زقه لوجه الله ... العربيه مش عاوزة تمشى

[حسام البورسعيدى]

المشاركة الأصلية كتبت بواسطة zing0 - المكنه مبرجله عالواقف, بتعلى و توطى لواحدها عالسلانسيه - العادم مالوش لون تقريباً (مش شايف لون) - لسه عامل أكس و باب للكربراتير و مصلح سيرفو الفرامل علشان فى تنفيس هوا (و مازال تقريباً) عاوز أرجع للفرملجى تانى. - لسه خارج من تليين الموتور, و بصراحه خايف يكون تسقيط المكنه مش مضبوط. - الدسك و الإسطوانة مغيرتهومش, العربيه معايا من 4 شهور بس. و معرفش قبل كده كان فيه إيه. منتظر الرد , جزاكم الله خيرا

بص يا باشا .. الاحتمالات كده كذا حاجه ..

اكتر حاجه انا شاكك فيها من خلال كلامك هو الاسبراتير .. ممكن يكون محتاج تظبيط .. تغيير ابلاتين وكوندنسر وكده ... غالبا المشكله فيه ..

ممكن على فكره لو مش عيب كهربا يبقى فى احتمال ان وش السلندر يكون مش راكب كويس او جوان وش السلندر مركبش كويس او ضرب .. واحيانا جوان وش السلندر لما يضرب يعمل برجله فى الموتور لو ضرب من ناحيه غرفه الاحتراق .. حصلت قبل كده معانا فى تويوتا 84 ودوخنا لمده يومين لغايه ما اكتشفنا انه جوان وش السلندر ...

بس انا مش مرجح الاحتمال ده اوى لان العربية بتدور وتمشى معاك ..

صحيح اخبار السخونه ايه ؟؟

عموما احتمال كبير يكون عيب كهربا اسبراتير او موبينا .. روح لميكانيكى كويس يكشف عليها وخليك داخل نطاق الاسبراتير والموبينا الاول ومتخليهوش يقعد يفتحلك فى شغل ع الفاضى ...

صحيح موضوع العادم شوفه والعربية مزوده بنزين جامد علشان يبان وانا متوقع انه هيكون فى عادم طالع منها ......

[احمد سويلم]

المشاركة الأصلية كتبت بواسطة zing0 النهارده أخدتها مشوار محترم و لاحظت إنها مع المور بتكون زى الفل إنما لما بيكون فيه غيار بتكون تقيله, بس نسيت أشوف حرارة الجنوط, هأشوفها و أرد عليكم برده. لعلّ الكل يستفيد

هو العيب ده ان شاء الله مش هايكون اكتر من عيب كهرباء
هاتغير كوندينسر وابلاتين وتظبط الاسبراتيسر بتاعك وتبص ع البوجيهات يمكن يكون العربيه متلته ولا حاجه
هاتقولى البوجيهات جديده وغيرتها فى العمره
اونا بقولك بص عليها ومش هاتخسر حاجه
وان شاء الله الموضوع بسيط

ومتقفلش من العربيه ولا حاجه لان اللادا عربيه محترمه جدا جدا ابويا جابها ع الزيرو 94 وبعناها فى 2005 يعنى استخدمناها 11 سنه وبعناها من غير مانعمر المكنه حتى ، لانها فعلا عربيه محترمه
تعرف ان انا حلم من احلام حياتى ان انا اجيب لادا واشغلها اجره !!!!!!!

المشاركة الأصلية كتبت بواسطة zing0 السلام عليكم العربيه مش عاوزه تمشى, حاسس إنى سايق سلحفاه, الغيارات بقت بدرى أوى و ألاقى صوت الموتور بيعلى أضطر أجيب الغيار التالى: الأول علشان أتحرك , و الثانى أول ما تبدأ تتحرك, و الثالت على 20 كم و الرابع من 40 و طبعاً لما حتى أنزل أقعد على دواسة البنزين آخرها 80 كم و بعد كده مفيش, دوس زى ما أنت عاوز و لا بتسأل فيا, عاوز أفهم فيه أيه؟؟؟ سحبها طبعاً زباله كالعاده بس أنا حاسس كأنى دايس فرامل على طول أو محمل عليها أشياء فوق الوزن المسموح, بحيث أول ما أرفع رجلى من البنزين إلاقيها كأنى بفرمل. أكشف على إيه؟؟؟؟؟؟ أنا كنت عامل موضوع لتاريخ الإصلاحات مع شوية أستفسارات عالرابط ده, يا ريت حد يفيدنى http://www.masrmotors.com/vb/showthread.php?t=96249

ضرورى تظبط تاكيهات وتراجع على تقسيمة الكاتينة هل مقدمة هل متاءخرة !!!

[mr_astra]

المشاركة الأصلية كتبت بواسطة cars admire ضرورى تظبط تاكيهات وتراجع على تقسيمة الكاتينة هل مقدمة هل متاءخرة !!!

شكرا استاذنا CARS ADMIRE
ولو الاخ ZINGO عاوز يعمل الموضوع دة بنفسة سهل واليك الطريقة
فك غطا التاكيهات
عشق غيار سريع فى العربية وزقها لغاية اما يتطابق زنبة الكرنك (الطنبورة اللى راكب عليها السير )على الشرطة الكبيرة على وش التقسيمة فى الموتور (يوجد3 شرط كبيرة ومتوسطة وصغيرة ) .....تبص على الكامة هتلاقى زنبة فى ترس الكامة (العلوى طبعا) متطابق مع زنبة مدببة فى غطاء الكامة الصاج اى عدم تطابق بيعنى ان سير الكاتينة راكب ماخر او مقدم ولازم يتراجع علية

[zing0]

و الله مش عارف أشكركم إزاى على أهتمامكم و سرعة ردودكم. أنا و الله كذا مرة نفسيتى تقفل من العربيه و أسيبها مركونه بالإسبوع مش عاوز أركب و ساعات أفكر فى بيعها كمان. بس لولا مساعداتكم و نصايحكم....
الشكر كله لمن لا نستطيع الوفاء بجمايلهم علينا,,,,,
Cars admire
mr_astra
vanditta
amr_elsisi
حسام البورسعيدى
محمد صلاح القاضى

و الشكر موصول لكل اللى بيأخدوا من وقتهم و علمهم و يردوا علينا, جزاهم الله عنا كل الخير

إن شاء الله هأراجع الميكانيكى اللى عمّر المكنه و أشوف هيرد يقول إيه.