الانطباع الاول عن امجراند EC7

[Sky_Rider]

المشاركة الأصلية كتبت بواسطة الاستاذ/ علاء السلام عليكم وربنا يباركلك فيها ان شاء الله .... وعمر الايمجراند ما حتكون اسوء من الفيرنا !!! معرفش ايه الحمله الشرسه دى .... ربنا يهدى .....

اشكرك يا استاذ علاء على شعورك الطيب .. و الحملة الشرسه ديه طبيعية لاي منتج جدبد... في ناس لحد دلوقتي مش قادرة تقتنع ان الصين تقدمت جدا في صناعة السيارات .. بقت بتطورسيارات فعلا جيدة ... قرأت احد التعليقات على فيديو اختبار التصادم للامجراند على اليوتيوب بيقول التاريخ بيكرر نفسه .. السيارات اليابانية واحدة واحدة بقت زي الاماني .. و الكوري واحدة واحدة بقى زي الياباني .. و الصيني واحدة واحدة بقى زي الكوري ... وهو ده الطبيعي لاي مصنع حاطط في خطته الاستمرار و النجاح .. بدأو بحجات ضعيفة ثم متوسطة ثم جيدة ثم ممتازة ... و لو بصيت على كل السيارات الصيني من اول ما نزلت .. هتلاقي موديلات 2007 بعد خمس سنين من استخدامها ما زالت افضل حالا من موديلات 2002 بعد نفس الفترة من الاستخدام ... اللي همة خمس سنين ايضا .. والصينيين ماشيين صح .. منتجاتهم بتتباع في كل الدول اللي فيها طبقية .. ومحدودية الدخل زي مصر و كثير من دول العالم ... كيف تمكنت شركة جيلي من شراء شركة فولفو بكل امكاناتها من فورد مقابل مليار و 800 مليون دولار ... وغيرها من الشركات مثل ام جي .... هذه هي الصين .. وليس بجديد على شعب يقدس العمل و هناك هدف يراد نحقيقه ...

تحياتي

[baby2000]

الصينى صينى ولو قام من النوم يا جماعه بلا قرف صينى ايه اللى نحط فلوسنا فيه ووالله لو تسارعها احسن من الباسات برده صينى ومعروف ان xxxxxxxxxxxxxxxxxبس اللى بتشترى الصينى اعمادا على المنظر العام بس المضمون اكيد سئ على المدى البعيد ده غير سعر اعاده البيع زى الزفت وخساره فادحه و قطع غيار عمرها قصير جداااااااااا وهو ده الصينى و عموما هى ازواق و ربنا يبارك لكل انسان فى عربيته ومبروك لكل واحد اشتراها

[Sky_Rider]

تقرير ال 10,000 كلم ...
http://masrmotors.com/vb/showthread.php?t=111229

[ابو هيما]

السلأم عليكم ورحمة الله وبركاته
الحمد لله والصلأة والسلأم على رسول الله سيدنا محمد صلى الله عليه وسلم :

بفضل الله أستلمت على خير السيارة جيلى أميجراند , جبتها من الأتحاد الوطنى للأستثمار ب 80 ألف,
طرف أستاذ محمود جمال صاحب الموضوع وزميلنا فى المنتدى وأنا بشكره جداً على ذوقه وعلى حسن أخلأقه ,
ملأحظاتى عنهم .. السيارة أستلمتها بحالة مذرية جداً ومتسخة لدرجة أن معالمها تكاد تكون مطموسة من كثرة الأتربة , كانوا مواعدنى بغطاء ودواسات هدية وللأسف ما أستلمتهومش , وبصراحة أتنرفزت جداً جداً من منظر العربية والتراب اللى بهدلنى وكمان من الهدايا اللى ما أستلمتهاش , ولكن لولأ تدخل أستاذ محمود ما كنتش خدت الهدايا دى كمان !!!!


بصراحة مش عارف أبدأ أزاى لأن لى عدة ملأحظات مهمة جداً على السيارة :

أنا جبت العربية دى عشان أرخصها سياحة وكان معايا واحد صاحبى عنده مكتب ليموزين فى مدينة دهب , أشترى واحدة هو كمان عشان يرخصها سياحة وأستلمنا بالفعل مع بعض , عداد السيارة كان 15 كيلو

وأحنا بنفحص فى المرور , الكل كان معجب بشكل العربية ومن شياكتها وفى نفس الوقت كانوا قرفانين من التراب اللى عليها وللأسف ماكنش عندنا أنا وصاحبى وقت ناخدها ننظفها فى أى بنزينة , لأننا كنا مرتبطين بميعاد فحص ومتأخريين , ولكن وبشكل عام السيارة تبهر كل من يراها من أول مرة !!

أنا سقت العربية بعد ما أشترتها داخل القاهرة لمسافة 200 كيلو , وأليكم كل ملأحظاتى الأولية عنها :

1- اول حاجة تلاحظها من لحظة التدوير أن المارش مش زى التويوتا أو الهيونداى بيلقط من أول مرة , ولكن لأزم تنزل معاه سنة مطولة لثانية ثانيتين كده .

2 - الباور ناعم جداً

3 - الكراسي ناشفة شوية ومتعبة , مش عارف مع الوقت هاتتغير وتطرى ولأ هتحتاج سفنج للضهر , بس بصراحة مش مستريح فى القاعدة

4-أسوء حاجة فى العربية دي , دواسة البنزين , عالية بشكل غبى جداً , عالية زيادة عن اللأزم , أنا سقتها مسافة 200 كيلو ومش عارف أفرد مشط رجلى .. بجد رجلى وجعتنى جداً ومفصل رجلى كمان لأنى كنت مميلها وبدوس ببطن مشط الرجل .وعندى سؤالى للأخوة الأعضاء .. هل ينفع أوطى دواسة البنزين دى ولأ لأه ؟!! أنا مش مستريح منها خالص وتعبانى أوى !!!!

5 -السحب سيء جداً جداً جداً وبيكون ملحوظ أوى على مطالع الكبارى , وعلى فكرة صاحبى اللى أستلم معايا كنا أنا وهو ماشين مع بعض وقالى نفس الكلأم على السحب , وأنا بصراحة عاوز أعرف رأى الناس اللى جابوها واللى هما كانوا بيقولوا السحب رائع , واللى يقولك سحب الأميجراند بيفكرهم بالهوندا سيفيك وما إلى ذلك .. مش عارف على أى أساس كانوا بيقولوا كده , ما هو يا أما:
* ماركبوش عربيات قبل كده.
* يا أما هما مايعرفوش يعنى أيه سحب.
*يا أما بقى أنا اللى رجلى خفيفة شوية على الدواسة ,, بس والله السحب والتجميع وحش جداً , وأنا مش عارف بصراحة لو العربية دى فضلت على كده بعد التلين أزاى هتقدر تسد معايا فى طريق زى سانت كاترين أو طريق زى صاعدة نويبع !!!!!

6- التكيف جربته , كويس , بس قفلته لأنى لسة فى التلين.

7 - الفتيس بيبقى ناعم بعد السيارة ما بتتحرك ونقلأته حلوة ومش وحشة

8- مش هقدر أتكلم عن الأضاءة الأمامية الأن لأنى لأزم أجربها الطرق السريعة . ولكن أضواء العدادت رائعة

9-أستهلأك البنزين برضوا لسة مش عارفه هيبقى أزاى ولو انى أعتقد انه هيبقى عالى لأن السيارة سحبها بطىء وثقيلة جداً .

10 - العفشة , ناعمة وحلوة جداً , وده بيبقى ملحوظ جداً للى كان راكب فيرنا أو لأنوس , وكمان العربية تقيلة وتحس أنها ثابتة زى الأوكتافيا كده .

11- الكاسيت مش هاقدر لسة أحكم عليه ولو أن أستقبال موجات الراديو كويس جداً والصوت واضح برغم أن ما فيش أريال خارجى.

12- العربية فيها جهاز أنذار ومفتاحين ريموت , بس صاحبى اللى أستلم معايا الباب الخلفى عنده ما كنش عاوز يفتح ولأ بالريموت ولأ بالأيدى وهو متضايق جداً !!!!

13- أنا ما أستلمتش كتيب ضمان ولأ دليل مستخدم , مش عارف هى ما لهاش دليل أرشادات ولأ أيه

دى ملأحظاتى وبكل
أمانة وأن شاء الله سوف أوافيكم بالمزيد كل شوية ,, ياريت كل اللى عنده رد على ملأحظاتى وأستفساراتى دى يضيفها ويرد عليا ...

[Sky_Rider]

عزيزي ابو هيما .. الف مبروك و ربنا يديك خيرها و يكفيك شرها ..
بالنسبة للملاحظات اللي انت ذكرتها عن العربية .. خصوصا الحاجات اللي مضايقاك زي دواسة البنزين و السحب و الكرسي .. هقول لحضرتك و عن تجربة 10300 كلم استخدام شاق و سفر متكرر .. بالنسبة لدواسة البنزين انها عالية فده حسيته اول كام يوم فقط ,, ولكن بعد تعديل و ضع الكرسي بقت مريحة جدا و اتعودت عليها .. و بالنسبة للسحب .. فهي معايا و مع كثير من اعضاء نادي سيارات امجراند مصر جيدة جدا .. مش هقول زي السفيك و الكلام ده لان مفيش حاجة زي التانية تماما .. بس هي قريبة جدا لسحب اللانسر 1600 .. ولكن بما ان محركها 1500 ووزنها حوالي 1270 كلم و اقصى عزم للمحرك عند 4000 لفة .. فهي بتحتاج انت تدوس على النقلات شوية عشان تحس بعزمها .. ولازم تضبط عربيتك في الصيانة .. لان فعلا سحبها اتحسن جدا معايا بعد صيانة ال 10,000 ,,, واستهلاك البنزين جيد جدا .. معايا حوالي 650 كلم للتفوية 50 لتر .. الثبات و الفرامل رائعين بكل المقاييس ... بجد زي السيارات الالماني .. الكرسي ممكن زي مانت بتقول مش طري .. بس مش متعب اطلاقا .. انا بسافر بيها 5 ساعات قيادة و مبحسش باي اجهاد من الكرسي ... و لو انت عايز تجرب عربيتي فاي وقت انا تحت امرك .. انا جنبك في شرم الشيخ ... لك تحياتي ..