توكيل القطامية ولا أبو رواش

[moataz helal]

شهادة حق اتحاسب عليها يوم القيامة . ندخل فى الموضوع


كنت عايز اعمل صيانة الألف كيلو لعربيتى كيا ريو . وكنت متردد جدا فى الذهاب لفرع القطامية . عشان أبو رواش هو الأصل وكده زى ما انتو عارفين .
المهم حجزت فى القطامية وبتاع وروحت عملت الصيانة ولسه العربية بتحدف شمال !!!
وعلى فكره ده كان موجود فيها قبل الصيانة . المهم روحت تانى يوم من غير حجز وطلع معايا مهندس وجرب العربية وقاللى يانهار اسود . خلاص خلاص انا عرفت المشكلة . ولكن لم تحل المشكلة .
وقلت عادى بقى ماتركزش عشان ماتهيسش وامسك الدريكسيون وانت ماشى وخلاص .
وبعديها كنت عايز اركب جهاز انذار للعربية بس المره دى على جُسِتى اروح مركز القطامية ده تانى . عشان شكلهم مش فاهمين حاجة . وروحت أبو رواش و قلتلهم على الحكاية بتاعت الحدفة . فاقالولى لا لا دى لازم تتعمل و متقلقش بس نفس اللى حصل فى القطامية حصل معايا فى ابو رواش ولغاية دلوقتى بمسك فى الدريكسيون .
اما حهاز الانذار اتركب عادى بس برده مش عايز اركز فى صوت الزقزقة اللى فى الدريكسيون .
طب واحد هيقوللى هى فين المقارنة دى يا عم الحاج ؟ هقوللوا برافوا عليك انت ممتاز . شوف بقى يا سيدى :


فى البداية المعاملة عند استلام عربيتك. هتلاقي المعاملة أفضل فى القطامية . لكن مش وحشة فى أبو رواش بس مش هتحس ان فى حد قابلك اصلا.


بعد كده طبعا هتقعد فى الاستراحة صح ؟ ايواً ما احنا كلنا رايحين عشان نقعد فى الاستراحة ههههههه. الاستراحة بتاعت القطامية تضرب ابو رواش بالجذمة القديمة والجديدة كمان. وده فى كل حاجة ممكن تتخيلها فعلا . بالنسبة لشكل المكان والمشاريب والتلفزيون والكراسى واالتهوية .
وماتقلش ان الاستراحة مالهاش لازمة لأنك بتعد فيها 4 سااااعات مش 4 دقائق .


المكان : القطامية اشيك و افضل لأنه لسة جديد


المشاريب : انا بتكلم على المشاريب السخنة فى القطامية ماكينة اما ابو رواش بالكنكة . بس ابو رواش فيه أكل و المشاريب السخن ببلاش


التلفزيون : القطامية 2 ال سى دى 52 بوصة فى ابورواش تلفزيون واحد عادى معفن 32 بوصة او اقل .


الكراسى : القطامية فيها كنب اما ابو رواش كراسى عادية جدا (مايتقعدش عليها ساعة )


المهم هيجى عليك وقت الملل وتبقى عايز تشوف عربيتك او حتى تعرف اللى تم فيها ايه صح ولا غلط ؟؟


فى ابو رواش : علاقتك بعربيتك هى اسمك اللى موجود على الشاشة بتاعت البيانات بس . ماينفعش تبص على عربيتك خالص ولا تعرف ايه اللى بيتم فيها اطلاقاً .انت بس اول ما اسمك ينور اخضر تروح تشوف هتستلم امتى .


فى القطامية : عندك شباك زجاج 4 متر فى 3 متر تقريباً وده بيطل على الورشة على طووول وتبقى مستريح كده وانت شايف عربيتك حتى لو مش فاهم حاجة بس انت شايفها . وممكن كمان تتسرسب للورشة كده وتقف مع المهندس اللى ماسك عربيتك زى مانا عاملت


خلاص انت خلصت صيانتك وعايز تدفع بقى ( اه يا حلو مانت لو معملتش كده مش هتستلم عربيتك


فى ابو رواش تحس انك واقف على شباك تذاكر سينما لو هتدفع هتلاقى مش اقل من 10 بصين عليك


فى القطامية بتدخل كده مكتب وتقعد براحتك وتعد فلوسك من غير ما حد يبص عليك ولا يستعجلك


(ملحوظة غسيل العربية فى المركزين وااااحد )


انا عاملت المقارنة دى عشان انا كنت محتار فعلا انهى مركز صيانة افضل ؟ بس بجد القطامية افضل بكتير . وكنت قلقان من حتة ان ابو رواش افضل فى الكفاءة واحسن وطلعوا زيهم زى القطامية مبيخروجوش بره الجدول . يعنى لو فى مشكلة ملهاش حل محدش هيفكرلك فيها . بس عشان ارضى ضميرى امام الله بعد صيانة الالف فى القطامية اتصل بيا مهندس مش فاكر اسمه قاللى اخبارك ايه وبتاع . هى العربية لسة بتحدف شمال ؟ قلتله اه قاللى طب تعالى تانى وانا هشوفلك المشكلة دى بس انا كنت رايح تانى يوم ابو رواش وكنت فاكر انهم هيحلوها بس بدل أحمد لقيت الحاج احمد

[AbOnOrA]

تسلم ايدك على الافادة

[moataz helal]

المشاركة الأصلية كتبت بواسطة AboNoRa تسلم ايدك على الافادة

يا باشا انا في الخدمة

[helsayes]

سيارتي إتخبطت من اﻷمام والتأمين مخيرني بين أبو روا ش والسبع والعبور ، فأيهما أختار.، أفيدوني لكم الشكر.