينه و هو بيلف يبقى الى يمينه حيعمل زية لغاية اخر واحد الى هو فى الحارة اليمين المفروض يعمل ايه ( يخش فى السور و يظهر فجاة من الناحية التانية فى الحارة الى فى اقصى الشمال زى لعبة SNAKE) انا عارف انه موضوع اكثر الناس مش متعودين عليه و بالفطره بيرمى لجوة ( زى سواقين ال فورميلا 1 ) لكن على الاقل فى طريق جديد زى الحتت الى اتجددت على الصحراوى نحاول نعمل كده انا مش حتكلم على الى بيمشوا فى حارتين واخدين الخطوط فى نص العربية ( ربنا يهديهم ) ممكن يكونوا فاكرين ده الصح طبعا جوه البلد خطر تلتزم بحارتك لان الشوارع محتاجة اعادة تخطيط منطقى مش رسم على الارض و خلاص دنا ساعات بشوف حارات بتضيق او تختفى فجاه فى رصيف ( يعنى دعوة من ادارة المرور لركوب الرصيف ) علشان كده انا بتكلم على الصحراوى الى اتجدد فيه حتت ( و معظم الطريق الدائرى )عقبال باقى شوارعنا انا بتهيالى زى ما بنشوف فى MBC ACTION برامج مطاردات البوليس الامريكى لناس بيسوقوا بطريقة الشعب كله عندنا بيسوق بيها يعنى لو جابولنا بوليس امريكا حيجيلوا انهيار عصبى و حيقتل فينا او حيجروا ورا الى بيسوق زيهم علشان ينقذوه من الاخطار المحيطه به من كل جانب انا اسف على اسلوب السخرية بس انا و الله بحب بلدى و نفسى نكون نستاهلها و انا عن نفسى بحاول اسوق بطريقة منطقية بقدر الامكان و بالتمس العذر للاخرين و اديهم فرصة ( بفضلهم على نفسى بما لا يعرضنى و الاخرين للخطر ) و نفسى الناس كلها تعمل كده فى النهاية عايز احذر ان من ضمن اكثر الحاجات الى حتدخل الناس النار ( السواقة )

اولا / والله ياشيخ الكلام اللى بقوله ده انا بعمله هنا فى مصر مش فى امريكا
المفروض انك فى المنحنيات الخطرة او غير الخطرة تلتزم بالحارة متخرجش منها حتى لو الطريق فاضى
لكن دى عادة سيئةة عند كتير من الناس ولذلك لانى عارف العادة دى وبلتزم بحارتى دايما فى الملفات متوقع حد هيكسر عليا فايدى دايما قريبة من الكلاكس بمعنى انى نفسيا مجهز نفسى انى ادوس كلاكس وقبل الملف بمسافة بسيطة كلاكس خفيف كده انبهه يلتزم بحارته
ثانيا / اللى بياخد الخطوط فى نص العربية (بيمشى فوقها يعنى) ده اصلا نفسيا خايف من كل اللى حواليه وده بناء على كلام سالته لناس كتير نفس السؤال( انت ماشى فوق الخط ده ليه ) فيقول علشان ميحرجش نفسه // كده احسن ومش عارف احسن فى ايه غير انه يضيق الطريق كل الحكاية انه مش عايز اللى جاى من الشمال يعدى منه بسرعة لانه بيخاف وخايف حد يطلع له من على اليمين طيب سعادتك راكبها ليه
وانا شخصيا اعرف ناس مبيجيبش زيادة عن الغيار التانى ابدااااااااا ولو جاب التالت تبقى دى مغامرة لاتزيد عن 5 دقايق يعنى بالبلدى بيتمشى
ثالثا / اخى العزيز الحارة مش بتختفى فجأة ولاحاجة لان اللى بيخططو للاسف ناس فاهمين واحنا اللى كتير مننا مبياخدش باله
حكاية الحارة اللى بتختفى نشرحها لك
المسالة بسيطة الخطوط اللى على الارض نوعين متقطع او طويل زى كده (- - - - )او كده(ــــــــــــــــــــ) المتقطع بيقسم الطريق حارات والطويل معناه نهاية الطريق الطويل ده بقى بتلاقيه مايل يعنى مش مستقيم ولو لاحظت ملحوظة صغيرة مش هتلاقيه موازى للطريق خارج الخط هتلاقيه مايل عليه ده معناه ان الطريق ده هينتهى على مفيش او الخط ده هيبقى اخره رصيف او جزيرة لكن لو موازى للجزيرة او للطريق خارجه يبقى الطريق هيكمل عادى وانا اتخميت فى الحكاية دى قبل كده و دى هتلقاها على الطريق الزراعى لبنها مع نهاية كوبرى قليوب على الشمال ولذلكك لما تلاقى خط طويل مايل تفهم ان اخره الطريق هيضيق
هقول لك نكتة بقى مرة بسال سواق ميكروباس بقى له 10 سنين رايح جاى القاهرة / اسكندرية هيا الخطوط دى لازمتها ايه قال والله دى ناس حرامية عايزين يشغلو مصانع البوية وخلاص بقول له يعنى ملهاش لازمة قال / خالص فقلت له طيب ليه بيرسموها واحد متقطع وواحد طويل ميرسموهم بطريقة واحدة وخلاص فقال بغرور قاتل / لا فى فرق المقطع ده ياباشا علشان تخليه فى نص العربية بقول له والطويل فقال ده بقى ملوش لازمة // طبعا مش فاهم حاجة وبيألف لكن فوجئت ان كتير فاهمين زيه لكن فى كل الاحوال لازم تلتزم بالحارة فى اى مكان اعتقد بعد مسالة الخط المايل هتعرف ليه الطريق بيختفى فجأة
ارجو انى اكون وضحت لحضرتك

[احمد على 1999]

شكرا يا استاذ خالد

[Dr.A]

المشاركة الأصلية كتبت بواسطة احمد على 1999 انا مقتنع ان يوم القيامة الواحد ( الا من رحم ربى ) حيلاقى الاف الناس هو ميعرفهمش ماسكين فيه كله عايز ياخد من حسناته لغاية ما تخلص و يدولوا من سيئاتهم الناس ديه اتشتمت فى الشارع او اتزنق عليها او اضربت او اتهزات او اتبلى عليها او اتغلس عليها او اتريق عليها او اتكبر عليها و حاجات تانية كتير بقت روتينية فى طريقة تعاملنا مع بعض فى الشارع انا ساعات احس انى لوحدى و الكون متمحور حولى و الناس التانية دى ديكور لزوم العيشة المهم انا و المفروض لما انزل اقابلهم فى الشارع الكل يوسعلى و يقدر ظروفى و يتكلم بشويش معايا محدش ظروفى زيى طبعا لو انا كده ابقى فى كارثة و ساعات احس ان الناس على شعره و حتاكل بعض فى الشارع زى افلام السعار ( الناس حتتسعر بسبب مرض مجهول و حيبتدو يعضو بعض ) ابتدت الاعراض تظهر بس احنا مش حاسين

احسنت
و جزاك الله خيرا

[خالدخليفة]

المشاركة الأصلية كتبت بواسطة احمد على 1999 شكرا يا استاذ خالد

العفو يااستاذ احمد ده واجب عليا هو فى اضافة صغيرة بس
ان الخط الطويل معناه نهاية الطريق من الجانبين طيب لو هو فى نص الطريق يبقى معناه ان الطريق اتجاهين طيب لو الطريق اتجاه واحد يبقى معناه ممنوع التخطى فى الجزء المرسوم فيه او احتر س الطريق فى الجزء ده اتجاهين