مساعدة عاجلة في شراء فيرنا

[suzan233]

استاذ esafegypt ممكن تقولنا لية لا فيرنا و ايه العيوب اللى قابلتها فى العربية و هل هى لسه معاك ولا بعتها

[M.TONSY]

المشاركة الأصلية كتبت بواسطة esafegypt لالالالالالالالالا اوعى تشترى الفيرنا اوتوماتك صدقينى انا مجربها موش كويسة لو عاوزه تشترى اوتوماتك اشترى I10 أو I30 لان تقفيلهم نظيف جدا وفى فرق واسع بين الاوتوماتك فى الفرنا وفى الاوتوماتك فى I10 أو I30 او اى حاجه تقفيل خارج مصر وعاوز اقول لحضرتك كمان ان فى موديلات كتيرة تقفيل هندى موش كورى بس والله التقفيل الهندى افضل من المصرى بكتييييررر جدا انا كنت زى حضرتك عاوز اجيب الفيرنا اوتوماتك ودفعت عربون وكنت بشتريها من موزع معتمد من غبور كمان والشخص اللى فى المبيعات قال لى لو هتدفع فلوس فى اوتوماتك متجبش الفرينا اوتو وجيب اى نوع تانى اوتو قلت له ليه ما دى كورى ودى كورى قال لى تقفيل الفيرنا سئ لكن التقفيل الهندى والكورى بلد المنشاء فى الاوتوماتك افضل بكتير وممكن اعطيكى عنوان الموزع اللى انا اشتريت منه وعموما ربنا يوفقك للى فيه الصالح

يا استاذ فتيس الفيرنا الاوتوماتيك هو نفسه فتيس الماتريكس والنيو اكسنت مفيش فيه اى اختلاف نهائيا الكلام انا متأكد منه وبعدين يعنى اى 10 عدلة قوى ماهى تقفيل هندى مش أملة يعنى

[Tota El Masry]

حصل خير الفيرنا أنا سمعت إن إنتاجها حيقف بسبب إن الشركة الأم مش بتحقق أرباح بسبب اكتساحها للسوق يعني حلوة
و بعدن بلاها العربية بتاعتي إللي حتزعلكم من بعض
كلنا بنحاول نساعد بعض من خلال خبراتنا و ده تجارب شخصية قابلة لأن يكون فيها عيوب فردية غيرت وجهة نظر صاحبها تجاه عربية كويسة
وكفاية أنها تقفيل مصري و شجع المصري و لو جودته أقل و سعره أعلى يا أصحاب أعظم ثورة في التاريخ الحديث
ربنا يصلح حال الجميع و ما يجيب زعل بين أسرة مصر موتورز أبداً
المهم أنا أتعرض عليا نيو اكسنت 2000 بمبلغ 45ألف لو البنك رفض قرض السيارة ممكن تكون حلوة و يا ريت حد يقولي أكسنت أوتوماتيك مستعملة في حدود 45ألف ممكن تكون موديل سنة كام و لو أني مش بحب المستعمل علشان مشاكله بس أنا راضية بقضاء ربنا

[Tota El Masry]

شهادة حق أنا أتعاملت مع Call Center و بعض موظفي مبيعات هيونداي لقيتهم ناس محترمين و منتهى الذوق و فيه ناس أمينة جداً و تديك نصيحة لوجه الله و توجهك صح يعني يقولولك أفضل بنك يديك أقل فائدة و أطول مدة و ممكن تقولهم احتياجاتك يوقلك على الموديل المناسب
و فيه توكيلات كثيرة كمان محترمة و حتى معارض بيع و أهم حاجة المتابعة و الاهتمام بالعميل (ما قبل البيع حتى الآن)
لكن ما عليهم هو موضوع زيادة الأسعار إللي أشتكى منه البعض و ده الله أعلم سببه إيه أنا مش بحب أصدر أحكام على حد غايب فلو في حد من المبيعات في هيونداي ممكن يفيدني في موضوع إشاعة زيادة الأسعار المتوقع خلال الشهر الحالي من فضله يقولي السبب و نسبة الزيادة المتوقعة علشان أعمل حسابي
و في الأول و الآخر ربنا ييسر الصالح للجميع و يعطي الجميع سيارة كلها خير و يكفيه شرها
تحياتي لكل أسرة مصر موتورز و كل أخواتي الأعضاء الأفاضل إللي شرفوني بالرد و إدارة المنتدى طبعاً على رأسهم
أختكم توتة المصري

[dr_eslam_66]

هنا على امنتدى كان فيه عضو وشغال في قسم المبيعات جديد وكان بيقول عن إني فيه زيادة متوقعة بحدود 3000 جنيه على بعض موديلات الهايونداي.
بالنسبة للأكسنت مش حلوة أوتو لأنها قديمة قوي والمستعمل في الأوتو مش مستحب.
الفيرنا عين العقل صدقيني بالنسبة لطلباتك منها.
وبالتوفيق إنشاء الله.
لو تلحقي تخلصي ورقك بسرعة مع البنك هيكون أفضل إنتي اولى بأي زيادة منهم.
وشجع المنتج الوطني براحتك حتى بعد الزيادة بردو.