المواجهة ▲AbOnOrA☼ ◄VS► ▲Hazem Shahin☼

[حازم شاهين]

المشاركة الأصلية كتبت بواسطة AbOnOrA السؤال التالت ايه اهم النصائح اللى توجها لإدارة الموقع الجديدة وايه اهم الحاجات اللى تحب تنبهم ليها او تحذرهم منها

صباح الخير

إن كان لى أن أنصح الإدارة الجديدة فأحب أقولهم إنتم هتستلموا كيان الحمد لله كبير و مؤثر إتكلف مال و الأهم و اللى لا يقدر بثمن هو الجهد و الوقت طول السنين إللى فاتت أمانه عليكم تحافظوا عليه .......
يا وائل أنا لسه فاكر لما كنت بتوصينى على المنتدى ليلة جمعة الغضب مش علشان فيه حقوق مالية لولادك من بعدك لكن علشان مجهود الناس فى تلات سنين ما يروحش هدر و تفضل المنفعة مستمرة ...... يا ريت الفكر ده يتنقل لأعضاء الإدارة الجديدة علشان يبقى معروف حجم المسئولية الملقاه على عاتقهم

إذن الحفاظ على المنتدى هو الأولوية الأولى للإدارة يليها التطوير و التوسع

أما على المستوى الشخصى فأملى إن كل واحد من أعضاء الإدارة الجديدة ما يتغيرش بعد ما يبقى مشرف و يفضل هو هو بنفس أخلاقه و طباعة على المنتدى و يفتكر دايما إنه مهما طال الزمن هيرجع يبقى عضو عادى فى يوم من الأيام و اللى ما يحبش يشوفه من المشرف و هو عضو عادى ما يعملوش لما يبقى مشرف

كلمة اخيرة

فى أول نوفمبر 2009 إنضميت لإدارة المنتدى بالصدفة و فى أول نوفمبر 2012 سيبت الإدارة برغبتى و بين التاريخين دول مرت أحداث كتير
و شوفت أيام حلوة و ليالى سودة
أيام حلوة زى أيام ما قابلت أعضاء المنتدى
و يوم ما إتفتح المنتدى لجميع الستخدمبن
و يوم ما طورنا قوانين المنتدى
و يوم ما وصلنا لـ 100 ألف عضو
و يوم ما تفوقنا على المشابهين فى الإحصاءات
و يوم ما قامت الثورة
و يوم ما رجع النت أثناء الثورة
و يوم ما عملت منتدى الثورة
و يوم ما مشى مبارك
و غيرها كتير من الأيام الجميلة

و كمان كان فيه ليالى سودة
الليالى إللى الهاكر كانوا بيوقعوا فيها المنتدى
و الليالى إللى الحكومة وقت فيها النت كله
و الليالى إللى كان فيها خلافات و مشاكل
و الليالى إللى ساب فيها أعضاء المنتدى
و الليالى إللى كنت مضطر فيها إنى أحكم بين متخاصمين

لكن الأيام و الليالى دى بحلوها و مرها إديتنى تجارب و خبرات عمرى ما كنت همر بيها لو مكنتش فى مصر موتورز و حاليا بتعتبر جزء من مكونات شخصيتى يمكن تكون مفيدة ليا أو لأى حد تانى فى المستقبل ......

أخير أرجو من كل واحد إضطريت إنى أستخدم معاه صلاحيات الإدارة إنه يثق تماما إن مفيش بينى و بينه أى حاجة شخصية و إنى كنت بحاول أطبق قانون المنتدى فقط بقدر الإمكان .


بأمانة و من كل قلبى شكرا مصر موتورز

[M.TONSY]

المشاركة الأصلية كتبت بواسطة حازم شاهين أخير أرجو من كل واحد إضطريت إنى أستخدم معاه صلاحيات الإدارة إنه يثق تماما إن مفيش بينى و بينه أى حاجة شخصية و إنى كنت بحاول أطبق قانون المنتدى فقط بقدر الإمكان .

انا واخد منك الانذار الوحيد فى حياتى وبشكرك عليه لانه غيرنى للافضل وعلمنى كتير فى المنتدى لغاية ما بقيت مشرف ... وبجد يا استاذ حازم كلنا فخورين جدا بك

[Mohammed Hamada]

أنا أستمتعت جدا بالموضوع و بالأسئلة الجامدة دى و ربنا يديم المحبة و الأخوة بين الأعضاء

للأستاذ حازم شاهين و الأستاذ أبو نورا و المشرف الكبير M.TONSY الرد بتاع حضرتك أبهرنى الصراحة لكل المشرفين و الأعضاء دمتم بخير

[waelprince2003]

بجد الحوار كان راقى و رائع جدا والاستاذ / حازم شخصية محترمة وعنده خبرة كبيرة عن السيارات و ده كان باين من اسلوب الرد بتاعه ورأيه عن السيارات

[محمدصلاح القاضى]

بجد والله العظيم
الواحد حاسس من كلام مستر حازم
(ان مستر حازم كان قاعد معايا على الكافيه بنشرب واحد شاى وبندردش مع بعض عادى جدااا بدون اى قيود او رسميات )
فعلا مستر حازم شاهين من الشخصيات المحترمه اللى انا سعيد بانى اتعرفت عليه من خلال مصر موتورز

مستر ابو نورا
طبعا حضرتك برووووف كبيييييييير اوووووووووووى
ولو عرض عليك ان حضرتك تبقى محاور تلفزيونى احب اقول
ان برنامج حضرتك هيكون اجمد من برنامج العاشره مساءا
بجد انا مستمع جداااا بالحوار واستفدت كتييير منه