تقرير عن صيانة 1000 كم لسيارة BYD AT

[ahmed hammad]

الأخوة الأعزاء
أعود إليكم مرة أخري بعد إتمامي مسافة 1000 كم بعربيتي والذهاب إلي مركز القطامية للصيانة الدورية وقد وجدت أن الخدمة هناك جيدة لا بأس بها من حيث المعاملة حيث قمت أولا بالإتصال بمركز الخدمة وتم تحديد ميعاد اليوم 18-6-2012 وإليكم ما لاحظتة في سيارتي العزيزة:
1- العربية أول ما إستلمتها كان سحبها كويس لكن مع تشغيل التكييف يقل السحب شوية.
2- عندما جلس صديق لي في الكنبة الخلفية لاقيت إن العربية تحك في المطبات مش كلها بس مطبات الاهالي هي اللي كانت مشكلة.
3-الشنطة كانت بحاجة للرزع عشان تقفل.
4- لاقيت لما ادوس فرامل والعربية تقف صوت دربكة من ناحية الفتيس أو من قدام وصوت طقة خفيفة لما اشيل رجلي من علي الفرامل وادوس بنزين.
5-بعد ما قطعت حوالي 500 كم لاقيت العربية سحبها قل عن الاول ولما التكييف يشتغل تحس انك بتحارب. وكمان في صوت زنة ناحية التابلوه طول ما العربية واقفة والتكييف شغال.
بعد ما قولت كل ده للمهندس خدوا العربية مني واستنيت حوالي ساعتين ونصف بعدها استلمت العربية.
وطلعت بيها بره التوكيل وجربتها لاقيتها اتحسنت كتير كتير عن الاول والاداء بتاع العربية برضه افضل لما شغلت التكييف بس برضه لاقيت العربية عزمها قل شوية بس احسن من الاول بكتير.
ودفعت 187 جنية لتغيير الزيت والفلتر وتركيب بادج BYD لانه للاسف واحد ابن حلال فكه وخده. والمحاسب قالي المرة الجية في صيانة 5000 كم هيكون الحساب 235 جنيه.
بس ليا ملاحظات علي التوكيل
1- التوكيل فرع القطامية منظم جدا يعني بالحجز والدور.
2-في مشكلة وهي النظافة للأسف لاقيت بقعة من الشحم علي ارضية العربية من جوة ومخدتش بالي منها إلا بعد ما طلعت علي الدائري محور المنيب.
ياريت التوكيل يهتم شوية بموضوع النظافة.
المهم اداء التوكيل في القطامية يأخذ درجة جيد جدا والمعاملة جيدة وليست سيئة.
والعربية في مجملها ممتازة
وشكرا

[mhamdy75]

مبروك عليك

الصيانة الموفقة

[hanyyyyyy]

يامسسسسسسسسسسسسسهل خير خير

بيحاولو يطورا وده شئ كويس وبالتوفيق انشاء الله

[العمده المليجى]

ربن يهدى ويكون احسن واحسن وربنا يديك خيرها ويكفيك شرها

[العمده المليجى]

لا اله الا الله سبحانك انى كنت من الظالمين