مشكله فى اوبل فيكترا و عايز اعرف حلها

[mtaiea]

السلام عليكم
انا عايز انوه لحاجه يا جماعه انا فعلا روحت لعباس بتاع الاوبل ده وطلع فعلا محترم جدا يا جماعه انا كان عندى مشكله ان وش الموتور من فوق كان بينشع زيت من شهر كده وروحت للميكانيكى بتاعى وقالى ده جوان وش التكيهات روحت جبته ب110 جنيه وركبته وبعد الميكانيكى ما ركبه قالى هغسل الموتور قولتلو بلاش عشان موتور الاوبل حساس شويه من ناحية الغسيل فالى يا بيه انت تخاف لو بتغسل فى بنزينه لكن احنا هنا فاهمين بنعمل ايه المهم خلا الصبى بتاعه يغسل الموتور وانا كنت واقف وحاطط ايدى على قلبى ومشيت من عنده وركنت العربية وجيت اطلع بيها بليل لاقيت العربيه بنتش ومش مظبوطه خالص رجعتله قالى ده عيب بوجيهات قولتله ازاى انا جيلك والعربيه سليمه كل اللى كان فيها وش الموتور بيعرق زيت المهم جبتله البوجيهات وبرده نفس العيب سيبته وبقيت مش مقتنع باى حاجه بيقولها لانى لاقيته مدخلنى فى متاهه وبقيت واقف فى الشارع مش عارف اعمل ايه وفجأه افتكرت المنتدى والكلام اللى كان على عباس ميكانيكى الاوبل اللى عنده ضمير انا بالفعل كنت فى المنيل يعنى خطوطين وابقى امام الفسطاط المهم روحت وسالت على عباس ووصلتله وقولتلو على المشكله وعلى اللى تم مع الميكانيكى التانى اول حاجه لاحظتها فيه انه متلكمش على الميكانيكى التانى وقال انه مبيفهمش زى كل الصنايعيه وده شدنى وبعد كده فتحتله الكبوت ودورت وبمجرد النظر ومن النظره الاولى عرف السبب وقالى العيب مش من البوجيهات العيب من سيلك البوجيهات نفسه فى فرده بتهرب كهرباء وبصلى كده وقالى انت غسلت الموتور ؟ طبعا انا مقلتلوش انى عملت كده لكن هو عرف من نفسه المهم هو ما كنش عنده فرده لوحدها بس ادانى فرده امشى بيها نفسى لحد لما الاقى الفرده المطلوبه ومرديش ياخد منى فلوس غير لما رجعتله بالفرده رقم 3 اللى كنت محتاجها واتصلى ناس عشان انا كل لما اروح لحد الاقى بيبيع الطقم على بعضه المهم جبت الفرده وركبهالى وشيكلى على الموتور والزيوت وكله تمام وبعد كده سألته كام حسابك وهى دى كات المفاجأه قالى طبعا فى الاول اللى تجيبه لاكن انا اصريت انه هو اللى يقولى فقاى 10 جنيه طبعا انا مصدقتش وحسيت انى جتلو بعربيه 128 لان انا لما كنت بروح لاى ميكانيكى مجرد ما يفتح الكبوت ويعمل اى حاجه بياخد اقل واجب 30 جنيه مع الاوبل بالذات المهم فى الاخر حبيت اقول ان اللى انا حسيته معاه انه بيفهم وعنده خبره كويسه فى الاوبل وعنده ضمير.

طبعا انا اسف على الاطاله بس انا حبيت اشرحلكو تفاصيل الموضوع
وعلى فكره فى واحد بتاع قطع غيار اوبل جديد واستيراد اسمه طارق اوبل فى شارع التحرير جنب الشبراوى اللى جنب مقار عند محطه البحوث الراجل ده ارخص واحد اتعاملت معاه وبلاقى عنده اى شئ محتاجه

[Ahmed_lol2007]

مش عباس دة اللى جمب طارق بتاع السيتروين والبيجو
وعنوانه الشارع اللى فى وش الباب العمومى لجنينة الفسطاط هو فى الوش فى حتة نزلة كدة بعد التقاطع
عموما ياريت حضرتك تكتب عنوانه بالتفصيل

[mgkandeel]

ممكن تليفون عباس لو سمحتم

[mercedes]

السلام عليكم و رحمة الله و بركاته

انا كنت عاوز أعرف كل حاجة عن العربية الأوبل 1600 موديل 2003, مالها و ما عليها و ايه عيوبها من حيث الثبات و أداء المحرك و أسعار قطع الغيار و الحرارة و كفاءة التكييف و أداء العربية عموما جوه البلد و عالطريق السريع لأنى كنت قريت موضوع فى نفس المنتدى ده بس كان عن الرينو الميجان و أعجبت كتير بالأسلوب اللى اتعرض بيه الموضوع بتاع الرينو لأنى فعلا طلعت بمعلومات جميلة جدا و كنت أتمنى أن يتم عرض كل الحقائق عن الأوبل ال 1600 مو 2003 بنفس الطريقة.

شكرا جزيلا و جزاكم الله كل خير

MERCEDES S430

[waelrr]

اشكركم جميعا يا خبراء الاوبل وخاصة المهندسين خير الناس انفعهم للناي يا جماعة -اقول مشكلتي وساعدوني لاني خلاص هابيعها لو متحلتش علما بأني باحترمها جدا
معايا اوبل 2003 اتوماتيك 1600 - لمبة الصيانة كتير تنور والعربية تتقل في حركتها - رحت توكيلين كلامهم هو تغيير الكمبيوتر الخاص بالمحرك وثمنه 7500 جنيه - وحساس الاكسجين وحساس ال اي جي ار ب 2500 الاتنين - مش لاقي حد يفيدني اعمل ايه افادكم الله