بتخاف تنزل بالعربية؟

[POSH3ER]

فكرتني بايم زمان اول ما كنت باتعلم كنت باموت ف جلدي و انا ماشي بالعربية بس لما مشيت كتير بقت الدنيا حلوة

و انا ممكن اكون زيك شوية لاني بحب جدا اطير بالعربية حتى ف الزحمة تلاقيني قاعد باخرم و غرز بقى من بين العربيات

و اكتر حاجة تتضايقني الي يكسر عليا من غير لا اشارة و لا كلاكس و الي يديك اشارة و يجي عكسها

[hazem_khidr]

المشاركة الأصلية كتبت بواسطة Injection بتريح دماغك والله ياحازم باشا, بس يبقى عندك عربية وتنزل تركب موصلات وبهدلة (كده كده بهدلة أصلا). وأنا عمرى ماكرهت حاجة فى حياتى أكتر من الظلم, لما واحد ربنا يتولاه يخبط عربية ويسيبها ويمشى, مافيش فرق بينه وبين الحرامى الأثنين ظلمة يستاهلوا الحرق, أنا والله لما باخد العربية مشوار ببقى هتجنن لو سيبتها لوحدها حتى فى جراج الجامعة, متهيألى بعزها أكثر من نفسى... ربنا يهدى الناس جميعا ويرحمنا برحمته.

والله يا انجكشن انا كنت الاول بقول عادي انا جايب العربيه اتمتع بيها
لكن لما لقيت اني بقعد كتير في الشغل مش بحتاجها و الجراج اللي بركن فيه اتقفل
بقيت اسيبها في الشارع و مافيش اي ظل علاوه علي الخرابيش و الحكات
فبقيت بحب اريح دماغي و اركز في شغلي و بالمره تفضل العربيه نظيفه
انت عارف اللون الاسود و مشاكله ونظافته
فجربت اني اروح في تاكسي لقيت الدنيا لذيذه
و ارجع من الشغل بتمشي (جوالي 3 كم او 4 كم) برضه رياضه ظريفه و الجو حلو.
فمره و التانيه بقيت بكسل اخدها و انزل كده مريح دماغي

[Injection]

ده معظم رجالة المنتدى طلعوا خوافين, بس المشكلة مش فى السواقة, السوقة متعة, المشكلة فى الناس والزحمة والطرق اللى أطفال الحضانة بيعملوا الخطط بتاعتها .
أنا بتدرب فى مكتب محاسبة فى مدينة نصر, وميعادى معاهم كل يوم الساعة 9 صباحا بس والله بنزل الساعة 5.30 الفجر علشان أتمختر براحتى وأكون هناك على الساعة 6الصبح, وبرجع الساعة 5 العصر فى الشمس والزحمة لغاية السواح وبحمد ربنا أول ما بركن علشان محصلش مصيبة.
بس اللى يبص للدول التانية ويبص لمصر,أنا شايف أن هنا أحسن, هنا ممكن تعمل اللى أنت عايزه, تحتل الحارة الشمال أو تركن فيها وتحود من غير أشارة, وبتمشى على السرعة اللى أنت عايزها ومفيش قوانين ولا مخالفات وكله كوسة بالمهلبية.
وهى دى بلدى وI wouldn't have it any other way

[Injection]

المشاركة الأصلية كتبت بواسطة corsair والله يا انجيكشن انتا جيت علي الجرح انا بتجيلي حالة كدا غريبة ساعات بحس اني مبعرفش اسوق خالص مش عارف ليه مع اني معروف عني في العياله ان قلبي جامد وميت ولا بيهمني زحمة ولا احزنون بس فعلا انا اتعلمت حاجه حلوه اوي انك لو عملت حساب اللي حوليك في اي حاجه هتتخبط وهتتروق لازم تعمل زي سواقين الميكروباصات علشان تعرف تمشي في البلد ديه هتخاف اركن علي جنب وخدها مشي لحد البيت

سواقين الميكروباصات دول ناس عجب, كل لما أشوفهم أفتكر الهند والناس هناك وهى ماشية فوق بعض وبحب جدا لما لاقى سواق ميكروباص قام واقف مرة واحدة وأنت شوال بطاطس بالنسبة له, والله ناس عسل.

[Injection]

المشاركة الأصلية كتبت بواسطة ahmedraafat00 ياااااااااه نفس اللى انت بتقوله كان ينطبق عليا لحد من كام شهرلانى جديد فى السواقه كنت ببقى متضايق وانا نازل اسوق العربيه و ممكن خايف شويه وبرده بمجرد ما كنت بتحرك بالعربيه كنت ببقى طبيعى وهادى جدا بس الصراحه مكنتش بعمل زيك وافتح على 80 بس مع الممارسه انتهى شعور الخوف تماما خصوصا بعد ما سقط فى اكتر من مكان ادانى الثقه فى نفسى وانا للاسف ساعات ببقى عندى مشوار و بركب تاكسى لانى عارف انى مش هلاقى ركنه و كمان بحس ان العربيه مسؤليه كبيره يعنى لو نزلت مشوار و ركنتها صف تانى او مكان ممنوع ببقى قاعد مش على بعضى و خايف يحصل حاجه على عكس لو نازل من غير عربيه ببقى رايق جدا ومش شايل هم حاجه بجد الواحد نفسه مصر ترجع زى زمان و البلد تبقى فاضيه و هاديه يا سلااااااااااام كل المشاكل هتتحل

ربنا يحمينا ياباشا, مفيش حاجة أسمها سواق جديد, السواقة خبرة وممارسة, واللى بيسوق من 20 سنة لسه برضه بيتعلم, والحوادث بتحصل لأى حد, بس أخبار الجيب أيه, معتقدش أن حد بيزنق عليك وأنت راكبها, الهيبة برضه ياباشا.