رسوم تسجيل فيات 132

[Mohamed_83]

السلام عليكم ورحمة الله وبركاته

الحمد لله ربنا أكرمني واشتريت عربية فيات 132 موديل 73 موتور 1800 CC الرخصة كانت منتهية بس لسه الفحص 2013

المالك الأصلي طبعاً طلع شهادة بيانات وجاب براءة الزمة وكمان دفع ضريبة 420 جنيهاً وبعد كده رحت الشهر العقاري وعملت عقد بيع سيارة

إن شاء الله بكرة انا هروح المرور"مرور المنصورة" واعمل نقل ملكية وفحص مع العلم ان العربية مفيش فيها طفاية
كنت عاوز اعرف ايه هي الضريبة دي اصلاً اللي المالك الأصلي دفعها والرسوم كام في الحوار ده كله بالشاي طبعاً
وهل هدفع الضريبة دي تاني ولا ايه ورسوم رخصة سنة تبقي بكام

حاجة كمان عاوز اعمل توكيل لأخويا يسوق العربية بالرخصة بتاعتي بيتعمل فين وهل بيكون بعد نقل الملكية والفحص ولا ممكن قبلهم

ياريت الرد انهاردة عشان ابقي نازل بكرة عارف هعمل ايه وجزاكم الله خيراً

[Mohamed_83]

بما أني الحمد لله رحت انهاردة الصبح وخلصت قول لازم أفيد غيري عشان يبقي عنده فكرة وخلصت كل حاجة وكانت العملية ولله الحمد ميسرة جداً

وصلت هناك 8:45 صباحاً دخلت جبت ملف نقل ملكية ومعاه ورق الفحص وده بـ 35 جنيهاً

أول حاجة فحصت وطبعاً الشاي مهم للفني بـ 20 جنيه اصله شاي سياحي
وأوعي المهندس تشربه شاي هتتشيع

بعد كده اشتريت طفاية لاني معييش طفاية اصلاً ودي وزنها 1 كيلو بـ 130 جنيهاً
وطبعاً الشاي مهم 5 جنيه

وبعد كده عملت 3 شهور زيادة علي التأمين وملحق للتأمين اللي انا عامله اصلا دي عاملة 60 جنيهاً ومحدش يسألني ليها 3 شهور زيادة وايه ملحق التأمين لأن الموظف طبعاً كان مخنوق ومش عاوز يفهمني

بعد كده رحت للموظف تاني قالي روح ادفع 300 جنيه وتعالي علي اما رحت وجيت طلعت الرخصة سنة
وخلصت الحمد لله كل ده خلص علي الساعة 11:10 صباحاً

واللي طول في المدة دي الموظف مش الفحص زي ما الناس فاكرة الفحص خلصت بالظبط 10 دقائق

بالنسبة للتوكيل سألتهم قالوا في الشهر العقاري وبيتكلف 55 جنيهاً لما ربنا يأمر أروح أعمله مع انه ملوش لازمة غير إدارياً

أرجوا من الله أني قدرت أوصلكم ولو معلومة تقدر تفيدكم في القادم

[hyundai 2005]

تسلم ايديك واسف جدا لسه شايف الموضوع الف مبروك علي العربيه ربنا يديك خيرها ويكفيك شرها

[Mohamed_83]

المشاركة الأصلية كتبت بواسطة hyundai 2005 تسلم ايديك واسف جدا لسه شايف الموضوع الف مبروك علي العربيه ربنا يديك خيرها ويكفيك شرها

اللهم استجب وتقبل وجزاك الله خيراً

[shawki85]

دفعت قد ايه بقى الضريبة بالظبط وكلفك كام الموضوع كله