و سقط حبى للبرافو ......وقلبى يبكي لفراقها

[Etsh]

الأخ أيمن ....شكرا كثير للنصيحة الغالية بإقتناء البيجو بس أنا ليه بعض التحفظات الهامة و ذلك عن تجربة أخى فى سيارته وهى:
1- البيجو فى يحتوى على بعض المكونات الغريبة كده ...زيادة عن أى عربية و تختلف كمان عن جميع موديلات السيارات بتخلى فى مشكلة فى أمرين ...اولا مافيش حد بيعرف يشتغل فى البيجو الحديث خارج التوكيل و إن كان فى حد هايبوظ حاجات تانيه فى العربية من غير ما يدرى و من عير أنت كمان ما تعرف.

2- قطع غيار غالية اوى ....مش عارف لية و مش كدة وبس ....فى الجديد مش معمرة لأن البيجو مش عربية تمشى فى مصر...دى فرنسية يعنى عاوز شارع شانزيليزية تمشى فية و تتمخطر و دة بشهادة جميع من أقتنى سيارات فرنسية.....لا غبار أنها سيارات رائعة بس مش لمصر....أنا عندى صديق أشترى سيتروين سى 4 و باعها بعد 3 شهور لأنو لقاها هتتفتفت فى الشوارع المصرية رغم قوة أداء السيارة

3- السيارة و رغم جمال تصميمها تختفى منها الملامح الرياضية....تحس كدة إنها عاوزه غندورة تركبا و تتمخطر بيها فى الشارع

4- البيجو الجديد كلة بتظهر فى أصوات و حاجات غريبة مانتش عارف سبابها أية ....عن تجربة صديق ...بعد أسبوعين بس

فى النهاية لا إعتراض على كفاءة السيارة البيجو التى لا طالما صالت و جالت بالشوارع المصرية بس أنا إعتقادى أن ده كان زمان فى ال 305 و ال 405 و لو دام الحال على نفس الكفاءة لكانت البيجو أكثر السيارات إنتشاراً الأن بدلا من ال بى أم أو مثيلاتها الى مبرتعلى فى الشوارع ولا ال 128 .....أمر أخر لا أعتقد ان البيجو الحديث أصبح يناسب الشباب الرجال اليومين دول بس هوا بقى ناعم قوى و أكثر مناسبة للسيدات و البنات ؟؟؟ده رلأيى الشخصى مع إحترامى الشديد لكل الشباب الممتلكين للبيجو الحديث

[ahmed_kamel]

إنت حيرتنا معاك يا إتش
إختار ماتريده وإرجعلنا بتقرير عن السياره التي إخترتها ونفذت فيها

ولو عايز خامات وجوده وأداء رياضي ومش فارق معاك سعر إعادة البيع ........ زود ميزانيتك وتوكل على بي إم دبليو عشان لن يرضيك غيرها
لا فولكس عاجباك ولا بيجو ولا فيات ولا سيات ولا .......
خلاص مفيش غير بي إم دبليو (دستور صناعة السيارات)

[Etsh]

أحمد باشا واضح فعلاً إن أنا غلبتكوا.. و زاهقتكوا ...عشان كدة أنا رسيت على عربية ولا أحسن و فيها كل الأبشن اللى أى بنى أدم يتمناها ... و العربية دى هيا...
.
.
.
ماروتى 1 سيريوس اكس 5 قدرة فول أبشن..ودى كماليات السيارة
1- السعر 1 جنية لكل قدم مربع للسيارة
2- المساحة الأجمالية 1ز25 سم صافى بخلاف العتب و خصتك فى المناور المتشاركة مع السيارات المجاورة
3- عدد 2 شباك خشمونيوم + وحدة رفع مركزية و قفل الأهرام لزوم السكيوريتى 4 تكة و عل المفتاح
4- نصف تشطيب يعنى ع المعجون بس ممكن تاخدة تشطيب سوبر لوكس دهانات يوتن مشجلر و ارضيات الجوهرة
5 عدد 2 باب أرو على زان يفتح لأسفل لزوم تنضيف الرجلين قبل ولوج حرم السيارة
6-عدادات ديجيتال + ألة حاسبة تتوسط تابلون السيارة عشان تجمع أنت مشيت أد أيه
7- 2 كرسى بامبو + شلتة إسفنج إضافية مع أمكان الط على مرتين + مسطبة خلفية مفروشه كليم أروجينال هاند مايد ودة سبب إرتفاع سعر السيارة المغلى فيه
8-تارة ملتى فانكشن على شكل دريكسيون عجلة مزودة بمثبت سرعة إجبارى لا يسمح للسيارة بتجاوز سرعة قصوى قدرها 1 كم كل 24 ساعة ...عشان العربية تقيل شوية قبل ما تكمل ماراثون الجرى الشاق ده
9-فوانيس أمامية مشبرة جاهز + نظام حديث يعتمد على اللمض الموفرة و زينزن نيون ماركة نيازا
10-عدد 2 ستيكر خلفى رياضى لإضفاء الشكل الرياضى للسيارة "يا ناس يا شر كفاية قر"
11-أرضية السيارة مجهزة بالكامل من موكيت ماك وبرة ناعمة
12-موتور 3 سي سي وممكن يكون رياضى سي دى يعتمد على تكنولوجيا الفحت و الردم ..و أيدك معنا زقة و تدور قدرة 2 معزة و خروف مجرى منزوع القرون بس عشان العربية ما تنطحش و هى ماشية
13- نظام فرامل مساعد تم تطويرة على أعلى مواصفات ال ايه بى أس و ال أيه بى دى على شكل هلب يتم رميه من الشباك الأمامى المجاور للسائق فى حالة الرغبة فى التوقف الفجائى
14- نظام صوتى حديث مع دولبى من خلال 4 جرادل حجم وسط لتضخيم الصوت و أهى تنفع لما تيجى تسيييييييق العربية
15- غطاء سيارة ضد المية ضد النار بس مش أكيد الحشرة و الصرصار ماركة الوكالة او وسط البلد حسب الأختيار
16- ألوان متعددة للسيارة "مشجر..مقلم...كاروهات و سمبوكسات..و الوان تلنية كتير و ممكن تضررررررب لون على أيد الشركة"
17- كلكس سيارة رنات بوليفونيك مجسمة و ألبوم عمرو دياب الجديد
18- عدد 4 زجاج الوان مسنفر أو منقرش ورد و يعطى الوان الطيف باليل لزوم التموية
19- كمبيوتر داخلى يعرض مشاكل السارة و voic command بصوت عبد الباسط حمودة أو شعبان عبد الرحيم مع تعهد الشركة التام بإلتزامهم بحدود الأدب أثناء المحادثات بس لو إستغبات الشركة مش مسئولة ممكن يعملو أية معاك أيييييييييييييييييييييييي يييييييه و إلتزام شعبان نفسة أنو مبطل سجاير و مش هايرجعلها تانى
و أخيرا السيارة متوفرة حسب الحجز بجميع الجمعيات التعاونية بس لازم تنزل بدرى عشان الطابور طويل و مش مسموح لكل عميل بأكثر من سيارتين أو حسب البطاقة التموينية

الأوراق المطلوبة بسيطة دا لو أنت عاوزها قسط
1- صورة حديثة و أنت بتضحك و رافع حواجبك و رافع أيدك بعلامة النصر
2-فيش و تأفيش...عشان لو ليك أى علاقات مشبوهة بالسيارات قبل كدة
3-تأمين أجبارى و شهادة حسن و نعيمة لضمان حسن السلوك
4- شجرة العايلة لضمان وجود حته ضلة تركن فيها العربية

الأستلم بعد 555 يوم من تاريخ الحجز عشان العربية ماتتحسدش على أن يلتزم المواطن من باب الأمانة بالقسم تحت شعار النسر الجمهورى بأن يعلق فردة شبشب طفل صغير فى مؤخرة ديل السيارة

و أخيراً أعزائى كدا أكون لاقيت السيارة التى تخلو من العيوب اللى أنا شوفتها و دلوقتى هادخل أنام و أحلم بيها بس ربنا يستر أقدر أقوم من الحلم و العربية متجبليش نقطة فى الحلم تموتنى ماقمش

[SuMo]

معلش على كلامى اللى أنا حاسس انو متأخر
بس يا اتش أنا كنت ناوى أعمل مفاجأة و أجيب البرافو و بعدين أعرف الناس بس حصل زنقة فللوس و ربنا يفرج
أنا روحت اتفرجت على البرافو أنا و أحد عمالقة المنتدى
مستر محمد كمالbmkbmk لما اتقابلنا فى اسكندرية
الراجل ده انبهر بجودة التقفيل مع العلم ان معاه كابريس 2004 و من وسع الصالون من الأمام و الخلف
مع العلم انها كانت اللى ب 135
كل اللى أنا طالبه منكم انك تشوفها مرة تانية بس فى مكان تانى
أنا ناوى اتكلم نها أكتر بس فى موضوع منفصل
جرب مش هتخسر حاجه

[wawoo]

المشاركة الأصلية كتبت بواسطة Etsh ي 1- كيا سيراتو......فر رأيى أن الكوريون وجدو أن أنسب طريقة لطناعة التابلون الداخلى و تقفيل فرش الباب و الصالون هو التعاون مع الشركة المصرية "الهلال و النجمة الذهبية".....بذمة دة مش عيب يعنى كل الهيلمان اللى بره دة و الجمال اللطيف اللى أنا مستغربو على التصميم الطورى ...ما أحنا مش متعودين أن الكوريين يعملو عربية تصميمها و روحها أوروبى كدة بس أنا عرفت السبب...مصمم السيارة هوا نفسه مصمم الأودى 4 و 6 و هنا عرف السبب...الراجل عملها من برة و الكوريون أقفلو من جوة....

دة انت طلعت زميل بقى يا اتش .....
اهو يا جماعة ...واحد كمان اكتشف ان التصميم الداخلى لا يمت بصلة للتصميم الخارجى .....ههههه

المشاركة الأصلية كتبت بواسطة Etsh 9-فورد.............ياعم أنت بتهرج هو من أمتى فورد كان ليها مكان فى مص ولا وكيل ...لا لا بلاش دى

انا عاوزك تتفرج يا اتش على الفورد فيستا الجديدة ...
و انسى سمعة فورد القديم فى مصر .. العربية دى حكاية فى التصميم ...بس اتفرج عليها و بما انك مصمم جرافيك قولى رايك فى التصميم و الكوالتى من جوة ....
حتى لو مش حتشتريها قولى رايك برضو .....