طلمبة البنزين و بداية الحكاية فى الاوبل من سوهاج

[gmgamil]

المهم يا شباب نكمل

بعد ما زقينا العربية لحتة امان سيبنا العربية و غطيناها بالغطاء و روحنا البيت اول ما وصلت البيت خدت دش ساخن و صليت الفجر و ريحت و انسى انى اصحى تانى
و دى كانت اول مرة ما صليتش العيد فيها منذ القدم ( اى زمان )

المهم صحيت على الساعة 10 الصبح و على السريع كل سنة و انت طيب يا حاج كل سنة انتى طيبه يا حاجة و يا ست الكل يا ام العيال و خد يا بت خد يا واد

و على العصر اجرى يا واد اللحق شوف العربيه لا يكون حد ريحك و خدها

المهم لقيت العربيه بحالتها ( عطلانه يا عم متقرش )
دور يا واد على ميكا ( اختصار ميكانيكى يعنى ) طبعا الميكانيكى مش راضى يفتح ولا كهربائى موجود
طب يا واد روح لكهربائى مش راضى يسيب الورشة لقيت واحد سواق تاكسى عنده صعبت عليه قالى انا هاجى معاك اديلك وصلة بطارية بعشرة جنيه
ماشى يا عم خدنا التاكسى و روحنا شغل يا خال راسها و الف سيف ما تشتغل
المهم لقطتين و قالى سلام يا صاحبى لابطاريتى تنام

طب يا عم حته لقطة تانى طب لحسة لقطة كهرباء طب مع السلامة

المهم ربنا سهل و لقينا ميكانيكى فاتح ( عمك جريس ) ايه يا عم جريس اجيب العربية
هاتها يا باشمهندس

زقينا العربية بص فيها بصة و غير وشة الناحية التانية و قالى سيبها و تعال بكرة علشان الوقت متاخر

طبعا هو ساكن بعيد عن الورشة و سيبة العربية فى الشارع و القلق مالى الواحد
( انا مش عارف ليه القلق على الفاضى و المليان المهم هذا ما وصلنا اليه الاعلام و الذى منه مش وقته الكلام فى الموضوع ده ==== مش كده ولا ايه )


المهم من الصبح بدرى و انا عند الميكانيكى طب هنا يفتح مش راضى يفتح خدلك لفة ساعة و ارجع يا واد
رجعت مش فاتح المهم كذلك و هكذا لحد الليل راسه و الف سيف انه يفتح و كمان معاه المفتاح بتاع العربيه سيبه معاه من امبارح بالليل يا عم الحاج صحح

المهم تانى يوم لقيت الصبى فاتح اصل المعلم امه ماتت امبارح يا ادى النحس

المهم تعرف يا خوى تعرف يا حبيبى فى الموضوع المهم الواد سيبهالى يا باشا و انا هشوف كهربائى علشان ده عيب كهرباء مش ميكانيكا

طب شوف كهربائى المهم كملت اليوم ادور و اتصل على كهربائى لحد اليوم ما خلص من غير ما اقضى مصلحة

المهم صحيت اليوم اللى بعده مكسل و مش راضى اصحى من النوم المهم رحت مع المغرب قلت اطمن على العربيه الواد قاللى دى طلمبة البنزين و هات واحدة تانية جديدة

المهم ما فيش طلمبة اوبل المهم جبت واحدة يابانى و ركبتها ما اشتغلتش

بعد شد و جذب فى الاخر طلعت ضفيرة كهرباء اللى موصلة للطلمبة مش واصلة كويس

و كده وصلنا للمطلوب مع نهاية اجازة العيد و دى كانت حكايتى مع طلمبة البزين و العيد


طبعا نفس الحكاية حصلت مع ليلة وقفة عرفات بس انا اختصرت المسافة و دورة على الطلمبه من الاول و الحمد لله اتحلت المشكلة جزئيا و العربية شغاله من يوم الوقفة عصرا و الى الان

و المرة دى انا حليتها بنفسى

و دى كانت حكايتى مع طلمبة البزين

انا حاليا مركب طلمبة بنزين استيراد 1600 و العربية 2000 سى سى علشان كده بقول حل جزئى

علشان الاداء غير مرضى

[احمد على 1999]