عربية زيرو في حدود 50 الف ايه الاحسن ماروتي 2014 ولا شانا بيني ميني 2014 ؟

[frnko95]

انتى بتفاصلى على نفسك

ليه هاتنزلى 20 الف جنيه مره واحده العربيات دى تمنها فيها والرخيص ماننصحكيش بيه لانه محتاج رعايه خاصه و30 الف جنيه مش هايركبوكى حاجه مكيفه مضمونه من اللى اتكلمنا عنه يبقى الماروتى افضل ليكى مقارنة بالعربيات اللى قولتيها دى وانتى مافيش خبره يبقى ماتركبيش فى المستعمل تحت 2009 وعداد فوق 100 الف كيلوا وحسب الحاله العامه برضو او تدفعيهم مقدم وتقسطى مستعمل من اى معرض هنا بفايده كويسه وماتتعبيش دماغك وماتسترخصيش فى عربيتك بالذات عشان لو وقفت بيكى فى الطريق فى الصحرا او فى الحر وانتى لوحدك صدقينى هاتقولى ياريت كنت دفعت الخمسين فى حاجه كويسه تفاديا للبهدله

وبالتوفيق

[om 7azem]

على فكرة انا كنت فى نفس الموقف بتاعك من 3 سنين بالظبط وسمعت نصيحة كل اللى حواليا بانى لازم اتعلم على عربية مستعملة وبالفعل اشتريت الماروتى وهى بالفعل وعن تجربة عربية اقتصادية بمعني الكلمة .. اقتصادية جدا فى البنزين (كنت بفولها مرة واحدة كل اسبوع وتقريبا نص التانك بيفضل مليان وبروح مشاوير كتييييييييرة بيها) و كمان قطع غيارها رخيصة جدا (تقريبا ببلاش) علشان كدة كنت بتعلم عليها وانا مش خايفة اخبطها لانها هتتصلح بكلام فاضى و بالفعل دة كان سبب مهم اوى انى اتعلمت بسرعة .. نقطة مهمة كمان ان حجمها الصغير ميزة قويه جدا لان حضرتك هتقدرى تركنيها فى اى مكان مهما كان صغير او بعيد عن الرصيف (هتقابلك صعوبة فى الركن وانتي لسة بتتعلمى وصغر حجم العربية هيفيدك جداااااااا) وكمان لو اسرتك عددها قليل يبقى انتي مش محتاجة عربية كبيرة دلوقتى .. دة طبعا غير انك هتمشى بيها بكل سهولة فى الشوارع الزحمة بتاعتنا وهتقدرة تعدى بيها من اى حتة مهما كانت ضيقة .. بالاضافة ان شكلها حلوز
نيجي بأة لاعادة البيع انا لما حبيت ابيعها ماكملتش 24 ساعة بكل اجراءات البيع .. لقيت مشترى بعد نص ساعة بس والمعاينة وتوكيل الشهر العقارى خدوا يوم واحد بس... ولو حضرتك دورتي على سعر المستعمل فيها هتلاقى ان احسن عربية موديل 2007 مثلا ممكن تكون ب 27 الف على الاكثر (يعنى اقل من الميزانية اللى انتي محدداها) .. عن نفسى وعن تجربة بنصح حضرتك بالماروتى وربنا يوفقك ( ودة لينك فيه عربيات مستعملة نضيفة جدا دورى فيه على حاجة موديل حديث وتكون عاملة اقل عداد)
http://www.contactcars.com/usedcars?...uc&mk=46&md=92

[محمد اشرف]

السلام عليكم
انا مش هزود على كلام الاعضاء بس هوضح شويه
اولا بخصوص الماروتى والشانا لو انا الى هجيب هختار الشانا لان اولا الماروتى هندى بالكامل وليست يابانى تقفيل هندى يعنى مش هتفرق اوى ان الشانا صينى والماروتى هندى فالمقارنه فى بلد الصنع مش مشكله لان الاتنين يعتبروا واحد
ثانيا هختار الشانا لان شكلها احسن من المارروتى وفيها كماليات عن الماروتى الى فيها اوبشنز الدركسيون واوبشنز الفتيس وتوكيل سوزوكى كارمنا وعملنا اوبشنز مش موجود فى العربيات بس وهو الموتور ههههههههه
المهم كمان سواقه الشانا بينى احسن 100 مره من الماروتى
بس الحاجه الوحيده الى تعيب الشانا هو قطع الغيار لانها نادره مقارنه بالسوزوكى ماروتى الى قطع غيارها متوفره جدا وممكن استهلاك الماروتى فى البنزين اقل شويه من الشانا
بعد المقارنه دى لو هرد على سؤال حضرتك هقول لحضرتك اشترى الماروتى

لان حضرتك قولتى ان دى اول سواقه لحضرتك وصعب انى ارشح لحضرتك عربيه فيها امكانيات وزيرو وقطع غيارها مش منتشره اوى ودى اول مره حضرتك هتسوقى

وايضا رغم كل ده اقول لحضرتك بلاش تشترى زيرو مثل ما قال الاعضاء
ولو فى حدود ال30 الف عند حضرتك الديهاتسوا ميرا موديلات فى حدود ال99 والماروتى ايضا موديلات فى حدود 2007 وال2008 وفيه حجات تانيه بس تقريبا دول افضلهم فى البدايه

وفيه حاجه اخيره بلاش تبدأى بسياره كبيره لان السواقه فى البدايه صعب هتحفظى ابعاد السياره ودى مشكله اثناء زحمة المرور والركنه بالذات اما السياره الصغيره فى البدايه هتعرفى ازااى تحفظى ابعادها بسرعه ودى مهمه جدا وده هيمهد لحضرتك ان بعدها تركبى سياره كبيره وتحفظى ابعادها ايضا بسرعه

بخصوص تعليم السواقه فانا شفت ناس بتشتكى من المدارس وانهم مش بيعلموا حاجه غير حجات بسيطه وبياخدوا فلوس على الفاضى ومعظمها رشاوى عشان تمهيد للرخصه اسرع وانا رأيي ان لو حضرتك تعرفى حد يعلمك سواقه يكون احسن 100 مره لانه هيعلمك كل حاجه وهتقدرى تقولى ليه كمان الحجات الى انتى عايزه تتعليمها

تحياتى ......