رد: بتلتزم بالإشارات يمين وشمال وانت ماشي ولا لأ ؟
بستخدم الاشارات بس مين عنده دم فى بلدنا وبيدى فرصة للشخص اللى عاطى الاشارة انه يدخل يمين ولا شمال,,ده بالعكس لما بيلاقوا الشخص عاطى اشارة بيجروا بسرعة ويعدوا قبله وده تصرف يدل على الغباء والتهور كاننا فى سباق يسيطر عليه قلة الذوق وعدم الاحترام ,,معرفش الشعب المصرى مال اخلاقه وتصرفاته فى انحدار مستمر كده ومن السخرية تلاقيهم كاتبين القيادة فن وذوق واخلاق والناس مبقاش عندها ال3 حاجات فى حياتهم كلها مش بس فى القيادة,,انا عشت فى السعودية والامارات وعمرى ماشفت الهمجية والاستهتار وعدم الاحترام والتهور اللى شفتهم فى بلدنا,,هناك الناس ملتزمة ومحترمة نفسها وغيرها وقواعد المرور وكل انسان ماشى فى حاله بدل ما يزنق على غيره ويخد غرز ويعمل حركات غبية تؤدى للموت والعياذ بالله,,الواحد بيحس وهو سايق كانه ماشى على الحبل فى السيرك لازم اركب عيون فى قفايا ويمين وشمال وفوق وتحت,,تبقى ماشى فى حالك وتلاقى فجاة اللى نط قدامك ويلزق نفسه بينك وبين اللى قدامك ولا حد بيسيب مسافة امان خالص بينه وبين اللى قدامه,,مسافة الامان دى بسمع عنها فى الحكايات الخيالية لكن مبشوفهاش,,وتبقى ماشى فى حالك والطريق قدامك مقفول والغبى اللى وراك بيرعش النور ويديك كلاكس مش فاهمة برضه المفروض نركب اجنحة عشان نطير ونعدى العربيات اللى واقفة قدامنا ومش قادرة افهم لما الطرق والشوارع عندنا حالتها زفت ومليانة مطبات وحفر وغير ممهدة والعربيات عندنا امكانياتها متواضعة جدا بالنسبة للدول الاخرى كانوا هيمشوا على سرعة كام,,وتصرفات همجية لاتعد ولاتحصى,,الواحد هيلقاها من الميكروباصات ولا التاكسيات ال معندهمش ولا فانوس سليم وميعرفوش اساسا يعنى ايه اشارات يمين وشمال وبيقفوا قدامك فجاة فى منتصف الطريق عشان لمحوا زبون هيركبوه من على بعد 200 متر ولا الاتوبيسات العجيبة اللى نصها الامامى دايما حادف شمال مش فاهمة ليه,,مصر هى الدولة الوحيدة اللى لازم تدى فيها اشارة يمين او شمال وتطلع ايدك فى نفس الوقت من الشباك عشان الاعمى اللى جاى وراك يشوف انك مدى اشارة شمال ولما تدى اشارة يمين بقى لازم تكون مأجر شخص يقعد جنبك عشان تخليه يطلع ايده من الشباك اللى جنبه,,ولو معملتش كده تلاقى راكب السيارة بيقولك فين مفيش اشارة يا وشتمية بقى وانت مشغل الاشارة وتقعد تفكر هو بيقولك كده ليه وفى الاخر اكتشفت انك لازم تطلع ايدك من الشباك لانهم مبيعتبروش ان الاشارة بتاعت العربية دى دليل انك داخل يمين او شمال يعنى عاملين اختراع خاص يتناسب مع غبائهم وجهلهم وهمجيتهم وعمى النظر اللى عندهم والله الواحد لو عطاهم مليون اشارة وطلع ايده ورجله كمان ماهيبقى فيه فايدة فى الهمجية دى ابدا عشان دول عاوزين يتربوا من جديد ويتعلموا من جديد ويعيشوا فى ظل حكومة ملتزمة عندها ضمير تعلمهم الادب مش حكومة فهلوية زيهم ومع ذلك مش هفقد الامل برضه وهستخدم الاشارات علشان مش عاوزة اتحول لانسانة همجية زيهم وبسببهم وربنا يكفينا شر الغباء والاغبياء اللى مفيش اكتر منهم
|