وأخيراً نيو أكسنت "سبورت" ونولت

[صبرك يارب]

العربية حلوة فعلا بس انا مش شايفة اى فرق بينها وبين النيو اكسنت العادية غير من الخارج المقدمة وبعض الاشياء الخفيفة بس يا ريت تقولنا ايه اخبار سحبها وسرعتها

[TeGo]

السلام عليكم

الف مبروك السيارة وربنا يكفيك شرها ويباركلك فيها

ياريت تصورلنا السيارة من الداخل وتعملنا عنها تقرير مفصل بالصور عن كل جذء فيها (واهم حاجه تصور الUSB )


تانى حاجه اخبار الثبات ايه على السرعات العاليه؟. هل السيارة ثابتة على السرعات العالية ولا خفيفة

عايزين منك الجديد وسيبك من اللي علي اليوتيوب وخلينا في عربيتك صور بقا يجميل من اللي قلبك يحبها بالذات العدادت والتابلوه وياريت والتابلوه منور بالليل علشان انا بحب اوي انوار التابلوهات متنساش يا برنجي وانا مستني الصور

[ESL NSR]

المشاركة الأصلية كتبت بواسطة صبرك يارب العربية حلوة فعلا بس انا مش شايفة اى فرق بينها وبين النيو اكسنت العادية غير من الخارج المقدمة وبعض الاشياء الخفيفة

بالظبط كده هي فعلا ماتفرقش كتير زي ما هو معروف هي الشكل الخارجي في المقدمة الجديدة والعتب وحلي نيكل بعد كده وفرق الكماليات في المرايات الكهربا والفوج لايت ...

بس يا ريت تقولنا ايه اخبار سحبها وسرعتها

زي ما هو معروف عنها النيو أكسنت بصفة عامة موتورها قوي ، بس أكيد طبعاً لسة الموتور بيلين فبردو حاسس إنه مكتوم شوية وسحبته مش الي بشوفها في النيو أكسنت بس ده مايمنعش إنها بردو ما شاء الله عليها أنا بطلع بيها من الوقوف جنب عربيات تانية 1600 ماشية وبتجيبها وتعدي ... إنما بالنسبة للسرعة فطبعاً أول ألف بردو عشان الموتور ماينفعش تمشي أكتر من 80-90 فدي ماقدرش أحكم عليها إلا بعد الألف الأولى إن شاء الله لما العربية تاخد نفسها وتجري من غير ما أكتمها زي ما بعمل دلوقتي ...

[ESL NSR]

المشاركة الأصلية كتبت بواسطة TeGo السلام عليكم الف مبروك السيارة وربنا يكفيك شرها ويباركلك فيها

يارب الله يبارك فيك ...

ياريت تصورلنا السيارة من الداخل وتعملنا عنها تقرير مفصل بالصور عن كل جذء فيها (واهم حاجه تصور الUSB )

إن شاء الله أكيد بس زي ما قلت تصبروا عليا شوية ... إنما بالنسبة للوصلة أنا بدأت أفكر إن أي كلمة عليها بعد كده تبأة بفلوس عشان الطلب عليها زاد وأنا لازم أستغل الفرصة الصراحة يعني ...

تانى حاجه اخبار الثبات ايه على السرعات العاليه؟. هل السيارة ثابتة على السرعات العالية ولا خفيفة

زي ما أنا لسة رادد على (صبرك يارب) العربية لسة ماينفعش يتعدى بيها 90 إلا بعد أول ألف ... وبالنسبة للسرعة المسموح بيها دلوقتي بالعربية ما شاء الله بتعمل الي إنت عايزه منها وثبات هايل لحد 90 وده طبيعي أكيد بس الفكرة في الآداء الرياضي كمان والعربية ماهياش تقيلة ومفروده على الأرض زي الفطيرة زي اللانوس ولا الصني الي المناورات والتغريز بيهم محتاج سواق معلم (طبعاً خفة الأكسنت وآدائها ده ممكن يكون عيب على السرعات العالية) بس هشوف بعيني ماحدش هايقولي إن شاء الله في القريب العاجل، وأهم حاجة م الآخر في النقطة دي سلامتي الشخصية والراكبين معايا قبل سلامة العربية إياكش مامشيش بيها أكتر من 120 وهي موزونة حلو أوي رضا وعاجباني عشان كده ممكن ماتفرقش كتير معايا الجزئية دي قدام ...