تجربة شخصية لداستر 2012

[stonecoldmido5]

مساء الخير علي كل الاعضاء و المشرفين المحترمين في المنتدي , حاولت اني الاقي معلومات اكتر عن الداستر 2012 بعيد عن المعلومات اللي في كتالوج السيارة بس ملقيتش كتير عنها و التجارب الشخصية قليلة عنها .
انا اشتريت الداستر موديل 2012 , 4x4 منذ 3 ايام سعرها 135 الف و ترخيصها 3 سنين كلفني 1650 جنية , و كان عندي تيجو 1600 موديل 2010 مع اني كنت قلقان جدا من الداستر علشان الكلام قليل جدا عنها الا اني اكتشفت فيها بعض العيوب و بعض المزايا زي اي سيارة تانية و هعرض لسيادتكم عيوبها و مزاياها من وجهة نظر شخصية بحتة :

اولا العيوب :
- مفيش مسند بين الكرسيين الاماميين .
- مفيش وحدة رفع للزجاج و مفاتيح الزجاج فيه اتنين في الامام بس في تابلوه السيارة و اتنين في الخلف في منتصف السيارة بين المقعدين الاماميين .
- كلاكس السيارة في دراع النور زي معظم السيارات الفرنساوي .
- مفيش نظام ثبات الكتروني وده طبعا لان سعرها قليل بالنسبة لامكانيتها .
- صوت انذار حزام الامان بيشتغل دقيقة و نصف من غير ما يفصل في حالة مركبتش الحزام .
ثانيا المزايا :
- تقفيلها ممتاز جدا بالمقارنة بالتيجو .
- معظم الناس قلقانة من سحب العربية و انا كنت اولهم بس اما جربت العربية و جربت عربيات تانية زي التيجو او الكارينز او الماهيندر لاو حتي الماتريكس حسيت ان الداستر سحبها جامد جدا بالنسبة للعربيات دي و متحسش انها 1600 خالص, بس هي اقل كتير من العربيات السيدان و اهم ميزه ان السحب مبيتأثرش بالتكييف حتي لو شغلته ع الآخر و بالمناسبة تكييفها تلاجه في عز الظهر .
- ممكن تحويل العربية الي دفع رباعي من خلال قرص في تابلوه السيارة او تخليها دفع ثنائي امامي او ضبطها علي نظام الاوتو و هو بيتحكم في العربية حسب وضع الطريق .
- بالنسبة للعفشة حدث و لا حرج ناعمة جدا لاقصي مدي و متسمعش اي صوت وانت ماشي .
- صالون السيارة واسعة جدا و مريحة و تعتبر عائلية من الدرجة الاولي وشنطة التخزين واسعة جدا .
- السيارة مصفحة بالكامل من الاسفل .

ده مميزات و عيوب العربية من النظرة الاولي اي بعد استخدام 3 ايام فقط بس الكلام دهمن وجهه نظري بس و اي حد عنده اي سؤال بالنسبة لامكانات السيارة ليا الشرف اني ارد عليه .

[mohamedkshaf1]

ربنا يعطيك خيرها و يكفيك شرها و ألف ألف مبرووووووك

[stonecoldmido5]

الله يبارك في سيادتك

[koashraf]

الف مبروك عليك السياره........

[omskmaher]

الف مبروك بس موضوع الزارار ده مش عيب انت بعد اسبوع هتعود عليه وهيبقى ميزه صدقنى العربيه دى احسن عربيه فى السوق بالنسبه لشوارع المحروسه ولو سافرت اروبا هتلاقيها منتشره جدآ بس المصنع بتاع رومنيا مش ملاحق وحصة مصر صغيره عشان كده عليها قوائم انتتظار كتير وفيه موديل جديد نزل فى امريا اللا تنيه معدلين شكل الكنسول والزراير فى الابواب وكمان الشبكه الاماميه والجنوط ربنا يكفيك شرها ويعطيك خيرها