|
#6
19-08-2012, 08:57 AM
|
||||
|
||||
رد: من كتاباتى فى زمن المخلوع (( متجدد باستمرار ))
تم نقل الموضوع للاستراحة
__________________
لا اله الا الله ..... محمد رسول الله
سبحان الله وبحمده عدد خلقه ورضا نفسه وزنة عرشه ومداد كلماته وصلى اللهم على سيدنا محمد وعلى آله وصحبه وسلم 
|
|
#7
20-08-2012, 04:46 AM
|
||||
|
||||
|
رد: من كتاباتى فى زمن المخلوع (( متجدد باستمرار ))
وطنى
رسمنا على القلب وجه الوطن نخيلا ونيلا وشعبا اصيلا علا صوت الزميل العزيز بالضحك .. واختلطت الاصوات الخارجه من فمه مع تلك الخارجه من انفه -ياااااااااااااه انت لسه فاكر ؟؟؟؟ كان زميلى العزيز من النوع الذى يؤمن بأن للحوار طرف واحد فقط وان النقاش لا يعنى اكثر من عرض رأيه الشخصى وكان حديثه دائما حافل بذكر مختلف الديانات وذكر كل اباء وكل امهات من نتحدث عنهم ولذا لم اشأ ان اغير له مفاهيم لطالما اجتهد فى ترسيخها كنا عائدين من الاسكندريه فى الطريق الصحراوى الطويل المظلم كان مرهقا للغايه واصر ان اتولى انا قيادة سيارته التى يعلم الله وحده انها تحتاج لهيئة اركان كامله لقيادتها اشترطت عليه ان يطفىء جهاز التسجيل اذا ارادنى ان اقود بدلا منه ...قبل على مضض المهم اننى اقود هذه السياره بلا صوت ينبعث من جهاز تسجيلها صديقى لم يكن مصاب بفساد فى اللحميه او فى اللسان فقط بل كان نصيبه الاعظم من الفساد فى الذوق فبعض المطربين الذين انبعثت اصواتهم من هذا الجهاز كانوا يطلبون اشياء غريبه ....اتصور انها فى غايه الوقاحه اضافه الى اننى اعتبر طلباتهم بها الكثير من التجاوز احدهم طلب منى ان اقف وانا اتكلم معه والاخر انهمك فى القسم بأمه على انه لن يتركها وثالثتهم قالت لى صراحة بدون اى مواراه فى الكلام ...طيب ورينى ..., يا نن عينى لذا كان من الافضل ان يذهب جهاز التسجيل بما يحيويه الى الجحيم ولكى استمتع بالهدوء فى المكان على ان ادندن بعض الكلمات بصوت خافت بين الحين والاخر ثم خطر على بالى النشيد الوطنى الشهير ...رسمنا على القلب وجه الوطن فما كان من الزميل العزيز الا ان افاق من غيبوبته واسمعنى مافيه النصيب مما لا احب ان اسمع وعاد الى سباته مره اخرى وظل النشيد على لسانى لمده طويله رسمنا على القلب وجه الوطن ..... لماذا كان الوطن جديرا برسم وجهه على قلوبنا ؟؟؟ ماذا قدم لنا هذا الوطن ...او بمعنى اخر ما الخدمه التى اسداها لنا هذا الوطن ؟؟؟ اعرف اننى احب ابى حبا جبريا لا اختيار فيه واننى اطيعه وابره كفرض الهى لا استفسار فيه احيانا ما احاول تقديم اسباب لا احتاجها او اجابة اسئله ليست ذات اهميه فمثلا اعتبر ان حبى لابى نتيجة حبه المفرط لى وتضحياته الكثيره من اجلى واهتمامه وقلقه عليْ وعلى مستقبلى وهذا فى النهايه يؤدى الى اننى يجب ان اطيع هذا الرجل وان اقدم له كل ما يطلبه منى وان افتديه بروحى ان امكننى ..... وهكذا اقدم اجابة منطقيه على الاقل بالنسبة لى ولكننى كنت ابحث عن اجابه اخرى لماذا احب وطنى ؟؟؟؟؟ ولماذا كتب العزيز فاروق جويده هذا النشيد هل كتبه من باب النفاق .. ؟؟ وان كان منافقا ...فمن كان ينافق وهو يكتب هذا النشيد ؟؟؟ هل ينافق الوطن الذى ليس له شكل او كيان مادى ليحمد له هذا التملق ويكافئه عليه ام انه عندما ينافق هذا الوطن سيجازى بالخير من القائمين على امر هذا الوطن ؟؟؟ ولكننى عدت واستنكرت هذا الاحتمال فلو ارد جزاء على نفاقه لنافق الشخص القائم على الامر ليحصل على الجزاء فيكون الجزاء اكبر وبينما انا غارق فى نظرية المؤامره التى خلقتها لنفسى واستمتعت بالعيش فيها وجدت ان الاجابه ابسط مما اتخيل ان هذا الرجل كتب نشيدا للوطن لانه احب هذا الوطن ما الذى احبه فى هذا الوطن هل احب مصر الموجوده على الخريطه فى شكلها المرسوم ام انه احب الشوارع والحوارى والازقه الضيقه هل احب نيلها وبحريها ام انه احب سماءها وزرقتها ام ارضها وخضرتها ام زبانية عذابها فى السجون .. ام ناهبوا خيراتها طيف الشيطان ام سيف السلطان مسجد اعبد الله فى ساحته الشريفه ام حرمله رماديه مسح عليها بيده الخليفه لابد ان لهذا الانسان من منطق احب به هذه البلد لابد ان له نهج تفكير هداه الى حب هذه البلد الانسان لايحب من يهينه او يعذبه او يلقى على يديه الشر او فى حرمه الذل والهوان رسم الشاعر على قلبه وجه مصر بنخيلها نيلها وشعبها الاصيل اما عن نخيلها فنخيل العراق ابسق ونخيل الحجاز اطيب واما عن نيلها فبالعراق نهران وليس نهر واحد وفى المانيا نهر هو اجمل واطيب واما عن شعبها الاصيل فالشوام اطيب منهم والالمان انشط منهم والفرنسيين اظرف منهم فماذا احب هذا الرجل فى وطنه وجعله يتغنى له ؟ ربما لم يحب وطنه قدر ما احب نفسه ربما احب فى بلاده انها بلاده وليست بلاد اخرى سوى بلاده ربما احب الارض التى ينتمى اليها لانه لا يعرف ارضا اخرى ينتمى اليها ربما احب فى نفسه عيوبها قدر ما احب مافيها من مميزات لاننى وجدت اننى احب ابى على الرغم من انه ليس افضل اب فى الوجود وليس اوسمهم ولا اغناهم ولا اعلاهم قدرا ولا ارفعهم مكانه لكنه ابى مازلت قانعا انه ابى ولذا مازلت احبه لانه ابى ولان الله الذى هو اعلم منى جعله ابا لى وجعله سببا فى وجودى ولست ارى افضل مما كتب الله لى كى احب رجلا اخر اكثر مما احب ابى وادعى اننى رأيت فيه ما استوجب حبى له اكثر من هذا الرجل المدعو ابى ربما وجد الكثيرين ممن يكرهون هذه البلد ويتمنون لها الخراب ولأهلها الهلاك فأحب ان يكون غيرهم احب ان يختلف عن غيره ممن ليسو اهلا للدار اذا جرد لسانه كاتبا فى سبها ولعنها ...فمن يكتب لها ..وعنها ان الله قد سخر لها من الاعداء ومن الكارهين من هم فى شغل شاغل لها من اعدائها ومن ابنائها الذين جحدوا فضلها فما العائد على من سبها ولعنها وقد تفرغ غيرى لهذا الوظيفه واذا كان فى بلدى من يسرقها من ابنائها ومن ينهبها ومن يشتمها ومن يلعنها فلماذا لا اكون شخصا اخر ؟؟؟؟ الجمال والقبح لم يكونوا يوما اساسا للحب والكره لذا فاننى رسمت على القلب وجه الوطن لانه ببساطه ........... وطنى استمتعت بهذا الاستنتاج البدائى الذى وصلت اليه نعم وبدت مشارف القاهره تبدو من بعيد ..... انا احب هذه المدينه الملعونه المزدحمه التى لا تخلو من الناس ابدا ليست باريس ولا فيننا ولا امستردام لكنها بلدى ولذا احبها فأنا عندما انظر الى المراه اجد شخصيا بالتأكيد ليس اكثر من احب النظر اليه لكنه ببساطه انا ولذا يعجبنى شكله كثيرا ووطنى ايضا احبه كثيرا ولا انتظر وساما من اى طبقه بعد هذا التصريح الهام ولا اتوقع مليم زياده فى راتبى المتواضع لكننى ببساطه لا اعرف مكانا اخرا ادعوه وطننا سواه استطيع ان احب الف مكان فى الارض لكننى لو سألنى احدهم عن بلدى فسأجيب اننى انتمى الى هذا البلد ما قيمة ان احب مكانا لا انتمى اليه وان اكره مكانا مهما حاولت هو مكانى ما قيمه ان اعيش فى مكان ما فأنسى مكانا اخر وادعى اننى بدأت من مكانى الجديد ايعنى هذا اننى بلا ذاكره ايعنى هذا مثلا اننى لو مررت فى نفس المكان الاول سأستكشفه كأننى امر به لاول مره ؟ اعتقد ان هذا غير صحيح واعتقد اننى ازددت حبا لهذا الوطن لانه ببساطه .............. وطنى
__________________
 أعتذر عن خطأ غير مقصود منى فى حق محمد تونسى
|
|
#8
22-08-2012, 05:28 AM
|
||||
|
||||
|
رد: من كتاباتى فى زمن المخلوع (( متجدد باستمرار ))
انتهت المباره ..
فى هذه اللحظه اعزائى المشاهدين انطلقت صفارة حكم المباراه لتعلن نهاية الوقت الاضافى والمباراه وتعلن ايضا فوز منتخب الجزائر الشقيق على منتخب مصر الشقيق وتأهل الاولى لنهائيات كأس العالم فى جنوب افريقيا . بس عادى يعنى ... لا شىء يهم على رأى عمنا احسان عبد القدوس صمت تام فى المقهى ... بعض الاصوات الخافته ...... قليل منها صادر من افواه واكثرها صادر من الانف لعنات لا حصر لها تتنزل على رؤوس الاعبين والمدير الفنى والجمهور المصرى الذى ذهب الى المباراه ثم يتحول المقهى الى منتدى للنقاد الرياضيين الذين يثبتون كل لحظه ان الثمانيين مليون مصرى يصلحون لمنصب المدير الفنى لمنتخب مصر حتى البنات ...!!!!!!!!! اه والله حتى البنات .... سمعت احداهن تقول فى غيظ واضح (( هوا ما طلعش عماد متعب ليه .... ده قصيير اوى )) !!!!!!!!! ودقائق اخرى ويخلو المقهى تقريبا . ما الذى اصاب هؤلاء الناس ؟؟؟ انها ليست اكثر من ليله تعيسه اخرى .... عادى يعنى ثم لا شىء يهم على رأى احسان عبد القدوس اخرج من المقهى بصحبة الصديق الصدوق الاسبانى كارلوس بيربيل الذى كان فى قمة الاسف والحزن على ماجرى كان يربت على كتفى كل دقيقه تقريبا قائلا بعربيته الكسيحه ((معلش معلش ... هوا كرة القدم كده ..)) شرحت لهذا المعتوه اكثر من مره اننى لست حزينا ... اليوم الذى تتسبب فيه مباراة كره قدم فى حزنى هو حتما يوم اعيش فيه كانسان حر فى وطن حر يحكمه القانون اليوم الذى ستتسبب فيه مباراة كرة قدم فى حزنى هو حتما يوم استطيع ان افخر فيه بعروبتى واستطيع ان اسافر لاصلى فى المسجد الاقصى وانا اكل من خير بلدى لا من معونة الاخوه ابنا ال .... العم سام اليوم الذى لا اعانى فيه وثلثى شعبى من الفشل الكلوى والفشل الكبدى والفشل الرئوى اشياء كثيره للغايه تجعل حياتى مرتع للاحزان اكثر من مباراة مصر والجزائر لكنه كان مصرا كالتيفود (( مش مشكله ... احنا لسه كوييسين )) اضحك على الرغم منى قائلا (( يا سيدى احنا اصلا مش كوييسين .., عشان كده انا مش زعلان احنا ناس عندنا خسائر وهزائم فى كل حاجه فى حياتنا ...واهم من الكوره بكتير .. مش خسارة الكوره بقا هى اللى هتزعلنا ... المفروض اننا اصلا مييتين من الزعل عشان حاجات تانيه كتير )) ولا حياة لمن تنادى .. مازال ينظر نحوى فى اسى ويربت على كتفى رائعون هم هؤلاء الاسبان ..... يشفقون على المصريين من خسارة مباره ولا يشفقون عليهم من خسارة حياتهم نفسها .. عموما .... هو وشأنه اصل معه الى مسكنه القريب من المقهى .... اودعه بعد ان اعتذرت عن قبول دعوته على العشاء نظرا لان لى تجارب سابقه معه فى موضوع العشاء الاسبانى الصحى الذى يصر على تناوله .. اتجه الى بيتى الذى اصبح قريبا للغايه .. خطوات قليله تفصلنى عن منزلى عندما اسمع تليفونى المحمول يرن بنغمه احبها كثيرا لانها النغمه المخصصه للصديق العزيز ... صديقى المتزن (( لو كنت روحت انزلى بسرعه ولو لسه قولى انت فين .؟؟؟)) يعجبنى فى صديقى المتزن انه لا يضيع وقتا فى الكلام الغير مفيد مثل ازيك وعامل ايه وايه اخبارك ... ويعلق دائما على هذه النقطه بقوله .. يا ابنى ما انا بكلمك علشان اقابلك يعنى هقعد لما اسألك عن حالك وصحتك فى التليفون ....لما اقعد معاك هنتكلم فى ايه ؟؟؟؟؟ (( انا عند بيتى يا كبير .. مستنيك )) ويبدو انه كان قريبا من بيتى للغايه فما هى الا دقيقه واحد تقريبا وظهرت سيارته العزيزه التى ركبت فيها وانطلق بنا الى حيث المجهول (( الف مبروك لمصر يا كبير )) اقولها بنيره ساخره متحسرا على ماحدث يبتسم بمرح وهو يرد (( الله يبارك فيك يا شقيق ... عملوا طيب والله )) انظر نحوه بشىء من الدهشه الممزوجه باللوم على رده وانا اقول () دا انت فرحان بجد بقا )) (( طبعا يا ابنى ... اولا الف حمد والف شكر ليك يا رب يعنى لما تيجى تحمد ربنا مش تقول الحمد لله وانت بتسب وتلعن لاء تقول الحمد لله عن قناعه ورضا بقضاء ربنا ثانيا .... خرجنا من كاس العالم .... جميل جدا طيب تخييل اننا وصلنا كاس العالم ...اكيد طبعا بنفس منتخبنا ونفس مديرنا الفنى ... تفتكر لو كنا وقعنا مع فريق درجه تالته زى باراجواى او الاكوادور واو حتى امريكا .... كان هيحصل فينا ايه ....؟؟؟ لاء تخييل مثلا لو احنا اللى كملنا الضلع الرابع فى مجموعة الموت فرنسا .... اسبانيا ... الارجنتين ....... ومصر !!!!!!!!!!!!!! هولندا ..... المانيا ...... روسيا ...... مصر !!!!!!!!!!!! مالك .... بللمت ليه كده ..... طيب استنى بقا ثالثا الجمهور اللى بيتسحل الوقتى فى السودان .... الجزائريين شعب همجى بالفطره افتكر انت عارف لما خناقه بتحصل فى موقف ميكروباص فى الجزاير بيبقا فى بتاع عشرين قتيل الرجاله دول هيضربوا وهما كسبانيين ... يعنى مش هيضربونا اوى ... فرحانيين بقا ما بالك بقا لو كانوا بيضربوا وهما خسارنيين ..... يبقا ممكن تقول ان مصر هتفقد نص فنانينها اللى راحوا يشجعوا هناك .. اه بالحق ايه موضوع النسوان اللى رايحه تشجع دى ... يعنى بالزمه مطش فيصل علشان نتأهل او نغور من كاس العالم ..باعت فردوس عبد الحميد تشجع !!!!!!!!!!! ده الجمهور الجزائرى كلهم تقريبا مسجلين خطر فئه أ ... وانت باعتلى ميسره والبنت بتاعت اعلان ميلودى !!!!!!! يا عم صلى على النبى الحمد لله اوى على كده ... لا فى خدمات شوارع ...ولا مأموريات تأمين وابتسم وهو يغمز بعينه اليمنى بمكر ....ويقول (( لاء وشوف عمو جايبلك ايه معاه .... ومد يده واخرج من جيبه قطعة حشيش تكاد تكون قرش كامل ويكمل قائلا ... يالا ياعم ... دى مش هتنسيك المطش ... دى هتنسيك ان الكوره مدوره اصلا على فكره الحته دى من عند بسيونى .... الواد ده بقا حرراق خالص تخييل دى بتسعين جنيه ... ليه ياعم بلاقى الفلوس انا .... خالد .... خالد .... انت يا ابنى سرحت فين كده ... (( لا ولا حاجه ... الحشيشه دى بلدى ولا مغربى ؟؟؟؟)) نظر نحور وهو يبتسم ابتسامته الخبيثه و هو يصيح قائلا لاء ... دى جزايرى يا معللللللممممممممممممممممم م
__________________
أعتذر عن خطأ غير مقصود منى فى حق محمد تونسى
|
|
#9
23-08-2012, 02:55 AM
|
||||
|
||||
|
رد: من كتاباتى فى زمن المخلوع (( متجدد باستمرار ))
واضح ان فكرها لموضوع بتاعتى فشلت
__________________
أعتذر عن خطأ غير مقصود منى فى حق محمد تونسى
|
|
#10
23-08-2012, 03:08 AM
|
||||
|
||||
|
رد: من كتاباتى فى زمن المخلوع (( متجدد باستمرار ))
(( اخرة خدمة الغزّ ....... علقه ))
هكذا بدأ صديقى حديثه الرائع عن قصة حياته البائسه اعتقد اننى قد حكيت لكم من قبل عن الثائر المناضل سيد فرخه وصديقى بدون التطرق لأسماء بعينها ضابط مباحث محترم برتبة مقدم لديه رصيد يقترب من عشرين عاما من الخدمه فى وزارة الداخليه عمل فيها بأكثر من مركز وقسم ومديريه فى دلتا مصر وصعيدها ...وفى قلب العاصمه كان عائدا من عمله بأحد مراكز الجيزه الى منزله الكائن بشارع قصر العينى ومن مبهجات القدر ان يرى منظر ما بعينه يجعله يتصل بى ليسمعنى اصوات حيوانات مختلفه.... ذكر الجاموس الوحشى ليس اولها والخنزير ليس اخرها قابلنى البيه رئيس المباحث الذى طالما تورطت معه فى حوارات ونقاشات مطوله حول تجاوزات جهاز الشرطه وقمع الحريات والفتك بالمدنيين العزل وسحل المعارضين الخ ..... من بلاوى جهاز الشرطه سأقوم فقط بفلترة بعض الالفاظ التى تخدش الحياء العام والخاص وسأحاول ان اكون امينا قدر المستطاع فى نقل كلماته كما هى بدأ كلامه قائلا (( وانا مروّح لقيت فى الشارع عندى مظاهره ... تعمل الفين تلات تلاف بنى ادم مظاهره حاشده هائجه مائجه متجهه الى وزارة الداخليه يتقدمهم محمولا على الاعناق الثائر المناضل سيد فرخه سيد فرخه ... بيقود مظاهره فيها افنديه كتير من عينتك وناس شكلها محترم ونسوان لابسه من تيمبرلاند كمان سيد فرخه يا عمى مسجل خطر ..... جرايم نفس انا شخصيا جيبتله امر اعتقال فى 98 وانا معاون مباحث الوايلى سيد الوقتى بقا الثائر المناضل وبقا البطل الشجاع وبقا صمام امان الشعب وانا تعليمات الوزاره اطّنش وانفّض وما احتكّش بحد علشان الناس مش ناقصه سيد لو جه بكره على القسم عندى ومعاه عشرين تلاتين راجل من المرج ولّا من عزبة النخل علشان يقتحم القسم ويفك الحجز ويسرق السلاح كمان ,, هيلاقى ميت واحد يقف معاه فى مظاهره ضد الطاغيه رئيس مباحث القسم ولو انا ضربت عليه نار زى ما القانون بيقول علشان احمى المنشأه اللى بشتغل فيها والسلاح اللى حالف عليه هبقا مجرم من قتلة الشهداء .... ولو المحكمه برأتنى النائب العام هيطعن على الحكم علشان السوايسه قاطعين الطريق او علشان العيال اللى نايمه فى التحرير لو سيبت القسم وهربت هبقا الضابط الجبان اللى ساب القسم للمجرمين ونرجع نغنى ... الشرطه هربت وطبعا فتحت الزنازين اللى عندى وخرجت السوابق اللى فيها على الناس على اعتبار انى لما افتح الحجز ...... اللى جوا هيطلعوا ياخدونى بالحضن ولو كلمت الجيش هيقولولى دافع عن نفسك لحد ما نبعتلك حد ... ولا سيد فرخه واللى معاه معاهم سلاح وانت ورجالتك معاكوا مسدسات ميه ولو سيد بقا ربنا كرمه ودخل دبحنى فى مكتبى خبر فى المصرى اليوم ... مكافأه ومعاش للعيال صورة لييا بالميرى ... ولمراتى وامى وهما بيولولو علييا اى صنف ملة دكر فيكى يا بلد يقولى اعمل ايه ؟؟؟؟؟؟ دا انا خايف اروح فى يوم بيتنا الاقيهم غيروا اسم الشارع من قصر العينى لشارع الثائر المناضل سيد فرخه فجأه كده يا سبحان الله بقا الظباط اوسخ خلق الله اقصد طبعا اللى بقو ظباط انما الميتين تلتميت الف اللى راحوا يقدموا فى كلية الشرطه وما دخلوش دول ناس محترمه فجأه كده بقا الظابط هو اللى مسئول عن كل بلاوى البلد ... وكان البلد ماكانش فيها غير ناس نضيفه وظباط شرطه اضحكك .... والله لأضحكك انت ابن حلال وتستاهل تضحك ... الواد عمرو اخويا العيد اللى فات كلمنى يوم الوقفه وقالى تخييل ولاد الو... هيقعدونى فى المستشفى نبطشى اول يوم العيد ... فى شرع مين اقضى اول يوم العيد فى المستشفى ؟؟؟؟ مابقيتش عارف اقوله ايه انا اللى عمرى ما قضيت اى عيد اصلا فى بيتى لدرجه ان الواد ابنى فاهم انى بخاف من الخروف ..... عشان كده ما بجيش البيت الا بعد العيد بيومين تلاته فى شرع مين يقعد الدكتور فى المستشفى اول يوم العيد ؟؟؟؟؟؟ حاسس بكمية ظلم غير عاديه انه هيقعد اول يوم العيد فى المستشفى , مع انه هياخد عليه فلوس اد كده علشان شغال فى العيد طيب فى شرع مين بقا انا عمرى ما قضيت عيد فى بيتى وسط عيالى من يوم ما اشتغلت فى الداخليه ؟؟؟؟ وببلاش , انت عارف احنا مرتباتنا عامله ازاى وعارف ان اللى مدخل ولادى مدارس خاصه امى وعارف ان اللى بيدفع اقساط عربيتى لحد الوقتى ابويا وعارف ان مرتبى ما بيكفيش عشر ايام فى الشهر انا ما اخدتش من الداخليه غير كلمة باشا وانا رايح ..., وانا جاى اتفضل يا باشا .... فى شرع مين يا محترم ابقا خدمت عشرين سنه وما حصلتش 3000 جنيه مرتب وغيرى بتاع العلاقات العامه ولا بتاع الكهربا بيبقا اصغر منى بخمس ست دفع وبياخدلوه بتاع 20 25 الف جنيه ؟؟؟؟؟ بتاع ايه يعنى ؟؟؟؟؟ انا معاك ... الثوره عمرها ما هتبقا ثوره بجد الا لو دبحت حد ... ومش هتلاقى اسمن من ظباط الشرطه بس مين بقا فى الظباط ؟؟؟؟؟؟ الرجاله اللى نزلت تأمن منشات البترول فى السويس لقوا نفسهم فى محكمة الجنايات ؟؟؟؟ ولا ضباط المباحث اللى وقفوا فى سطوح الاقسام يحموا اقسامم وسلاحهم من البلطجيه ؟؟؟؟؟ ولا بتوع الامن المركزى اللى لقوا نفسهم تالت يوم ثوره من غير قياده ؟؟؟؟ يعنى هى البلد كانت خربانه وعدمانه علشان الشرطه ؟؟ واحنا اللى حرقنا القطارات ... وسرطننا الاكل .. وهربنا الاثار ... وخربنا المستشفيات وبعنا الغاز لليهود ؟؟؟؟ احنا يا عمنا اللى وسخنا الميه وخليناكو تشربو مجارى ؟؟؟؟ احنا يا سيدنا اللى غرقنا العباره ولا احنا اللى خدنا فلوس الناس وخلعنا على برا ؟؟؟؟ يعنى التعليم والصحه والاسكان والمواصلات والاكل والشرب والعيشه كانت زى الفل وولاد الو... بتوع الداخليه هما اللى كانوا منغصيين على البلد عيشتها عشان كده عملتوا ثوره علينا ؟؟؟؟؟ احنا اللى كنا بننتهك حقوق الانسان ؟؟؟؟؟؟؟ دا احنا كنا عايزين حد من بتوع حقوق الحمير يجى يشوفلنا حقنا يا راجل دا انا كانت بتفوت علييا ايام بشتغل فى اليوم الواحد 18 ساعه ......!!!!! وبعدها انزل تانى يوم الشغل عادى جدا انا الموظف الوحيد فى الدوله اللى مالوش بند انتقال فى مرتبه يعنى الدوله بتقولى تعالى اسوان خدمتك فى اسوان وبس انا بقا جاى من مصر من اسكندريه من الواحات مالهاش فيه اضحكك تانى ؟؟؟؟؟ مش خساره فيك كنت منتدب فى خدمه فى شرم الشيخ ... واستراحاتنا فى مكان يبعد عن الخدمه حوالى 70 كيلو والطريق اصلا مافيهوش رايح ولا جاى كل نص ساعه تعدى علينا عربيه وانا الكام ظابط بنيجى بقدرة ربنا .... بس بنقعد ساعتين تلاته بعد الخدمه علشان نعرف نرجع وكان فى خدمة كلاب معانا ... كلاب بوليسيه معانا فى الخدمه عربيه بتجيبها وعربيه بتوديها عربيه مكيفه .... واخر منجهه قام احد الساده الزملا اقترح علينا نطلب من المفتش اننا - بعد اذن الكلاب طبعا - نرجع فى عربية الكلاب هى كده كده راجعه لحد البلد قالنا اكتبوا طلب .... كتبناه عرضه على السيد مدير الامن .. ورد علينا بخطاب مكتوب فيه (( لا مانع .., مع مراعاة عدم تجاوز خط سير الكلاب )) *** يجب ان اشير هنا الى اننى انفجرت ضاحكا لمده ليست قصيره وسمعت وابل من السباب لا داعى لذكره *** انت عارف انى بعد ما قريت الورقه اللى فيها رد المدير .... فكرت جديا انى استقيل ؟؟؟؟؟؟ ما تنساش ان انا ابن ناس برضه يعنى .... يعنى لو وصلت لحد كده .... امشى بكرامتى احسن بس خبطت فى الواد والبت ...... هياكلوا منين ؟؟؟؟؟ مش هقولك هيتعلموا منين ... امى وابويا اللى شايلين بند التعليم زى ما قلتلك التعليم واشتراك النادى وتجديد الرخص واحيانا المصيف كل سنه طيب انا هقعد فى البيت اعمل ايه ؟؟؟؟؟ ما هو ظابط المباحث لما يسيب الخدمه بيبقا عامل زى السقا فى بلد دخلتها المواسير الشىء الوحيد اللى بيعرف يعمله .... ماعادلوش لزمه وماتقوليش محامى الله يسترك انا ما اعرفش عن القانون غير ذكريات ضبابيه لأيام مواد الحقوق بتاعت الكليه يا ابنى حرام عليكو ..... سيبونا فى حالنا بقا انا اللى بقف فى كمين 8 ساعات وأرجع على خدمة مطش 5 ساعات واروح اقعد فى القسم تلاته اربعه كمان ... اجى ارووح الاقى اللى بيقولى ...طيب انزل هاتلك حكمين تلاته قبل ما تمشى انا اللى بتكلم فى التليفون علشان الشغل بنص مرتبى ... لو ما اتكلمتش الشغل هيقف ولما تتكلم ما تستناس بدل من حد الوزاره اعلنت عن شاليهات فى شرم الشيخ مساحه الشاليه 100 متر مقدم 100000 جنيه والباقى اقساط 3000 كل شهر !!!!!!!!!!! انا بس كان نفسى لما قريت الاعلان ده اسأل السيد الوزير هو الاعلان ده للظباط برضه ولا لنادى القضاه او مثلا للعاملين بقطاع البترول يعنى لو فرضنا اصلا ان فى 100000 الف جنيه اجيبلك تلات الاف جنيه كل شهر منين يا ابن الم ..... ؟؟؟؟؟؟؟ صحيح ماهو الوزاره دى فيها ناس بتقبض نص مليون جنيه فى الشهر وفيها ناس بتتعالج فى باريس على نفقه الدوله وفيها ناس مشاركه فى قرى سياحيه فى الساحل لما تيجى تنضف وزارة الداخليه بقا دور على دول دور على جهاد يوسف وعدلى فايد واسماعيل الشاعر مش على معاون مباحث الصف اللى قتل اتنين بلطجيه بعد ما ضربوه بخرطوش فى رجله مش على عربية القسم اللى بتودى عيالى المدارس لاء شوف اللى عنده خمس عربيات ملاكى علشان تجيب الخضار للهانم شوف الظباط اللى ما راحتش الصعيد ولا تعرف فين سكته مع انهم فى الوزاره من سنه 70 شوف اللى تقاريره كلها امتياز .... وعنده بدل الحافز عشره وهوا نايم اصلا فى مكتب مكيف فى الوزاره شوف الظابط اللى عمره ما نزل الشارع اصلا وفجأه لقى نفسه لوا ولو عايز تتكلم على الرشوه مثلا اللى فى الوزاره تفتكر الرشوه دى فى وزارة الداخليه بس ؟؟؟؟؟؟ يعنى الداخليه واقسامها واداراتها بس هى المكان الوحيد اللى الناس بتضطر تدفع فيه رشوه ؟؟؟؟؟ وانت فى الجمارك مثلا ما بتدفعش رشوه ؟؟؟ فى الاحياء .... فى المصالح الحكوميه .... فى السكه الحديد فى اى خر.... فيكى يا مصر مافيش رشوه ؟؟؟؟؟ يا ابنى .... وزارة الداخليه هى المكان الحكومى الوحيد فى مصر اللى ممكن يجريك زى الحمار 25 سنه وبعدين يقولك ... كفايه كده عليك اقعد فى البيت مستغنيين عن خدماتك فى اى مصلحه تانيه انت شغال غصب عن عين ام البلد لحد سن الستين الا عندنا ممكن تبقا لسه 45 ويقعدك فى البيت ويرميلك ملاليم كل اول شهر علشان ما تموتش من الجوع كان فى راجل الله يرحمه بقا اشتغلت معاه اول ما اتخرجت قالى الداخليه دى بتفضل تقلعك هدومك يوم بعد يوم ... لحد ما تخليك عريان ملط تقوم ملبساك الجلابيه لو كان فى ظابط فاسد اكيد قدامه تلاته اربعه نضاف بس الناس مش عايزه تشوف غير الفاسد ولو كان فى ظابط محترم .....,الناس بتدوورله على اى عيب .... علشان ما تقولش ان فى ظابط محترم احنا اتمسكنا بايد وسخه واتحكمنا بناس وسخه لكن 99% من ظباط الوزاره ناس عاديه جدا زى اى حد لا هم ملايكه ولا هم شياطين بنى ادمين ... فيهم الحلو والوحش فيهم ابن الحلال وفيهم ابن الش.... , زى اى ناس عاديه ولو كان اى حد اتحط مكاننا يمكن كان عمل بلاوى زرقا ما يعلم بيها الا ربنا بدل ما تدبحوا الشرطه .... هاتولنا حقنا ضمن الخلق اللى عايزين تجيبوا حقهم ادينى يا عم مكان نضيف اشتغل فيه وساعات عمل ادميه وامكانيات اشتغل بيها ومرتب يتماشى مع البهدله اللى بتبهدلها وتعالى حاسبنى حساب الملاكين على حقوق الناس ما ابقاش انا شغال 16 ساعه فى قضايا ومصايب وجنايات ... زهقان وكفران وطلعان .... امى وعايزنى ابقا مبتسم بشوش الوجه مصفف الشعر لواحد جايلى سايح فى دمه عشان يعمل محضر فى مراته اللى كلته علقة موت ؟؟؟؟؟؟ الرحمه حلوه برضه هاتوا يا عم موظفين استقبال بتوع فنادق يقعدوا فى النبطشيات يقابلوا الناس بابتسامه حلوه واحنا نشوف شغلنا سيبنى اشوف شغلى علشان اعرف اجيب نتيجه كويسه فى دايرتى ما تقوليش اعامل السوابق والمسجلين ازاى مثلا ...... انا ادرى بمعاملة الناس دى وما تقوليش دول مهما كان بنى ادميين علشان لو واحد منهم اصطادك انت ومراتك او انت واختك ..... او حتى انت لوحدك هتعرف انه مش بنى ادم ولا حاجه بس هتيجى تعيطلى بعد لا مؤاخذه ما يكون ........ اللى حصل حصل يعنى المثل البلدى بيقولك ادى العيش لخبازه ... لو هياكل نصه علشان دى صنعته وما تقوليش حقوق انسان ومش حقوق انسان اول حق من حقوق الانسان انه يبقا امن على نفسه وعلى ممتلكاته ... وانا لما امسك واحد بيروع الناس او بيسرق حاجتهم يبقا ده هوا اللى نفى عن نفسه صفة الانسانيه وحرم نفسه من حقوقها وبعدين يا اخى ما تشوف العيال بتوع التحرير لما مسكو بلطجى عملوا فيه ايه ؟؟؟؟ ما عرضهوش على النيابه يعنى وهى بقا تدينه او تخلى سبيله ده عملوا فيه اللى ما اتعملش فى عماد الكبير حلال على العيال اللى مالهومش صفه ... وحرام على الظابط اللى دى شغلته ؟؟؟؟؟ هات كام شاب كده من اللى فى التحرير دول ... ارميهم فى كمين او تمركز فى الطريق الاوسط فى سينا ...من غير ميه ومن غير اكل وخليهم يشوفوا المناظر اللى بتعدى هناك وبعدين هاتهم يتكلموا على حقوق الانسان يا سعادة الباشا ... احنا هنضحك على بعض البلد مليانه بلطجيه ومجرمين وشمامين وبلاوى سودا لما تبقا تعلم الناس دى وتديهم بيوت وتأكلهم وتشربهم زى الناس وتخليهم بنى ادميين ابقا اطلب منى اعاملهم معاملة بنى ادميين والله لو اتعدل حال مؤسسات الدوله ... احنا مش هنبقا عجبه وسط الناس ... اكيد هنتعدل لو حد حس اد ايه احنا مظلومين ... ولو الناس تعرف كمية الظلم والقهر والكبت اللى عند الظباط والامنا والافراد فى الشرطه يعذرونا فى كل اللى اتعمل وبعدين من امتى وفين فى الدنيا الناس بتحب الشرطه طول عمر رجل الامن مش هقول مكروه بس على الاقل مش محبوب مش الشخص اللى شعبيته مكسره الدنيا يعنى عشان هوا اللى بيسجن وبيحبس وبيعاقب وبيدففع الناس غرامات ماهو انا عصاية القانون والناس جبلت على كره العقاب حتى لو تستحقه ونا اداة العقاب ...... الناس تحبنى ازاى بقا ؟؟؟؟؟؟؟؟ الناس ممكن تحب الدكتور ... المهندس مندوب المبيعات الرزل لو بيديهم عينات انما الظابط ...... هتحبه ليه ده لو اتسرق منهم حاجه والظابط جابهالهم برضه هيبقا الشخص اللى بيفكرهم بالسرقه اللى حصلتلهم الظابط كده كده مكروه يا ريس فى اى حته فى الدنيا قالها ..... واشعل سيجارته العشرين ونفث دخانها بضيق وهو يهز رأسه ثم ابتسم فجأه وبدون مناسبه وقال (( رضينا بالهم .... والهم مش راضى بينا يا عم الحاج تيجى ننزل نتعشى فى الحسين ......؟؟؟؟؟؟)) وانتهت الفضفضه التى نقلتها تقريبا كما قيلت وهذا لا يعنى اننى مقتنع بكل ما جاء فيها او رافضا لكل ما جاء فيها لكنها كانت صادقه فى كل حرف منها على الاقل من وجهة نظر قائلها فالانسان عندما يحتاج الى التنفيث عما يدور بصدره وبعقله من مشاكل ومتاعب ومصاعب يواجهها ليل نهار لن يحتاج للكذب او للتلفيق وما حاجتنا اصلا للكذب ها هنا انها مجرد فضفضه ... فضفضة ظابط شرطه
__________________
أعتذر عن خطأ غير مقصود منى فى حق محمد تونسى
|
 |
|
|
