باركولي بقيت بلطجي وبتاع سوااااابق

[ahmed el gendy]

البدايه كان يوم جميل واخده اجازه واخر انبساط عشان هاقضي مصالحي وانسي الشغل بس انا انسي الشغل اه لكن ما انساش المرتب ....كله الا المرتب يا رجاله صحيت لمعت عربيتي القديمه الكورولا 1993 عشان الطرق التحفه اللي هامشي عليها وقبل كل شيء قلت اعدي ع البنك اقبض المرتب
رحت للبنك كالمعتاد الشارع زحمه ادور علي مكان اركن فيه مفيش لقيت عربيات ركنه صف تاني كالمعتاد ف المكان ده ربنا قدرني ولقيت مكان ف اول الصف التاني وركنت فيه وحضنت جامد والله العظيم الباب اليمين ما تعرفش تفتحه تجيب حتي حاجه من العربيه ع السريع وسبت العربيه حتي مفتوحه بس عملت السنتر بحيث الباب لو فتح العربيه تصوووووت
ونزلت اسحب فلووووووووووووووووووووووو وووس من الفيزا المهم كان قدامي اتنين بيسحبوا فلوس استنيت يخلصوا مفيش دقيقتين لقيت العربيه بتصوت جريت عليها لقيت عربيه فيرنا حمرا معديه من جنبها ومجرد ما عربيتي ظهرت لقيت العلبه بتاعت الشنطه او الشنطه من جنب الفانوس مخبوط وداخله لجوه جامد ف البدايه والله العظيم اقسم بالله ما زعلت رغم اني عارف ان الفيرنا الحمرا هي اللي خبطتها مع االعلم الدنيا كانت زحمه جدااا وهو كان واقف كنت ممكن اهزقه بس انا قلت لنفسي مايقصدش وانا اتحكيت وهو اتحك كمان فخلاص قدر الله وماشاء فعل المهم رحت اشوف الخبطه لقيت الولد اللي بيلمع العربيات ف المكان ده لفت انتباهي ان العربيه مخبوطه ومطبقه من عند الباب بتاعي وكمان من الرفرف الامامي بس مش ده المهم

المهم ان الولد قالي ده الحيوان بتااع الفيرنا نزل من عربيته وقعد برجله يخبط عربيتي يعني الباشا شكله خد بالجزمه علي قفاه من حد فجاي يطلع زهقه علي عربيت طبعا لو فرتك العربيه كلها وهو مش قاصد ومحترم فداه الف عربيه لكن يخربش عربيتي خربوش واحد وهو قاصد يبقي هنا عليا وعلي اعدائي
زي ما قلت المنطقه دي اصلااا زحمه جدااا وده المعتاد ف المكان ده اساسا والبيه كان مشي يدوب مترين لقدام رحت له قلت له ايه اللي انت هببته ده ؟؟؟ قالي بتناكه وبتعالي هببت ايه ؟؟ قلت له اللي هببته ف العربيه الكورولا اللي خبطتها برجلك
قام رد عليا بكل قله ادب عشان تتربي ما تركنش كده تاني قلت له وانت اللي هتربيني دا انا اربيك واربي الف زيك يلاااااااا طبعا كل ده وهو راكب عربيته لسا
قلت له اركن علي جنب يلا وانزلي (( زي بتوع المرور كده )) لقيت البرنس نازلي ببنطلون مش طايل وسطه ولابس لي سلسله وبيقولي بقرف عاوز ايه ؟؟؟ زي ما اكون باشحت منه
قلت له الحتت اللي خبطتها تعملها ولو فيه خربوش يترش مكانه والعربيه ترجع احسن من الاول يقوم يرد عليا مليش فيه اتكلمت معاه بادب يهديك يرضيك الناس كلها تتحايل عليه وانا واقف ساكت وهو مش عاوز يصلح اللي عمله قلت له انا معايا رقم العربيه قالي مش معاك رقم العربيه اعلي ما ف خيلك اركبه قلت له يعني اعلي ما ف خيلي اركبه قالي اه اعلي ما ف خيلك اركبه قلت له يعني ده اخر قولك ؟؟ قالي اه اعلي ما ف خيلك اركبه قلت ماشي
واتلفت ادور علي قالب طوب احمر ولا زلطه من بتاع البنا عشان اخبط له عربيته
راح ربنا رزقني بحجر كبيييير ومدور بس حجر محترم معرفش القوه دي جات لي ازاي اشيله ف جزء من الثانيه ومن عصبيتي وردود الواد البارده رحت حادفه ع السقف بتاع عربيته الفيرنا ف الحته اللي فوق السواق طبعا انتوا عارفين الفيرنا صاجها حلووو ازاااي الحجر مجرد مت نزل راح واخد يجي ربع السقف بالضبط واطبق وبمشيئه الليه وقدرته لما حدفت الحجر وطبق السقف الحجر كان مدور نوعا ماااا راح الحجر واااااااقع ع الكبووووووووووووووووووت راح الكبوت عامل زي سندوتش الطعميه اللف و فيه فانوس من الفوانيس طار ادام العربيه واكيد اتكسر

الواد السيس طبعا مش هيسكت راح اتخانق وبقي الحوار هيوصل لتشابك بالايدي والناس طبعا حاشوه وقالو له انت اللي غلطان احنا بوسنا ايدك عشان تصلح له عربيته قلتله مليش فيه الواد يتخانق يا جدعان اللي عنده حتتين صاج يتلموا ب100 جنيه دي اساسيات عربيه انتوا بتستهبلوا والواد لما لقي الناس كلها بتغلطه كان خلاص هيعيط وقعد يقولي حسبي الله ونعم الوكيل فيك قلت له يعني افتكرت ربنا دلوقتي الاول كنت بتقول اعلي ما ف خيلك اركبه اديني ركبته ودلدلت رجلي كمان وقلت له نمر عربيت معاك واللي عاوزه اعمله و واحده بواحده والبادي اظلم

بس بصراحه وبحياديه تامه فيه اتنين من الناس غلطوني وقالولي ما ينفعش اللي انت عملته ده بس الباقيين قالوا لهم ما التاني اللي بدأ كل واحد حاجته بتبقي عزيزه عليه

بس اللي عاوز اقوله والله العظيم ال 3 خبطات اللي عملهم والله ما زعلوني خاااالص بقدر ما زعلت علي الطريقه اللي اتعملوا بيها
وكمان لو اتحطيت ف الموقف ده بدل المره الف عمري ما كنت هاعور له عربيته بالشكل اللي عملته ده بس ردوده وبروده واستخفافه بيك وبكل اللي بيكلمه هو اللي خلاني اغضب وانا اساسا عصبي جدااا يعني يا ما كسرت ف بيتي كوبيات ومراوح لما باكون غضبان

بس ف الاخر الواد ده شكله ضر ناس كتير عشان اتنرفز عليه بالشكل ده

واخيرا وليس اخرااااا الكلام ليكي يا جاااره خدوا بالكم وحرصوا مني معاكم بلطجي ومسجل خطر ف المنتدي

[elmo7areb]

[حسين122]

سعات الواد بيعمل حاجات غريبه ... لله الحمد بأعتقد اني هاديء جدآ في سواقتي عشان ما بحبش حد يقل أدبه و بأحترم نفسي
لكن مرة كنت ماشي في شارع جانبي بس عريض و بأعدي من عربيه قابلني فسبه سايقها راجل هوه كان عنده مكان كبير يعدي منه لكنه الحته دي م الشارع كانت مكسره شويه فهوه مكانش عاوز يمر عليها المهم عدى من جنبي و قام ضرب أيدي الشمال بأيده و شخط فيا و أبتدى يشتم
أنا معرفش حصلي ايه وقفت في لحظه و خرجت م العربيه و هوه وقف عشان يشتمني رحت له و لاحظت انه كبير بس لسانه مش تمام كنت هأقلبه بالفسبه بس لقيته كبير و قلته روح امشي و زقيته زقه بسيطه
ورجعت العربيه بس لما وصلت للعربيه كنت متوقع انه هييجي يهجم عليا من ورا
و في اللحظه المناسبه ذي افلام جمس بوند بصيت ورا لقيته جاي رميت النظارة على كرسي العربيه و بيني و بينه مسافة بسيطه جدآ رجعتله و لفيته حوالين نفسه و زقيته ناحيه فسبته و قلتله طيب روح بقى و هوه عمال يشتم
الناس الحمد لله طلبوا مني امشي و اسيبه انا شديت شعري من كتر ما حسيت اني متضايق اني فلتت اعصابي كده
المهم مشيت بس كنت مستغرب انا دماغي فلتت مني كده ليه
انا مره كنت ماشي واحده شتمتني م الباب للطاق قلتلها شكرآ و كملت كان معايا واحد أستغرب من رد فعلي بس انا كده مستريح لكن مع الراجل ابو فسبه اتنرفزت جدآ
المهم حمد الله ع السلامه و كل خناقه و أنت بألف خير و نورت الوكر اقصد المنتدى

[mhamdy75]

يستاهل اكتر من كده

[MmFFoR]

للاسف - لحد ما قانون المرور يتضبط - و يعملوا لينا اخيرا و لوجه الله قانون التأمين الاجباري ضد اخطاء الغير - حيفضل الواحد ياخد حقة بدراعه