فكرة غريبة

[MANDO09]

اللى اعرفه انى ممكن ابقى شارى عربية من برة مصر بقالى كتير بس انا المالك الأول ليها ... ينفع اجيبها مصر بس لازم اجمركها هل الكلام ده صح .... طيب ينفع اشترى عربية من واحد خليجى هو المالك الاول ليها من 5 سنين مثلا ومنوثقش عقود واخلصله جماركها كانه نازل بيها مصر ولما نخلص الليلة دى ابقى اوثق منه توكيل بيع وشراء
وامشى بيها عادى .... انا عارف طبعا ان ده مش هينفع لسبب انا مش عارفه مستنى حد يقولى بقى ايه هو السبب ده

[conwaydiver]

طبعا ينفع لاني فكرت في نفس الموضوع لكن كانت جمارك العربية غالية اوي
لو اول مالك نزل بيها مصر حتي لو مش مصري عادي وهيتجمرك عادي وبعد ما هيجمركها هتبقي ملاكي ويبعها عادي خالص

[MANDO09]

اشكرك يا فندم على الرد

[zing0]

يعنى بسبب بتوع الجمارك - ربنا يأخدهم
محكوم على الشعب المصرى يتفرج على العربيات المحترمه فى الأفلام الإجنبى بس, و يفضل راكب بيتل و 128 و لادا من أيام الفراعنه.

[romioromio]

انا عايش في السعوديه
والموضوع قتلناه بحثا انا وزمايلي
ومن الاخر يا صاحبي
موضوع فاشل فاشل فااااااااااااااااااشل:cry ing:
السبب
اولا..
لاز تكون المالك الاول
ما معناه انك تشتري زيرو من الوكاله في نفس سنة الموديل يعني مش مستعمل
وتكون 1600 سي سي
عشان متتخيطش في الجمارك
لان فوق الالفين سي سي شريحه تانيه خااااااااااااااااااااااال ص
مثال
هنا المستعمل رخيص رخيص رخييييييييص
يعني مثلا انا بعت عربيتي دايو ليجانزا 2001 ب 3700 ريال
يعني 5000 جنيه مصري
مرسيدس سي 300 ب 8الاف ريال
اوكتافيا 2002 5000 ريال اه خمسه بس
بي اماتك بقي وحركاتك الماني ايطالي فرنساوي مريخي
المستعمل هنا تررررررررررررررررررراب :
لكن للاسف مينفعش تنزله مصر جمرك


اذا مشكلة المالك الاول انك لازم تشتري جديد مش مستعمل
لكن مشكلة الجديد من الوكاله انه برده غاالي لان
اخونا الجنيه المصري بقي ببلاش
والريال زاد بقي 180 و 190 قرش
يعني حتي انك تشتري لحد من هنا موبايل او لاب او اي شئ جديد
فرق السعر خلي الحوار فاشل

نضرب بقي مثال عملي عشان اللخبطه اللي بقلها دي

تويوت كورولا 1600 سي سي
في مصر سعرها نقول من 130 ال 150 الف جنيه متوسط يعني
ضمانك تامينك ايرباجاتك وحركاتك

هنا تويوتا كورولا في الوكاله من عبد اللطيف جميل
ابتداء من 60 او طالع الي 85 الف ريال حسب الاوبشنز وفيه اعلي
بالمصري حوالي 120 الف الي 150 الف جنيه
لان الريال زاد قوي عن الجنيه
ففرق العمله بقي جامد

تيجي بقي لجماركها
جمارك مو 2013 سعة محركها 1600 سى سى

تقدر الرسوم ب تقريبا 75 الف جنيه، حيث تخضع للفئة 40% سيف وارد و15%ضريبة مبيعات و3% رسم تنمية
علي فكره الجمارك بال سي سي مش بالموديل او نوع السياره
يعني كل العربيات ال 1600 جماركها واحدها
40% من قيمة تمنها
وفيه تخفيض جمركي عن كل سنه عدت عليها منز امتلاكها

علي شوية حبشتكنات علي الشاي يا بيه
علي شوية حمد الله بالسلامه ياستاز نورت مصر
حتخش في مياية مقفله بريزه كبيره

يعني العربيه حتقف عليك ب 200 الف واكتر

غير بقي يا حبيبي
انها خليجي
لما تشتري من مصر ضمان وتامين وحوارات
وكمان
الناس مفكره ان الخليجي كله مواصفاته اعلي من المصري
مثلاالكورولا المصري 9 ايرباج هنا وحدايه او اتنين للفئات العاليه
ممكن اتغير السنه دي
وهكذا بقي شوية حاجات
_________________________
طب واحد زكي منه فيه
يقلك حجيبها اعيش حياتي وبعد 5 او 9 سنين انزلها واستفيد بالخصم الجمركي عن كل سنه
اه بس ساعتها حيكون موديلها عدي
ونازلي بقي من الخليج وبتاع وراكب عربيه عفي عليها الزمن
واحنا عارفين مشاكل العربيات الكبري
انها بقت موديلاتها بتتغير اشكالها كل شويه الي الافجر والي الاقبح

ربنا يبارك ويزيد في عمر اللادا لا بتغير ولا غيره اصيله بنت الناس
من اول ما تولدنا وهي بنفس الشكل ده
هو بغباوته بوشه العكر

طب بقي ايه الميزه في السعوديه عن مصر في العربيات الجديد من الوكاله
الميزه كل الميزه للي بيركب عربيات اكتر من 1600 سي سي

يعني مثلا سوناتا التيما مكسيما ليكزس كامري افالون جينيسس والاكورد
والاكيورا والانفنتي
والفور باي فور بانواعه
الوحوش ابو 3500 سي سي ومشتقاتها
الفخامه والرساوه والحلاوه والجمال والدلع والشياكه وزي ما تقول تقول



لان سعر الحاجات دي هنا رخيص جدا مقارنه بمصر

مثلا كامري سوناتا التيما اوبتيما
سعرها من 80 الف ريال يعني 120 ل 150 الف جندي مجند لحلح مصري
لكن في مصر اسعارها نااار يا حبيبي نار
من 400 الف الي مليون
كامري هنا ب120 الي 150 الف جنيه
في مصر فوق 500 الف جندي
يعني لو عايش هنا تجيبهاا وتركبها وتتكشخ بيها
وتنزل بيها التربتك وتقضي اجازه سعيده وتشوف حاجه جديده مفيده

لكن زي الشاطر ترجع وتجيبها معاك
لانك ما ينفعش تجمركها لان الجمرك حيعديها اكتر من تمنها في مصر
بمراااااااااااااااااااااا اااااااااااااااااااااحل
_________________________ __
الخلاصه يا ساحبي
يا تجيب سيارة معاقين استعمال
وانت ورزقك وتظبطها وتدلعها وتروقها في مصر
يا تنسي السعوديه باللي فيها
وتجيبلك حاجه كسر زيرو من مصر
او حاجه جديده ضمان 3 سنين او مية الف كيلو وريح دماغك

لان الخليجي وجماركه حوار فاشل

لا اما بقي تصلي وتدعي ربنا ان مرسي طويل العمر يطول عمره ويزهزه عصره وينصره علي من يعاديه هاي هئ
يقوم الصبح تتطب في دماغه يلغي الجمارك
او حتي يسمح للمقيمين بالخارج يستورودا عربية واحده علي الاقل بدون جمارك
وساعتها اوعدك يا ساحبي حجيبلك واحده علي اسمي

بالتوفيق وصباح العسل علي الجميع وجمعه مباركه

واخيرا البوست ده مش للجدال العقيم
ولا بيزم في مصر ولا بيشكر في السعوديه
ده حقائق قتلت بحثا
ممكن اختلافات بسيطه في الاسعار
من مذكرات اخوكم مغترب بقالي كتير
وعلي رأي حزلقوم
انا من البداايااااااااااااااا يا غربه بتحمل
بس اكل العيش بقي

سلام يا كبير : vctry: