هل خطر في بالك توصل رجل مسن لا تعرفه الى وجهنه

[agamy_apc]

احب ان اطرح على حضراتكم فكرة
هلى فكرت في مساعدة شخص مسن تعرفه أو لا تعرفه و توصله الى اقرب مكان لوجهته؟
1- لا اعتقد انها فكرة سليمة
2- فكرة جميلة و سوف احاول تطبيقها
3-اخاف ان يكون هذا الشخص ينتمي الى تشكيل ارهابي و يخطفني انا و سيارتي .
4- عمري ما فكرت و لا ح افكر في الموضوع ده

احبائي... اخواني المحترمين اعضاء هذا المنتدى العظيم
فكرة بسيطة ... مش ح تكلف سيادتك سوى القليل من وقتك ... سوف تلقى ثواب كبير ... ويبارك الله لك في سيارتك .
حاول مرة تنقل او حتى تقرب المسافة بسيارتك....لأحد كبار السن الذين يقفون لساعات في انتظار المواصلات و لا يجدون الا البهدلة ... يا ريت نفكر في غيرنا ولو شوية و ربنا يوفق الجميع لعمل الخير ... ان شاء اللله
<!-- / message --><!-- sig -->

[Nissan]

بالطبع فكرة جيدة و إن كان تعبير فكرة غير صحيح
اعتقد ان من حقوقهم علينا ان نفعل ذلك فقد يكون والدك أحدهم و فى يوم من الايام سوف تكون مكان هذا المسن فافعل ذلك عسى ان يسخر الله لك شاب صالح يساعدك فى شيبتك
و سوف تكون زكاة على السيارة ( لست مفتى و لكنى اعتقد ذلك )
شكرا على روحك الجميلة
و ارجو ان يهتم الشباب ملاك السيارات للمسنيين فى الشارع

[POP EL GAMED]

انا بصراحه فكرت فى الموضوع ده كتير وببقى نفسى اعمله مع الكبار والصغيرين كمان
لكن المشكله الوحيده بالنسبه ليا انى بخاف حد يفكر فيا تفكير مش كويس
يعنى لو راجل كبير يقولك ده حرامى ولا عايز ولا عايز
ونفس الكلام منطبق على الست الكبيره
اما الشباب ببقى محرج بصراحه انى اعمل معاهم الموقف ده
اختصار الموقف انى بخاف من الاحراج
ولو الانسان (كبير او صغير) اعرفه بعرض عليه اوصله او اخده لاقرب حته

[koky_90]

انا نفسى اعمل كده مع اى حد واقف على محطه اتوبيس مثلاا !!!!
لكن سوء الظن من الطرفين يغلب في هذه المساله الاسف

ممكن مع حد اعرفه لكن غريب صعب بس ........مش مستحيل

والدنيا لسه فيها خير يعنى

[sam ram]

بصراحه انا عملت الموضوع ده ايام الكليه ... و كنت فرحان جدا ... لأني كنت بوصل واحد في طريقي ... يعني تقريبا معملتش حاجه ... لكن اكيد فرق معاه
بس كان لينا واحده قريبتنا بتدرس في الجامعه و هي راجعه بيتها وقفت في ميدان التحرير ... واحد دخل العربيه وراها و حط مطوه على رقبتها و خد كل اللي في الشنطه ( محقظه... موبايل .... ) طبعا هي رابطه الحزام مش قادره تتحرك .... وقافله الازاز و مشغله التكييف ...المشكله انوا كان عايزها تمشي بالعربيه .... يعني كان ناوي يخطفها .. بس هي قامت خبطه العربيه في عربيه تانيه .... و طبعا نزل يجري
تخيلوا في ميدان التحرير ... و تستغربوا اكتر لو قلتلكم كانت لسه بتروح من الجامعه الامريكيه وفي عز النهار!!!!!
الموضوع ده خلاني افكر كتير و ابص للناس اللي بتشاور بنظره مختلفه
و لما اقرا في الجرايد الحوادث اللي بتحصل لسواقين التاكسي ... و ان حد يحط مطوه في جنب السواق او تتسرق عربيته ... بطلت الموضوع ده ... ولما اشوف حد واقف يشاور لي بقيت اشاور في الاتجاه التاني كأنه مش في طريقي ..... طبعا بابقى متضايق .... بس مبقاش فيه امان .... وللاسف اللي معرفوش مربكبهوش
مش قصدي اقولكم متعملوش كده.... لأ طبعا .....الحذر لا يمنع القدر .... لكن نكون حريصين ... وياريت الناس اللي بتعمل الموضوع ده تقول علشان تشجع غيرها وتشجعني تاني ....
وكويس ان حضرتك حددت المسنين ... لأنهم فعلا لا حول لهم ولا قوه .... بس برضو ناخد بالنا من المكان اللي احنا فيه و اللي رايحينه..... للأسف احنا في زمن !!!!! مفيش فيه حاجه مضمونه ptmnlo123per144ptmnlo123p er144ptmnlo123per123