|
#1
21-03-2013, 03:45 PM
|
||||
|
||||
 المنتدي الجميل مصر موتورز الأخوة الأعضاء الكرام أولا أتوجه بالشكر و التحية للعضو Admire Cars و العضو Ahmed_eng2001 لأني إستفدت من موضوعاتهم و جعلوني أتشجع إني أعمل الموضوع بنفسي من ثلاث أسابيع نزلت التوفيقية إشتريت شوية حاجات للعربية زي قاعدة فتيس كاوتش - قاعدة موتور - 2 بلية عجل - زيت إبرو - فلتر زيت - كاوتش كوبلن و كسلت بصراحة أغير الحاجات دي و أصلح العربية .... نظرا لظروف شغلي المهم كان عندي مشكلة في الفتيس بقالي 3 شهور و كنت هتجنن و عايز أعرف سببها إيه اكون ماشي تمام و فجأة العصاية بتاعت الفتيس تبقي محجرة و ما بتتحركش خالص أقوم مبطل العربية و هي ماشية و أحرك العصاية تقوم ترجع لطبيعتها ثم أعيد التدوير و أمشي عادي المشكلة دي كانت بتحصل مرة واحدة في اليوم إمبارح للأسف لقيت الفتيس محجر علي الغيار التاني و مش عايز يتحرك خالص حتي لو بطلت العربية و مش عارف حتي أخلي العربية علي وضع (المور) و لا عارف أجيب مرشدير (مصيبة) إضطريت إن أركن في مكان آمن و كملت مشاويري مواصلات ..... و انا راجع البيت مشيت للأسف علي الغيار الثاني بس (مفيش غيره) مسافة 45 كيلو ... خدتها في ساعتين و نص (الحمد لله إنها ماشية ورجتني البيت) قررت إني أفك بقي كل حاجة محتاجة تصليح و قولت فرصة أشوف (البطة البيضا) عايزه ايه إستعنت بالله و توكلت عليه و بدأت كما في الصور تماما جهزت العدة بتاعتي و رتبتها  و بدأت فكيت العجل  و فكيت ماستر الفرامل  ثم الطنبورة  ثم السرة و البتاعة دي (معرفش إسمها إيه ههههههههه)  ثم فكيت الكبالن بالأكس بتاعها و فكيت المساعدين  نزلت الزيت القديم( 3 لتر بس ) هل كدة مضبوط و لا ناقص  فكيت الجنب التاني بنفس الطريقة الترتيب و النظام هاااااااااام جدا ..... و النظافة من الإيمان  فكيت القنطرة و قاعدة الفتيس و فكيت الميزان و نزلته شوية عشان أعرف أطلع القنطرة من فوق الميزان ... و طبعا سندت الموتور كويس من تحت عشان مايبقاش متعلق بقاعدة واحدة بس  القنطرة بعد خروجها  لازم طبعا الكوريك يكون تحت الفتيس قبل ما تفكه عشان مايقعش منك  بدأت أفك مسامير الفتيس واحدة واحدة .... و طبعا فكيت قاعدة الفتيس اللي فوق عشان كانت مقطوعة .... و فكيت مروحة الردياتير عشان في 3 مسامير رخمين (بتوع المارش) عشان أعرف أفكهم .... و فكيت الواير بتاع السرعة و سلك الدبرياج  جبت كوريك تاني عشان لقيت ان واحد لا يكفي و بدأت في تنزيل الفتيس واحدة واحدة  و لازم الفتيس يخرج بجنب واحدة واحدة  مبروك المولود خرج من بطن أمه و طلع ولد ههههههههههههههه  قولت برده أفك الديسك و الأسطوانة و أشوف حالتهم.. ايه رأيكم فيهم  و آدي شكل الديسك و الأسطوانة و البلية بعد التنظيف بشوية بنزين كدة عالماشي  الموضوع إستغرق معايا 8 ساعات ( فك فقط ) و ربنا يستر عالتركيب يا رجالة بعد إذنكوا شوفوا الفيديو دة و عايز رأيكو بصراحة  في معلومة نسيت أقولها برده بعد إخراج الفتيس من العربية جربت أحرك العصاية المسئولة عن نقل الغيارات ... برده قافشة ومابتتحركش منتظر آرائكم في الأسئلة الهامة دي 1 - هل أستكمل فك (صندوف التروس) و لا أوديه لبتاع فتيسات إللي يقدر يبعتلي فيديو مشروح فيه طريقة فك صندوق التروس و تفاصيله من جوة ... يبقي كتر ألف خيره 2 - رأيكم ايه في الديسك والأسطوانة والبلية و عايز أفكاركم معايا يا جدعان ... ربنا مايحطكوا في بايخة زي دي  البلية أعتقد شغالة تمام لأنها بتلف حلو بدون أي صوت أو خشوتة الإسطوانة أنا شايفها كويسة --- إيه رأيكو برده الديسك --- نغيره و خلاص و لا ايه النظام 3- أجيب أد إيه زيت للفتيس و نوعه ايه و رقم كام ---- مه الهلم ان مفيش في السوق (فالفولين 140) مفيش عند أي موزع --- يا تري ايه النوع البديل والأسعار كام أنا بقالي 28 ساعة صاحي --- و نفسيتي تعبانة من العربية و قلقان مش عارف ليه  هستأذنكم أخش أنام و اول ماأصحي هقرأ المشاركات   الجزء الثاني عملت دورة غسيل للفتيس من الداخل بالبنزين كويس كذا مرة و نزل كمية وساخة مايعلم بيها إلا ربنا (تراب و طين و شحم + رايش حديد + رولمان بلي بتاع صليبة الكوبلن + خيوط محشورة + سيليكون من آثار لحام الجوانات من زمان ) و المفاجأة ان لقيت عصاية الفتيس إشتغلت ... و التحجيرة راحت شوفوا الفيديو دة بس محدش يضحك عليا هههههههه http://www.youtube.com/watch?feature...&v=YojMy_Khcqg يا تري بعد كل دة أودية لبتاع فتيسات و أخليه يفكه و يشوفه طالما هو بره العربية ولا أركبه و أحط زيت جديد و أغير الديسك و الأسطونة و بليه جديد في جديد .... و أمشي علي كدة و خلاص أخذت رأي الأعضاء أولا .... و هم مشكوووووووووورين جميعا علي وقوفهم جنبي و مساعدتهم ليا ومتابعتهم للموضوع أول بأول ahmed_eng2001 cars admire حمدى مخترع مانيوال بدون دبرياج و كان رأي البعض إني أركب و خلاص و رأي البعض الأخر ... وديه لبتاع فتيس عشان تبقي مطمئن حاولت إني أفك الفتيس كدة و أشوف شكله ههههههه فكيت كام مسمار و لقيت في مسامير صعب فكها محتاجة صنايعي و محتاجة (مفك كومبروسر) المهم وديته لبتاع الفتيسات و فك و قاللي محتاج (غويشتين و أويلسيل و ترس الغيار الثاني) و قاللي حاجة عالترس بتاع الغيار الثاني إما تشتريه إستيراد ب 150 جنيه أو يتظبط عند خراط ب 30 جنيه (مش فاهم يعني إيه) قولتله أيهما أفضل ... قاللي الأتنين واحد المهم عملته ب 30 جنيه و الصنايعي مصنعيته 80 جنيه و الغويشتين إشتريتهم ب 50 جنيه و الأويلسل دوخت عليه في التوفيقية كلها و شارع شامبليون كله (ملقيتهوش جديد) إضطريت أشتريه إستيراد ب 80 جنيه (بعد ما كان البائع بيستهبل و بيقول 150) يعني من الأخر تكلفة تصليح الفتيس (240 جنية) و آدي صورة للغويشتين و الأويلسيل (الرخم)  و طبعا أثناء الجولة في التوفيقية إشتريت كل إللي كانت محتاجاه العربية  كاوتش كوبلن داخلي + الكوتشة الرخمة اللي بتركب في عصاية الفتيس + نص كيلو شحم بترومين + فلتر زيت + علبتين إبرو + صليبة كوبلن + بليتين للعجل + بلية دبرياج جديدة + ديسك إستيراد + مليت الأسطوانة تيل جديد + علبة إسبراي فضي + أوكرة باب عشان القديمة مكسورة الديسك جديد كان عامل 130 جنيه و جبته إستيراد ب 50 جنيه الأسطوانة جديدة ب 85 جنيه و مليتها ب 40 جنيه تيل ألماني ركبت الديسك و الأسطوانة و بدون ما أستخدم (عمود دريك عشان السنتر) السنتر ممكن يبقي أسهل من كدة انا مسكت الأسطوانة من الثلاث أطراف بتوع الديسك (المفتوحين) و ظبتها تمام  ركبت الفتيس أنا و معايا إخواتي الأثنين (الموضوع سهل جدا) بدون أي مشاكل برغم اني اشتريت اسبراي فضي ... لكن كسلت ارش الفتيس لأنه كان محتاج وقت عشان يتصنفر بالفرشة السلك و بصراحة كان عندي (ظروف صعبة شوية) عشان كدة كسلت و قولت أنجز و ركبت قاعدة الفتيس في القنطرة الأول ... ثم ركبت القنطرة تحت الفتيس  ركبت الكاوتشة دي و ربطت معلقة الفتيس لكن الرخامة اني معرفتش أركب الكاوتشة في الأويلسيل (في الأخر سبتها بعد محاولات كتير)  نظفت الكوبلن إللي كان كاوتشته مقطوعة ... و غسلت الكوبلن بالبنزين عشان أشيل الشحم و حطيت شحم جديد و قفلت الكاوتشة الجديدة و حطيت الكاوتش الداخلي و صلايب الكوبلن و التيلة الصغيرة   بعد كدة بلي السرة شيلت البلي القديم و جبت صنفرة و صنفرت مكانها و نظفت كويس و روحت للخراط عشان يكبسها البلي لازم يتكبس عند الخراط (عشان يبقي عمره أطول)   و تم التقفيل لكل حاجة علي نظافة و أخيرا حطيت زيت الفتيس (140 موبيل) و غيرت زيت الموتور و حطيت الدلفاك الجديد و علبة الأبرو  تم بحمد الله و سأوفيكم بالنتائج مع الوقت إن شاء الله  بشكر كل من تابع الموضوع من اوله لأخره و كل من ساعدني بآراء و افكار و تشجيع Hisham.Elgazzar nktis محمد فيصل amr elsisi 1 و بشكر AbOnOrA علي تثبيت الموضوع  
__________________
التعديل الأخير تم بواسطة AbOnOrA ; 31-03-2013 الساعة 06:03 PM 
|
|
#2
21-03-2013, 04:07 PM
|
||||
|
||||
رد: ◄██▓▒░░ تصليح (فتيس / كبالن / بلية العجل / مساعدين) بنفسك ░░▒▓██►
قمة وروعة فى التنسيق وعرض الموضوع بإحتراف
البلية معلمة فى الديسك وهتحتاج عمود دريك عشان تسنترها تانى مع الفولام ماتنساش البلية بتاعت الفولام طالما فكيت الديسك والبلية لازم تغيرهم اويل سيل الكرنك عاوز يتغير إغسل الإسطوانة والديسك بالبنزين قبل ما تركب وزيت البلية انت بتقول بعد ما فكيت الليلة دى كلها لقيت العيب فى حشو عصاية الفتيس هو اللى كان داقر يعنى الفتيس سليم !!!!!! وطالما مش بيجيب زيت احتمال كبير يكون مافيهوش حاجة والعيب من العصاية مش بتعشق الغيار حلو فبينطر  انت مكانك فين فى مصر انا فاضى جمعه وسبت ممكن أساعدك فى التقفيل
|
|
#3
21-03-2013, 04:45 PM
|
||||
|
||||
رد: تصليح (فتيس / كبالن / بلية العجل / مساعدين) بنفسك
بص يا H انا بصراحة معرفش مصطلح (دريك) و (فولام) إيه المقصود بيه بالضبط هو العمود إللي بيركب فيه بلية الدبرياج إسمه إيه و الجزء المتحرك اللي بيركب فيه سلك الدبرياج إسمه ايه هل دول إللي انت تقصدهم الحاجة التانية انا لسة مافكيتش (صندوق التروس أساسا ) لأني مطبق من إمبارح و بقالي 28 ساعة مانمتش عشان كدة هأجل فك صندوق التروس بكرة بعد الظهر إن شاء الله لكن و هو الفتيس علي الأرض (خارج العربية) انا حركت عصاية الغيارات ... و مازالت محجرة هستني لما أفك و أشوف إيه سبب التحجيرة بالنسبة لمكاني بعيد عن القاهرة ... لو علي التقفيل إن شاء الله مقدور عليها ... معايا إخواتي الأتنين موجودين .... هي الموضوع أنا عايز أعمله بتأني و صبر عشان التفغيل يكون علي (مية بيضا) THank You Very Much Hisham.Elgazzar 
__________________
|
|
#4
21-03-2013, 04:45 PM
|
||||
|
||||
|
رد: تصليح (فتيس / كبالن / بلية العجل / مساعدين) بنفسك
|
|
#5
21-03-2013, 05:02 PM
|
||||
|
||||
|
رد: تصليح (فتيس / كبالن / بلية العجل / مساعدين) بنفسك
عمود الدريك بيبقى عند الميكانيكى عشان يسنتر الإسطوانة مع الفولام والديسك
والمفروض كمان هتلاقى بلية صغيرة فى نص الفولام لازم تغيرها طلاما فكيت وبعدين انا شايف زيت ورا حلة الفتيس معرفش من الموتور ولا من الفتيس بس طلاما 3 كيلو زيت يبقى الأويلسيهات بتاعته كويسة وبرضو بتتغير لما تفك الفتيس التروس اللى بتنطر هتحتاج كبس وغوايش وكل ده سهل لكن تصليح الفتيس لو زاد عن 200 جنيه طالما له بديل ورخيص من 350 - 400 تجيب فتيس اونو سريع هتحس انك راكب عربية تانية المهندس أحمد فك فتيس عربيتة الشيفروليه بليزارد ال4*4 الكبيرة فماتقلقش الموضوع بإذن الله هيبقى بسيط جدا أهم حاجة صور الخطوات كلها وبإذن الله ربنا يجعل الموضوع ده فى ميزان حسناتك وحاول تشرح كل حاجة بالظبط عشان الناس تعرف ان الميكانيكى أكتر واحد ممكن يشتغل الناس ويضحك عليهم
|
 |
| الكلمات الدليلية |
| مساعدين, فتيس, كبالن |
|
|
