رد: مخطط تصفيه الثوره ,,
يا حضرة....أيوه يا عم عمرو حمزاوي ...
أيوه إنت يا خواجه والاسم مصري... يا عضو كارنيجي أحد مراكز صنع القرار الأمريكي... قريت مقالك في الشروق اللي بتقارن فيه بين... ما حدث في المانيا على يد هتلر ووزير دعايته جوبلز من حشد الناس للفكر النازي ثم صحوة الالمان على هزيمة مروعة في الحرب العالمية التانية، وبين ما يحدث في مصر الأن بعد 30 يونيو 2013 ووصفك ًالمرحلة بأنها حكم "الجنرالات" الخادع لفئة غير قليلة من المصريين عبر اعلاميين وكتاب يساندون حكم الجنرالات... وتساؤلك اللوذعي عن كيفية محاسبة الاعلاميين اللي بيساندوا الحكم دلوقت بعد الانتفاض على الحكم ده ؟ ؟؟؟ معلهش اسمح لي افند كلامك بحكم المنطق لا بحكم الحجر الذي تمارسونه..
أولا : ازاي تقارن بين حكم هتلر اللي قاد المانيا والعالم لحرب عالمية مدمرة وبين السيسي اللي ما قدمش لمصر من يوم ما جه غير كل قرار جبن عن اتخاذه من سبقه استثمارا لكل فرصة اقتصادية وسياسية الى حد اعلان البنك الدولي تقدم مصر على اقتصاد جنوب افريقيا بنسبة نمو زادت في عامين من 2.5 % الى 4.2 % في ظل كل الظروف دي؟ مع حل ازمة كهرباء وغاز ومشاريع للمستقبل في الزراعة والطاقة وتحلية المياه ، واهتمام بالعدالة وفق معدلات لا تتحملها دول اكثر منا استقرارا؟
ثانياً: هتلر ما كانش جنرال يا دكتور عمرو ... هتلر كان نازي سادي دمر المانيا و ناسها قبل ما يدمر العالم واختاره الالمان بعد فترة كساد وازمات اقتصادية ضربت العالم في اواخر العشرينيات وافتكروه الأمل بالظبط زي الأخوان في 2011 و انت الادرى مني بالسياسة و ايديولوجياتها... لكن السيسي رجل عسكري حر مستقل القرار عارف معنى الأرض و العرض والجنسية و الرجولة ارتضينا حكمه بعد ما فشلت افكاركم النظرية في حماية مصر من خطر التتار الاخواني الصهيو أمريكي، بعد ما وقفتم تتفرجوا علينا من بلكونات الفنادق و على شاشات التلفزيون وانتم بتنظروا و تتكلموا بس، بعد ما لقيناكم بتقعدوا مع ان باترسون تسألوها حتعملوا ايه معانا وردت عليكم وقالت لكم ليلة 4 ديسمبر 2012 ليلة مظاهراتنا عند الاتحادية- ان تاثيركم لا يتعدى 10% في الشارع وانهم مستمرين في دعم الاخوان وعشان كده ما نزلتوش المسيرات دي. السيسي ما اخدش رأي الامريكان يعمل ايه يوم 23 يونيو ويوم 30 يونيو ويوم 3 يوليو - السيسي خد قرار الحر المسئول.
ثالثا: عارف مشكلتكم ايه يا دكتور؟ انكم فاكرين ان ليكم تأثير قادر على دعم انتفاضه جديدة وكأن الناس ما اتعلمتش من غلطها لما صدقت تنظيركم... ثم ده انت واحد من الناس اللي فشلت تقنع اعضاء حزبك بافكارك واستقلت من الحزب وانهار ومش سامعين عنه....
رابعاً: خليني ارد على سؤالك اللي بتقول فيه نحاكم ازاي الاعلاميين المؤيدين للسيسي بعد انتهاء الحكم !!!! هو احنا كنا حاكمناكم على تاييدكم الفاسد للاخوان؟ هو احنا حاسبناكم على خداعكم للشعب بكلمات اثبتت الايام انكم مش ادها؟ هو احنا حاكمناكم على علاقاتكم بالغرب بشكل مقزز وعدم ادراككم او اغفالكم لحق البلد في انها تحمي نفسها؟؟؟ ثم الحقيقة من أنتم عشان تحاكمونا؟ المفروض انك راجل ليبرالي يؤمن بحرية الفكر وقبول الأخر أيا كان فكره؟ يا أخي ده انتم ما وقفتوش للأخوان لما مدوا ايديهم على ستات مصر في الشوارع...ولا لما حاولوا يبيعوا مصر لقطر و تركيا ايادي الصهيونية الامريكية اللي بتمول كارنيجي في واشنطن.... اعتبرنا زي الأخوان.... وبعدين هو مش من حقي اؤمن بفكرة وأدافع عنها زيك كده؟ وبالمناسبة أنا أخدت تمن دعمي لبلادي ... عارف ايه ؟ استقرارها و محاولتها النهوض ويا بخت من سند أمه في ازمتها...
لتاني مرة حاقولك عيب... فاكر المرة الأولى؟ افكرك ... لما نجحت في برلمان الاخوان وللأسف كنت احد من منحك صوته ولقيت مديرة مكتبك بتتصل بيه في اول مولد نبي بتقولي ممكن تديني العنوان...فسألتها ليه؟ قالت لي دكتور عمرو باعت للصحفيين علبة حلاوة المولد وعايز يبعت لك واحدة!!!! فكان ردي عليها : عيب لا باخد حاجة من حد ولا يعجبني ان عمرو حمزاوي عضو البرلمان يتصرف زي الاخوان والحزب الوطني ويشتري الصحفيين بحلاوة....
يا خسارة
منقوووووول
__________________
من مواضيع kj1 التاريخ الأسود لجماعة الأرهاب الأسود ليه لا وليس نعم مصر الجميلة الغائبة الأن
|
18-05-2016, 06:14 PM
